Marki 10
10
Yezu boo mɛn da lɔ laanka giĩ a toɛ̃ kɔn-a wɔ gɔn la
(MAT 19.1-12; LUK 16.18)
1Yezu soo á n bɔ walan, á woo Zudee gána nɛ. Bɛ kio, á woo Zurdɛ̃ tà kio. Zaman gigiã daa n lɛ sɔkɔn a li walan dɔ nɛ, á goã ǹ darɛɛ doo ka a bɛ́ zɛnɛɛ lɛlɛ lɔn. 2*Fariziɛ̃n kɔnɔn nə́ n zɔ̃ ǹ nə́ dɔ a li, ǹ nə́ nɔ̀n da la mà ǹsɛn landa lɛ á lɛ koe min na a lɔ loo ya?
Maǹ nə́ bɛ pɛ ǹ tá n diɛ a gɔ́ɔ̃ li.
3Yezu tɔ́n nɔ̀n da ǹ dɔn la kɛnɛn: «Muizu na á landa mɛn kɔ kasɛn la lɔ-loo wɔ gɔn la bɔrɔ?»
4 #
TDP 24.1-4; MAT 5.31. Ǹ dɔn nə́ pɛ mà Muizu lɛ kɔ giĩ toɛ̃ kɔn-a ǹ sɛ́wɔ zɛnaa a kɔ a lɔ la a tɔn loo.
5Yezu tɔ́n pɛ ǹ nɛ:
– Ka dinin foo kakabaa na á toa, Muizu tɔ́n bɛa landa kɛ lɛ dɔ din kiɛ̃ á kɔ ka la. 6#SGK 1.27; 5.2. Bɛ̀ bɛ bie wa, haalɛ kanaa a giala kɔ waáraa, a kiɛ̃maa-n Lawa a boo ne mà «Lawa na á giĩ laanka lɔ zɛnaa.» 7#SGK 2.24. «Bɛ lɛ a lɛa nɛ giĩ á re n niɛ̃ a n bɔ ǹ di laanka ǹ dan ganaa, a n doa kɔn ka a lɔ nɛ, 8ǹ dinin paanan tá re n biɛ goon.» Bɛa yɔrɔ lɛ la, ǹ bie min paa doo wa, maǹ nə́ n baa goon. 9Bɛ lɛ taman yii, Lawa bɛ́ á màn mɛn doa kɔn, mà min kɔ́n nyan toa a bɛ toɛ̃ a bɔ kɔn wa.
10Ǹ bɛ́ ǹ nə́ woo ǹ nə́ dɔ kion, a kialandɛnan nə́ wusoo ǹ nə́ nɔ̀n dada la bɛa boo kɛ lɛ wɔ gɔn la. 11#MAT 5.32; KOR1 7.10-11. Á tɔ́n pɛ ǹ nɛ: «Bɛ̀ giĩ ná a lɔ loo yǎa a kɔsɔ saa, a na á sii naarɛ zɛnaa a lɔ bibinaa kɛ lɛ nɛ. 12Bɛ̀ lɔ dɔ́ nə́ n moɛ ǹ zuũ li á woo wɔ giĩ kɔsɔ li, a din goon ne, a dɔ na á sii naarɛ zɛnaa.»
Yezu barka mɛn da nɛnyaan bɔnboɛɛnɛn ganaa
(MAT 19.13-15; LUK 18.15-17)
13Minin nə́ daa ka nɛnyaanan nɛ Yezu li, mà a n gɔn da ǹ la. Sɛnɛ, a kialandɛnan nə́ yoo ǹ gialaa.
14Yezu bɛ́ á bɛ yɛ, a foo busu ǹ li, á pɛ ǹ nɛ: «Ka toa nɛnyaanan lɛn nə da ma li, ka baran ǹ kurəə wa. A giala, min mɛnɛn bɛ́ ka nɛnyaanan bɛ́ lɔn, *Lawa a kiibaa lɛ n bɛn wɔ lɛa. 15#MAT 18.3. Man pii ka nɛ ka boo taãn nɛ: Bɛ̀ min mɛn lɛ kɔ Lawa a kiibaa ǹ boo kɛ ganaa ka nɛnyaan bɛ́ lɔn wa, bɛa dɛnaa a re we wa.»
16Bɛ kio, á nɛnyaanan lɛn goa a gɔn, á n gɔn da ǹ googoonmaa la, á barka da ǹ ganaa.
Yezu nyin nyabaã boo mɛn da pàãman giĩ ni
(MAT 19.16-30; LUK 18.18-30)
17Yezu bɛ́ á mɛ zii la á n woe, giĩ goon baa si á daa kaa tán a giulun á nɔ̀n da la kɛnɛn: «Mìinaa sonbore, masɛ doamaa-n ma wàa zɛnaa ma tɔn nyin nyabaã yɛ?»
