Nya ǹ dín 13
13
Barnabaasi laanka Sooli a dia dí-a boo
1Lawa a boo gii-dalin laanka minin-daraalin kɔnɔn nə́ goã Lawa a sɔmɔ lɛ nɛ Antiɔsi kiwi. Bɛa minin lɛn man ka Barnabaasi ni, Simiɔn nɛ, ǹ bɛ́ min mɛn bíi Min Tì, ka Lusiisu mɛn bɛ́ boe Sirɛni kiwi, ka kii Erɔdi a nɛnyaanmaa a koa-kun wole Manayɛni ni, ka Sooli ni. 2Ǹ bɛ́ Dɛnaa guguru kɔ ǹ bǎã nɛ ǹ kɔ́n pinaa, ǹ lɛ n sɔɔ nɛ, Yiri Fu pɛ: «Ka Barnabaasi laanka Sooli bɔ ka koa ǹ gɔrɔn, masɛ nə ǹ bíi dí mɛn ganaa, bɛa lɛa.»
3Ǹ bɛ́ ǹ nə́ n lɛ sɔɔ ǹ nə́ Lawa nyankɔ, ǹ nə́ n gɔn da ǹ la, ǹ nə́ zii kɔ ǹ la.
Barnabaasi laanka Sooli n woe Siipri gána nɛ
4Barnabaasi laanka Sooli bɛ́ Yiri Fu a dia dí-a wolen lɛa, ǹ nə́ woo Selusii kiwi, ǹ nə́ tà kuru ǹ goo saa walan ǹ nə́ n yɔrɔ dia Siipri gána la. 5Ǹ bɛ́ ǹ nə́ dɔ Salamini kiwi, ǹ nə́ Lawa a boo pɛ walan Zuifun lɛsɔkɔn kionən ne. ZAÃ dɔ́ goã kunun ǹ ni, a nə́ n doe ǹ lɛ.
6Bɛa tán kɛ lɛ, mu bii, ǹ bɛ́ ǹ nə́ bɛ wɔsɔ, ǹ nə́ woo dɔ Pafɔsi kiwi, ǹ nə́ giĩ goon yɛ walan, Zuifu ni, a tɔ n Bara-Yezu. A na á goã koe siin zɛnaali lɛa, a nə n din biɛ Lawa a boo gii-dali lɛa. 7A na á goã gána a kii a tá-kun wole goon lɛa, bɛa kii lɛ tɔ n Sɛrzusu Pooli. Bɛa kii lɛ goã min yiridɛnaa lɛa parsiini. Á Barnabaasi laanka Sooli bíi mà asɛ tá li a Lawa a boo kɛ ma. 8Sɛnɛ, Bara-Yezu lɛ, a tɔ kɔsɔ n Elimasi, bɛ giala mà "Koe siin-zɛnaali", bɛ́ Barnabaasi laanka Sooli liere kɔ, a na á goã giɛ li a kii lɛ kurəə golee Lawa li ganaa. 9Sooli lɛ, a tɔ n Pooli dɔn, Lawa a Yiri Fu daa la, á n yii doa giĩ lɛ la ka gongon, 10á pɛ nɛ: «*Sɛtaan min ni, yiri tá n lon n nə́ sii kɔkɔrɔ tɔrɔ tumaa zɛnɛɛ nɛ, n ba lɛ koe sii pepere kɔ́n zɛnaa ganaa wa. N ba Dɛnaa a sii yɔrɔ bɔn kɛn sàabaa lɛ diɛ wa? 11Á ke, Dɛnaa tá n gialaa sisia kəni. N tá re yii tere-a biɛ, n yii ba re wasa dɔ din yii doo wa, yǎa biikoo kɔ́n doe.»
A din bǎã-n gɔrɔ Elimasi yii tã. Á goã n bibiĩ a n giɛ min li, mà a na asɛ nyɛɛnaan bɔ. 12Kii Sɛrzusu lɛ bɛ́ á bɛa sii kɛ lɛ yɛ á n zɛnaa, á golee Lawa li, a giala boo mɛn nə n da Dɛnaa Yezu wɔ gɔn la, bɛ ná a foo kũ parsiini.
