Nya ǹ dín 14
14
Pooli laanka Barnabaasi a tá Ikoniɔmu boo
1A din sii goon lɛ na á n zɛnaa Ikoniɔmu kiwi. Pooli laanka Barnabaasi woo Zuifun lɛsɔkɔn kion, ǹ nə́ boo da yǎa Zuifu laanka Grɛki gigiã lɛ kɔ ǹ nə́ golee Lawa li. 2Sɛnɛ, Zuifu kɔsɔn mɛnɛn bɛ́ ǹ lɛ kɔ boo lɛ a sonborebaa ganaa wa, bɛn nə́ tɔrɔ kɔsɔn lɛn gòãn sɔsɔmɔ, ǹ nə́ ǹ kaa Lawa-nyankɔlen lɛn ganaa. 3Ka bɛ din yii ni, Pooli laanka Barnabaasi goã Ikoniɔmu kiwi ǹ nə́ biikoo kɔ́n zɛnaa. Ǹ foo bɛ́ doa-n Dɛnaa ganaa, ǹ nə́ Dɛnaa a boo kɛ pɛ ka foo tãbaa nɛ. Dɛnaa din toa ǹ nə́ kaãbaa ǹ sii sonbore zɛnaa, á nyaa ka bɛn nɛ, mà ǹ boo lɛ n sonbore lɛa.
4Kiwi lɛ a minin nə́ n talakɔn: Ǹ tɛnɛn man kun ka Zuifun ni, gialakunun man kun ka dia dí-a wolen kɛn nɛ. 5Zuifun laanka tɔrɔ kɔsɔn nɛ, ka kiwi lɛ a nyɛɛnaandɛnan nɛ, bɛn nə́ ga li mà ǹ yoo dia dí-a wolen lɛn gialaa, ǹ nə ǹ dɛ ka kɔlɔ nɛ. 6Sɛnɛ, Pooli laanka Barnabaasi bɛ́ ǹ nə́ bɛa sii kɛ lɛ dɔ̃, ǹ nə́ soo ǹ nə́ baa si ǹ nə́ woo Likawonii gána nɛ, ǹ nə́ wɔ Listrə laanka Dɛrbə kiwi, ka ǹ lɛkoro lɛ-a kiwin ni. 7Ǹ nə́ boo tii kɔɔ̃n lɛ pɛ walan dɔn nɛ.
Bɔlɔka goon a kaka kɔ Listrə kiwi
8Giĩ goon na á goã Listrə kiwi lɛ nɛ, a ba boe la á golee a gòãn la wa. A bin tɔ wɔ wa, a giala, a na á yɛ bɔlɔka lɛa. 9Ǹ kɔ́n pinaa Pooli n boo diɛ, a nə n too koe li. Pooli nə́ n yiin doa la parsiini, a bɛ́ á yɛ mà golee Lawa li tá a lon a boo la a kaka kɔ, 10á pɛ nɛ ka lɛn gole ne: «Yoo lon n golee n gòãn la.»
Giĩ lɛ parɛ á yoo á tɔ wɔ. 11Pooli bɛ́ á sii mɛn zɛnaa, ǹ bɛ́ ǹ nə́ bɛ yɛ, minin tɛnɛn nə́ n toa zaman bii ǹ nə́ pɛ ka Likawonii minin bɔlɔ nɛ: «Dìn lɛn man nə́ n bɔyaa minbuiinin lɛa, ǹ nə́ daa wɔsɛn li.»
12Maǹ nə́ goã Barnabaasi bíi mà Zesi, dìn goledɛnaa, Pooli sɛ n Ɛrmɛsi lɛa, a giala a din lɛ na á goã boon lɛn diɛ. 13Zesi a wúlu kion lɛ bɛ́ á goã kiwi lɛ a wɔ ǹ kiɛnlɛ-a, Zesi a wúlu-bɔle lɛ daa ka dii gɔ̀lɔ̀n nɛ, da buũ nyaǹan nɛ ǹ ganaa. Á daa kun ka zaman lɛ nɛ, mà a n die wúlu boe. 14Dia dí-a wole Pooli laanka Barnabaasi bɛ́ ǹ nə́ bɛa boo kɛ ma, ǹ foo ziziɛ̃ parsiini. Ǹ nə́ ǹ mɔnaan toɛ̃, ǹ nə́ n gòã saa ǹ nə́ woo zaman lɛ li, ǹ nə́ paraa: 15#BBN 20.11; LOE 146.6. «Wàa na á baa ka tá siin kɛn zɛnɛɛ? Wɔsɛn dɔn man minbuiinin lɛa ka ka bɛ́ lɔn. Wɔsɛn bɛ́ boo kɔɔ̃n mɛn pii ka nɛ, bɛ n ka kɛ nɛ, wɔsɛn wáa ka n bɔ kɛa dì kooron kɛn kio, ka wusoo ka da Lawa yiikoonaa kɛ ganaa, Lawa mɛn bɛ́ á lon laanka tán zɛnaa, ka yìsi mu ni ka a gɔ́ɔ̃gɔ́ɔ̃ ǹ màn tumaa nɛ. 16Lɛlɛ á tɔrɔn tumaa toa walan, didie kɔ a din a zii lɛ. 17Sɛnɛ, á n din nyaa ka a bǐɛ̃ zɛnaan nɛ biikoo tumaa li, a giala á la mu bɔ lon á kɔ ka la, á lɛ̀ sonboren kɔ ka la, á màn-bii gigiã kɔ ka la ka foo kɔɔ̃nbaa nɛ.»