18Yezu tɔ́n pɛ nɛ:
– Wàa na á baa n tá masɛ bíi min sonbore? Bɛ̀ á n bɔ Lawa nɛ, min kɔ́n ba min sonbore lɛa wa. 19#BBN 20.12-16; TDP 5.16-21. Táa n tá Lawa a dí-pɛn lɛn doɛ̃: «N baran gɛ̀ dɛ wa, n baran naarɛbaa wa, n baran wurumubaa wa, n baran soɛ da min la wa, n baran n miãn bebele n nə ǹ koã wa, n nə n díi laanka n náa guguru kɔ.»
20Giĩ lɛ tɔ́n pɛ nɛ: «Mìinaa, má bɛa dí-pɛn kɛn lɛn tumaa tamaa haalɛ maa nɛnyaanbaa waáraa.»
21Yezu ga a ganaa ka kɔn-narɛɛ nɛ, á pɛ nɛ: «Sii goon nə n nyaabiɛ. Woo, n nə n gɔn màn tumaa sã, n na a wɔrɔ gii doobaan manɛ. Bɛ zɛnaa, n tɔn da kɔ masɛ kio lɛ. N tá re gɔn màn gigiã yii Lawa a piɛ.»
22Sɛnɛ, giĩ lɛ bɛ́ á bɛa boo lɛ ma lɔn, a yɔrɔ kɔsɛ. A yɔrɔ kɔsiɛmaa nɛ á woo, a giala, gɔn màn gigiã tá a lon.
23Yezu ga a kialandɛnan ganaa a paran li, á tɔ́n pɛ ǹ nɛ kɛnɛn: «Pàãman wɔ Lawa a kiibaa ǹ bǎã tá re kaka koe!»
24Bɛa boo lɛ kaãbaa da a kialandɛnan lɛn ganaa parsiini. Sɛnɛ Yezu wusoo á pɛ ǹ nɛ doo: «Ma dɔɔ̃nɔn lɛn, a wɔ á kaka dɛ! 25Nyɔɔmaa a wɔ mɛ́sɛn yala-n tá naanaa pàãma a wɔ Lawa a kiibaa ǹ bǎã-n nɛ.»
26Bɛa boo lɛ kaãbaa da a kialandɛnan lɛn ganaa doo á la yii ni. Ǹ nə́ tɔ́n pɛ kɔn nɛ: «Bɛ̀ á miɛ̃, die n boe la a kirisibaa?»
27Yezu ga ǹ ganaa ka gongon, á pɛ ǹ nɛ: «Minbuiin nɛ a boe la a n din kirisibaa wa, yǎa Lawa na a kirisibiɛ, a giala, Lawa n boe sii din tumaa la.»
28Piɛrɛ tɔ́n pɛ Yezu-n gɔrɔ: «Ga, wɔsɛn nə́ màn din tumaa toa walan wɔ́ kɔ n kio lɛ.»
29Yezu tɔ́n pɛ nɛ: «Man pii n ni, sonbore ne: Bɛ̀ min mɛn màn mɛn toa walan masɛ laanka Boo Tii Kɔɔ̃n kɛ taman yii, a kion ne, ǹ dɔɔ̃nɔn nɛ, ǹ dan laanka ǹ di ni, a nɛnyaanan nɛ, hinlaa a wuru ni, bɛ̀ ǹ dɛnaa bɛa mànan kɛn lɛn toa walan, 30á die bɛ din tumaa a laman paabiɛ yii: kionən ne, dɔɔ̃nɔn nɛ, náan nɛ, nɛnyaanan nɛ, ka wurun ni. Á die bɛn yii yii, a toa a yii n koo, á die nɔmɛɛ sɛn; biɛ̃, á die nyin nyabaã dɔ yii. 31#MAT 20.16; LUK 13.30. Sɛnɛ, pelo a nyɛɛnaandɛnaa gigiã á re kiodɛnan biɛ, pelo a kiodɛnaa gigiã dɔ á re nyɛɛnaandɛnan biɛ.»
Yezu a gɛ̀ laanka a yii kaa boo, a sɔɔbaa ǹ wɔ
(MAT 20.17-19; LUK 18.31-34)
32Bɛ kio, ǹ nə́ mɛ zii la ǹ nə́ woo Zeruzalɛmu. Yezu na á goã a kialandɛnan nyɛɛnɛ. A kialandɛnan yiri nə́ n lɔlɔkɔn. Ǹ nə́ goã koe lɛ, sɛnɛ, nyɛ́ɛ goã ǹ ganaa. Sii mɛn bɛ́ re n zɛnɛɛ nɛ kànaa ka boɛɛn nɛ, a ná a kialandɛnaa fulupaa lɛ kũ doo, á pɛ ǹ nɛ: 33«Haya, wɔ á ke woe Zeruzalɛmu, ǹ tá re Min a Nɛgiĩ koe Lawa a wúlu-bɔlen goledɛnan laanka landa sii-daraalin la. Ǹ tá re kiri kuri la, ǹ gɛ̀ dɔlɔ da a mìi ni, bɛ kio, ǹ kɔ min kooron la. 34Ǹ tá re yaa we a ganaa, ǹ sɛ̀ kaa a ganaa, ǹ duwəə ka sɛ̌n nɛ, ǹ dɛ a gã. Lɛawaa sɔɔ bɛ kio, a yii á die kiɛ.»