Pooli boo mɛn da Antiɔsi kiwi, Pisidii gána nɛ
13Pooli laanka ǹ miãn nə́ wɔ tà kuru ǹ goo ne Pafɔsi kiwi, ǹ nə́ woo Pɛrɛgi kiwi, Panfilii gána nɛ. ZAÃ na á wusoo ǹ ganaa walan, á woo Zeruzalɛmu. 14Pooli laanka ǹ miãn lɛn sɛn bɛ́ ǹ nə́ soo Pɛrɛgi kiwi, ǹ nə́ ǹ zii tɔ wɔ, ǹ nə́ woo dɔ Antiɔsi kiwi Pisidii gána nɛ. *Susu ǹ pii pinaa, ǹ nə́ wɔ lɛsɔkɔn kion ǹ nə́ giã tán. 15Muizu a Landa sɛ́wɔ laanka Lawa a boo gii-dalin sɛ́wɔ pɛ kio, lɛsɔkɔn kion lɛ a goledɛnan nə́ pɛ ǹ nɛ:
– Wɔ dɔɔ̃nɔn lɛn, bɛ̀ kɔn doroo hinlaa kɔn foo taã ǹ boo kɔ́n tá ka lɛ-n, ka n die pii zaman nɛ, zii tan.
16Pooli tɔ́n yoo, á n gɔn saa lon mà zaman lɛ nə n lɛ tã, á pɛ:
– Izirayeli minin lɛn nɛ, ka tɔrɔ kɔsɔn mɛnɛn dɔn bɛ́ nyɛ́ɛ biɛ Lawa nɛ, ka n too kɔ ma lon. 17#BBN 1.7; 12.51. Wɔsɛn Izirayeli minin Lawa lɛ na á wɔsɛn digolon yii gɔgɔɔ̃. Wɔsɛn tɔrɔ minin lɛn bɛ́ Ezipti gána nɛ, á màn da ǹ li ǹ nə́ gigiã kɔ. Bɛ kio, á ǹ bɔ bɛa gána lɛ nɛ ka a din pàã nɛ. 18#MNS 14.34; TDP 1.31. Lɛ̀ pusi miã gɔ́ɔ̃ nɛ, á ǹ too don bii. 19#TDP 7.1; ZOZ 14.1. Bɛ kio, a bɛ́ á tɔrɔ sɔbaa dɛ á bɔ ǹ nyɛɛnɛ Kanaan gána nɛ, á tán lɛ tatala kɔn-a ǹ bii, á ǹ wɔ baa. 20#SYB 2.16; SAM1 3.20. Bɛa sii kɛ lɛ din tumaa na á n zɛnaa, lɛ̀ biɛsii ka posooro (450) miã gɔ́ɔ̃ nɛ. Bɛ kio, Lawa kiri-kurulin koa ǹ mìi la, yǎa á woo dɔ a din a boo gii-dali Samayeli ganaa. 21#SAM1 8.5; 10.21; 13.14; 16.12; LOE 89.20. Ǹ dinin nə́ tɔ́n pɛ mà ǹsɛn man giɛ kii li, yǎa Lawa tɔ́n Kiisi a nɛgiĩ Sayulu koa ǹ mìi la. Bɛnzamɛn tɔrɔ nɛ, á goã ǹ mìi la yǎa lɛ̀ pusi. 22Lawa bɛ́ á Sayulu bɔ á bɔ ǹ mìi la, á Davida bɔ á koa ǹ kii lɛa. Lawa na á boo kɛ pɛ a din lɛ wɔ gɔn la: «Masɛ n má Zesee a nɛgiĩ Davida yɛ min lɛa, a sii n kiɛ ma foo la parsiini. A din lɛ n die ma foo dùũ siin tumaa zɛnɛɛ a nə ǹ lɛ pã.» 23A kɔnpɛ a din a lɛ-kɔ nɛ, Lawa na á Izirayeli Minin Nyin-sili lɛ bɔ bɛa Davida kɛ lɛ tɔrɔ nɛ, bɛ n ka Yezu ni. 24#MAR 1.4; LUK 3.3. Yezu laan mà a n die, bɛ̀ ZAÃ na á pɛ Izirayeli minin tumaa nɛ, mà ǹ wusoo ǹ sii baraan kio, ǹ *batɛmu si. 25#MAT 3.11; MAR 1.7; LUK 3.16; ZAÃ 1.20,27. ZAÃ bɛ́ re a dí gɔn nyɔmiɛ̃, á pɛ: «Minin man taasɛ mà die n ka masɛ nɛ? Ǹ bɛ́ n yii diɛ min mɛn la, bɛ bie ka masɛ-n wa. Sɛnɛ, min kɔ́n tá die masɛ kio, ma mìi á kiɛɛrɛ, man zuməə ma bɛa dɛnaa kɛ lɛ a kɔsɔ biɛn fore.»