18A laanka bɛa boon kɛn lɛn tumaa nɛ, dia dí-a wolen lɛn man nə́ nɔmaa taãn-taãnɛ, ǹ nə́ tɔ́n boo la ǹ nə́ minin kɛn lɛn kurəə ǹ wúlu lɛ a bɔ ganaa.
19Sɛnɛ, Zuifun kɔnɔn nə́ bɔ Antiɔsi kiwi Pisidii gána nɛ ka Ikoniɔmu kiwi ni, ǹ nə́ zaman lɛ baã, ǹ nə́ kaa kunun ǹ dinin ni. Ǹ nə́ Pooli dɛ ka kɔlɔ nɛ mà a gã, bɛ kio, ǹ nə́ giɛraa ǹ nə́ woo daa kiwi lɛ lɛkoro-a, a giala maǹ nə́ goã taasɛ mà á gã. 20Sɛnɛ, Lawa-nyankɔlen bɛ́ ǹ nə́ daa n lɛ sɔkɔn a li, Pooli yii dɔraa á yoo á wɔ kiwi lɛ gɔ́ɔ̃ nɛ. A lɛawaa, a laanka Barnabaasi woo Dɛrbə kiwi.
Pooli laanka Barnabaasi a wusoo a wo piɛ
21Ǹ bɛ́ ǹ nə́ Boo Tii Kɔɔ̃n pɛ bɛa kiwi lɛ nɛ, min gigiã golee Lawa li. Bɛ kio, Pooli laanka Barnabaasi wusoo ǹ nə́ woo bɔ Listrə ka Ikoniɔmu ni ka Antiɔsi ni. 22Ǹ nə́ Lawa-nyankɔlen foo taã bɛa kiwin lɛn nɛ, ǹ nə́ ǹ nyankɔ mà ǹ nə n doa ǹ wo nyɛɛnɛ golee Lawa li gɔ́ɔ̃ nɛ. Ǹ nə́ pɛ ǹ nɛ, mà ǹsɛn doamaa nɛ ǹ nɔmaa gigiã bii wɔsɔ ǹ kiɛ̃, ǹ tɔn wɔ Lawa kiibaa ǹ bǎã lɛ nɛ. 23Lawa a sɔmɔ gogoonmaa nɛ, ǹ nə́ nyɛɛnaandɛnan bɔ ǹ nə́ ǹ koa minin mìi la, ǹ nə́ Lawa nyankɔ bɛ̀ ǹ nə́ n lɛ soɛ. Ǹ nə́ ǹ sii wɔ Dɛnaa din gɔn, ǹ bɛ́ ǹ nə́ golee Dɛnaa mɛn li.
24Bɛ kio, ǹ nə́ Pisidii gána wɔsɔ ǹ nə́ kiɛ̃, ǹ nə́ woo Panfilii gána nɛ. 25Ǹ nə́ Lawa a boo pɛ Pɛrɛgi kiwi, bɛ kio, ǹ nə́ woo Atalia kiwi. 26Ǹ nə́ yoo walan ǹ nə́ tà kuru ǹ goo saa ǹ nə́ n yɔrɔ dia Antiɔsi la. Bɛa kiwi kɛ lɛ din ni, ǹ nə́ ǹ kɔ Lawa a bǐɛ̃baa la, ǹ nya ǹ dí kɛ lɛ a lɛa.
27Ǹ bɛ́ ǹ nə́ dɔ Antiɔsi, ǹ nə́ Lawa a sɔmɔ minin lɛ sɔkɔn. Lawa sii mɛn din tumaa zɛnaa ǹ gɔn, ka bɛ dɔ nɛ, a n dɔ ǹ lɛ lɔn tɔrɔ kɔsɔn nə́ lɛ kɔ ǹ nə́ wɔ golee Lawa li ǹ zii kɛ nɛ, ǹ nə́ bɛ laakalaa. 28Bɛ kio, ǹ nə́ biikoo kɔ́n zɛnaa kun ka Antiɔsi kiwi a Lawa-nyankɔlen ne.
Currently Selected:
Nya ǹ dín 14: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