Zaaki laanka ZAÃ màn mɛn nyankɔ Yezu lon
(MAT 20.20-28)
35Bɛ kio, Zebedee a nɛgiĩ Zaaki laanka ZAÃ daa Yezu li, ǹ nə́ pɛ nɛ: «Mìinaa, wɔ bɛ́ re màn mɛn nyankoe n lon, wɔ n giɛ li n bɛ zɛnaa wɔsɛn manɛ.»
36Yezu tɔ́n nɔ̀n da ǹ la: «Ka ǹ giɛ li ma wàa mɛn zɛnaa ka nɛ?»
37Ǹ ná a lɛ si: «Bɛ̀ n kiibaa sonbore lɛ a biikoo dɔ, wɔsɛn man li n lɛ kɔ, wɔsɛn min goon giã n gusin, min goon giã n gɔsɛ.»
38 #
LUK 12.50. Sɛnɛ Yezu pɛ ǹ nɛ: «Ka bɛ́ màn mɛn nyankoe, ka a bɛ doɛ̃ wa. Ma bɛ́ re là-paparɛɛ laanka nɔmaa mɛn yii, ka á re boe la ka bɛ si ka ganaa?»
39Ǹ ná a lɛ si mà ǹsɛn tá boe la.
Yezu tɔ́n pɛ ǹ nɛ: «Ma bɛ́ re là-paparɛɛ laanka nɔmaa mɛn yii, ka dɔn tá re bɛ lɛ yii sɛn. 40Sɛnɛ min mɛn bɛ́ re giɛ̃ masɛ gusin hinlaa masɛ gɔsɛ, masɛ bie bɛ yɔrɔ boe wa, Lawa bǎãn lɛn zɛnaa min mɛnɛn manɛ, bɛa dɛnan wɔn manɛ.»
41A kialandɛnaa fù gialakunun lɛn nə bɛa boo lɛ ma lɔn gɔrɔ, ǹ foo busu Zaaki laanka ZAÃ li. 42#LUK 22.25-26. Yezu tɔ́n nə ǹ tumaa bíi, á pɛ ǹ nɛ: «Ka á doɛ̃ mà min mɛnɛn bɛ́, ǹ tá giɛ ǹ ganaa pàãdɛnan lɛa, mà bɛn man boe ǹ gána a minin yii ni, ǹ tá pàã nyɛɛ ǹ nɛ. 43#MAT 23.11; MAR 9.35; LUK 22.26. Sɛnɛ, bɛ doamaa bie a n zɛnaa ka bii wa. Bɛ̀ kaa min mɛn tá giɛ golebaa li, a doamaa nɛ a n baa kaa dí-nyali lɛa. 44Bɛ̀ min mɛn dɔ tá nyɛɛnaandɛnaabaa li, yǎa ǹ dɛnaa nə n din biɛ ka tumaa a bɛ̀rɛ lɛa. 45A giala Min a Nɛgiĩ dinmaa kɛ lɛ bie á daa mà minin nə dí nya-n wa, sɛnɛ, a na á daa di nya minin manɛ, á n din nyin kɔ minbuiin tumaa nyin si ǹ giɔ̀mɔ lɛa.»
Yii tere-a Bartimee yii buĩ boo
(MAT 20.29-34; LUK 18.35-43)
46Yezu laanka a kialandɛnan nə́ dɔ Zerikoo kiwi. Ǹ bɛ́ soe Zerikoo ǹ mɛn waáraa kun ka zaman gole ne, bɛ̀ yii tere-a goon tá giã-n tán zii para-a nyankoe: Tiimee a nɛgiĩ Bartimee ne. 47A bɛ́ á ma mà Nazarɛtin Yezu n kiɛ̃, á yoo á n lɛ dɛ: «Yezu, kii Davida tɔrɔ, makara bɔ masɛ ganaa!»
48Min gigiã yoo a gialaa, màn mɛn bɛ́ toɛ a n lɛ tã, sɛnɛ, á wusoo á màn da a lɛ-dɛ li: «Kii Davida tɔrɔ, makara bɔ masɛ ganaa!»
49Yezu tɔ́n golee á pɛ: «Ka lɛ dia la a daa.»
Ǹ nə́ lɛ dia yii tere-a lɛ la, ǹ nə́ pɛ nɛ: «N foo taã, n yoo n daa, Yezu á lɛ diɛ n la.»
50Bɛa bǎã-n gɔrɔ a ná a dɔnkɛ bɔ á zũ, á yoo bǎã goon ne, á woo Yezu li.
51Yezu tɔ́n nɔ̀n da la: «Ma n giɛ li ma wàa zɛnaa n nɛ?»
Yii tere-a lɛ ná a lɛ si kɛnɛn: «Mìinaa, ma yii bũ a wusoo a wɔlɔ yɛ.»
52Yezu tɔ́n pɛ nɛ: «Woo, n din a goleemali na á n kirisibaa.»
Bɛa bǎã-n gɔrɔ a yii boo la á wɔlɔ yɛ, á kɔ zii lɛ kun ka Yezu ni.
Currently Selected:
Marki 10: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