26Pooli pɛ doo: – Dɔɔ̃nɔn lɛn, ta ka n Abrahamu tɔrɔn lɛa hinlaa ta ka n tɔrɔ kɔsɔn lɛa, ka n nyɛ́ɛ biɛ Lawa nɛ, kirisibaa ǹ boo kɛ na á n dia wɔsɛn tumaa wɔ lɛa. 27Lawa a boo gii-dalin sɛ́wɔn mɛnɛn bɛ́ n pii *susu ǹ pii tumaa li, Zeruzalɛmu kiwi minin laanka ǹ goledɛnan nə bɛn boo giala ma, ǹ nə́ Yezu lɛ dɔ̃ wa. Ǹ dɔlɔ da a mìi-n ke, ǹ nə́ dɛ, bɛ na á n baa Lawa a boo gii-dalin lɛn boon sii lɛ piɛ̃ lɛa. 28#MAT 27.22,23; MAR 15.13,14; LUK 23.21-23; ZAÃ 19.15. Ǹ zɛ̀rɛ sii kɔ́n yɛ a ganaa màn mɛn nə́ gɛ̀ boe wa, sɛnɛ, ǹ ná a nyankɔ kii Pilati lon mà a dɛ a gã. 29#MAT 27.57-61; MAR 15.42-47; LUK 23.50-56; ZAÃ 19.38-42. Màn mɛn tumaa bɛ́ kiɛ̃ nɛ a wɔ gɔn la, biikoo mɛn waáraa ǹ nə́ bɛ yii zɛnaa ǹ ná a lɛ pã, ǹ nə́ gisĩ ǹ nə́ bɔ gɔn-a, ǹ ná a gere da yala-n. 30Sɛnɛ, Lawa ná a yii kaa á bɔ geren bii. 31#NDS 1.3. Min mɛnɛn nə kɔ lɛ ǹ nə́ bɔ Galilee á woo Zeruzalɛmu yaa, á n din nyaa bɛn manɛ lɛawaa damata gɔ́ɔ̃ nɛ. Bɛa minin kɛn lɛn man a siéren lɛa sisia zaman lɛ yɔrɔ-a.
32Wɔsɛn dɔn man bɛa boo kɔɔ̃n kɛ lɛ pii ka dinin manɛ. Lawa nə́ n lɛ kɔ wɔsɛn digolon la ka boo mɛn nɛ, 33#LOE 2.7. a na á bɛa boo kɛ lɛ lɛ pã wɔsɛn manɛ, wɔsɛn mɛnɛn bɛ́ kaa nɛnyaanan lɛa, Lawa na á Yezu yii kaa á bɔ geren bii. A na á bɛ zɛnaa á kɔnpɛ ka Lawa Tɔ Bɔ ǹ LOE paabaa ǹ wɔ kɛ a boo ne:
«Ma n maa nɛgiĩ lɛa,
a kũ pelo ganaa,
masɛ din ni n Díi lɛa.»
34 #
IZA 55.3. Lawa bɛ́ a ná a yii kaa á bɔ geren bii ke, a gere ná a bɔɔ̃ duduu wa, bɛ na á n zɛnaa á kɔnpɛ ka boo kɛ nɛ á n pɛ:
«Masɛ lɛ kɔ Davida la
ka màn sonboren mɛnɛn nɛ,
ǹ nə́ taãn-taãn dɔn,
man die bɛn koe ka la.»
35 #
LOE 16.10. A lɛ kɔ Davida la ǹ boo lɛ kɔ́n nə pii bǎã kɔsɔ nɛ kɛnɛn:
«Ma bɛ́ n din a dí-nyali sonbore lɛa,
n ba re toɛ ma gere bɔɔ̃ wa.»
36Dí goã Davida gɔn a din a biikoo kɛ li, a bɛ́ á bɛ nya Lawa nɛ á nya, á gã, ǹ ná a gere bĩ kunun ǹ digolon ne, a gere bɔɔ̃. 37Sɛnɛ, Lawa din nə Yezu mɛn yii kaa á bɔ geren bii, bɛ gere bɔɔ̃ wa. 38Dɔɔ̃nɔn lɛn ganaa, ka dɔ̃ mà sii baraa toa kɛ na á dɔ ka li, a din Yezu kɛ lɛ barka nɛ. Muizu a dí-pɛn kɛn giulun, ka goã boe la ka tá n mìi siɛ lon Lawa yɔrɔ-a wa. 39Sɛnɛ, bɛ̀ ka golee Yezu li, Lawa á die kaa sii baraan tumaa toɛ ka nɛ. 40Bɛ lɛ nɛ, ka yiri bɔ ka dinin li, màn mɛn bɛ́ toɛ, Lawa a boo gii-dalin nə màn mɛn pɛ, bɛ baran ka yɛ wa. Maǹ nə́ goã ǹ nə́ pɛ:
41 #
ABAK 1.5. «Ka ga a ganaa,
kasɛn min piɛ̃-bɔlen lɛn.
Ka n kaãbaa ka papaã!
A ka yii toa koo,
man die dí goon nyɛɛ,
bɛ̀ a nə n zɛnɛɛ ka kio,
min ná a laakalɛɛ ka nɛ,
bɛ̀ ka a golee li wa.»
42Pooli laanka Barnabaasi bɛ́ ǹ nə́ soo lɛsɔkɔn kion lɛ nɛ, ǹ nə́ ǹ nyankɔ mà ǹ wusoo ǹ da susu ǹ pii kɔsɔ kɛ li, ǹ na a din boo lɛ da. 43Lɛsɔkɔn lɛ kio, Zuifun ni ka tɔrɔ kɔsɔn mɛnɛn nə wɔ Zuifubaa nɛ, bɛn gigiã kɔ Pooli laanka Barnabaasi lɛ. Ǹ bɛ́ sùn biɛ kunun ǹ ni, Pooli laanka Barnabaasi nə́ ǹ foo taã, mà ǹ goã golee Lawa li kɛ gɔ́ɔ̃ nɛ, Lawa din nə ǹ mɛn kɔ ka a bǐɛ̃baa barka nɛ.
Pooli laanka Barnabaasi a yɔrɔ da tɔrɔ kɔsɔn la boo
44 *Susu ǹ pii lɛ bɛ́ á dɔ, a n goon ka kiwi lɛ a min din tumaa na á n lɛsɔkɔn, ǹ nə́ die n too koe Dɛnaa Yezu a boo ganaa. 45Zuifun bɛ́ ǹ nə́ bɛa zaman kɛ lɛ yɛ, busii wɔ ǹ foo-n parsiini, ǹ ná a giala kɔ ǹ tá Pooli a boo tumaa lɛ sii ka sɔ nɛ. 46Pooli laanka Barnabaasi pɛ ǹ nɛ ka foo tãbaa nɛ:
– Lawa a boo kɛ lɛ doamaa nɛ a n pɛ ka dinin lɛn man bɔrɔ, sɛnɛ, ka bɛ́ ka n piã nɛ, ka ga ka dinin ganaa mà kasɛn doamaa bie ka nyin nyabaã kɛ-n wa, bɛ lɛ nɛ, wɔsɛn manə bɔyɛɛ wɔ n yɔrɔ da tɔrɔ kɔsɔn la. 47#IZA 42.6; 49.6. A giala, Dɛnaa din dí-pɛ mɛn kɔ wɔsɛn la, bɛ n ka kɛ nɛ:
«Man má n koa tɔrɔn tɛ fúlu lɛa,
màn mɛn bɛ́ toɛ, kirisibaa dɔ kanaa lɛ dan ganaa.»
48Ǹ bɛ́ ǹ nə́ bɛa boo kɛ ma, tɔrɔ kɔsɔn minin kɛn foo kɔɔ̃n kɔ parsiini, ǹ nə́ barka da Lawa nɛ a boo kɛ a lɛa. Minin mɛnɛn tumaa bɛ́ Lawa nə́ ǹ da nyin nyabaã kɛ wɔn lɛa, bɛn nə́ golee Lawa li.
49Dɛnaa a boo lɛ nə́ n daa bɛa bǎã kɛ lɛ tumaa la. 50Sɛnɛ, lɔ yii guguru-an mɛnɛn bɛ́ nyɛ́ɛ biɛ Lawa nɛ, Zuifun nə́ bɛn sɔsɔmɔ, ka kiwi a min yii guguru-an nɛ, ǹ nə́ ǹ kaa a ganaa mà ǹ yoo Pooli laanka Barnabaasi gialaa. Ǹ nə́ ǹ loo ǹ nə́ ǹ bɔ ǹ gána nɛ. 51#MAT 10.14; MAR 6.11; LUK 9.5; 10.11. Pooli laanka Barnabaasi nə́ ǹ tán a tii gusuũ duduə ǹ nə́ bɔ ǹ gòãn-a, ǹ nə́ soo ǹ nə́ woo Ikoniɔmu. 52Lawa-nyankɔlen kɛn sɛn nə́ goã ǹ foo n kɔɔ̃nɛ, Lawa a Yiri Fu nə́ ǹ la.
Currently Selected:
Nya ǹ dín 13: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
