Marki 11
11
Yezu n we Zeruzalɛmu
(MAT 21.1-11; LUK 19.28-40; ZAÃ 12.12-19)
1Ǹ bɛ́ ǹ nə́ dɔ *Olivie dan kele li kunu Bɛtfazee laanka Betaanii kiwi ganaa, ǹ nə́ diri Zeruzalɛmu la. Yezu ná a kialandɛnaa min paa dia a nyɛɛnɛ, á pɛ ǹ nɛ:
2– Kiwi mɛn bɛ́ ka nyɛɛnɛ, ka wo walan. Bɛ̀ ka dɔ lɔn gɔrɔ, ka á re dundun banɛɛ yii doa nɛ, min din tɔn dii la bɔrɔ wa. Ka fore ka da-n kànaa. 3Bɛ̀ min nɔ̀n da ka la mà wàa na á baa ka á fore, ka pɛ-n kɛnɛn: «Dɛnaa laadoo na a ganaa, á die wusii a dia n la sisia.»
4Ǹ nə́ tɔ́n woo, ǹ nə́ dundun banɛɛ lɛ yɛ doa-n kiɛnlɛ-a sɔmɔ-n zii gialaa, ǹ nə́ fore. 5Min mɛnɛn bɛ́ walan, bɛn tɛn nɔ̀n da ǹ la: «Wàa na á baa ka á dundun banɛɛ kɛ fore?»
6Yezu boo mɛn pɛ, a kialandɛnan lɛn nə́ pɛ ǹ nɛ miɛ̃, minin lɛn nə́ tɔ́n nə ǹ toa ǹ nə́ woo. 7Ǹ nə́ daa ka dundun banɛɛ lɛ nɛ Yezu li, ǹ nə́ ǹ mɔnaan kaa a dɔ̀ɔ̃ nɛ, Yezu dii á giã la. 8Min gigiã ná a mɔnaa nyɔmaa tán zii la, min tɛn dɔ́ luu buruu kuru don á naa tán zii la. 9#LOE 118.25-26. Ǹ bɛ́ woe, min mɛnɛn bɛ́ a nyɛɛnɛ, ǹ mɛnɛn dɔn bɛ́ a kio, maǹ nə́ goã ǹ lɛ dii ǹ nə́ pii: «Lawa da ka n bǐɛ̃ nɛ! Min mɛn bɛ́ ke die ka wɔa Dɛnaa tɔ nɛ, Lawa barka wɔ a nɛ! 10Wɔ di Davida a kiibaa mɛn tɔrɔ á ke die, Lawa barka wɔ a nɛ! Wɔ á fòo diɛ lon a Lawa nɛ!»
11Yezu dɔ Zeruzalɛmu, á kiɛ̃ á woo Lawa a kion, á ga màn tumaa ganaa a paran li. Bɛ kio, wasa bɛ́ re miɛ, a laanka a kialandɛnaa fulupaa lɛ soo ǹ nə́ woo Betaanii.
Yezu lɛn pɛpiã bíi gɔ́rɔ da mɛn li
(MAT 21.18-19)
12Bɛa lɛawaa ǹ bɛ́ soe Betaanii, bòo Yezu kũ. 13A bɛ́ tiãlɛa, á gɔ́rɔ da goon yɛ, luu ná a ganaa. Á woo ga a ganaa, mà kɔntan, mà asɛ á die nɛ yii la. A bɛ́ á woo á dɔ da lɛ li, á luu dinsɔɔ̃ yɛ a ganaa, a giala, a nɛ kɔ biikoo bie wa. 14Yezu tɔ́n pɛ gɔ́rɔ da lɛ nɛ: «Lawa baran toa n nɛ wɔ min lɛ-n doo ka duduu wa!»
A kialandɛnan lɛn ná a boo lɛ ma.
Yezu sii mɛn zɛnaa Lawa a kion
(MAT 21.12-17; LUK 19.45-48; ZAÃ 2.13-22)
15Ǹ bɛ́ ǹ nə́ dɔ Zeruzalɛmu, Yezu wɔ Lawa a kion, a ná a giala kɔ á pii-kɔlen laanka màn-piilin loo. Á wɔrɔ-lonkɔlen tabalan nyanaa á n lɛ kuməə tán, á zɛrɛkantoan-sãlin dankanan lɛ kuməə tán. 16A lɛ kɔ mà min kɔ́n màn kɔ́n saa a da bɔ nɛ Lawa a Kion a sumu-n wa. 17#IZA 56.7; ZER 7.11. Á tɔ́n minin daraa á pɛ ǹ nɛ: – A tá kiɛ̃-n Lawa a boo-n kɛnɛn: «Maa Kion lɛ n die n bíi mà tɔrɔ din tumaa a Lawa nyankɔ ǹ kion, sɛnɛ, kasɛn man biɛ wurumunun duru ǹ yala lɛa!»
18Lawa a wúlu-bɔlen goledɛnan laanka landa sii-daraalin bɛ́ ǹ nə́ bɛ ma, ǹ nə́ ga Yezu dɛ ǹ gɔn li. Ǹ nə́ goã nyɛ́ɛbiɛ nɛ, a giala, a daraa lɛ zaman lɛ din tumaa kũ.
19Wasa bɛ́ á mɛ Yezu laanka a kialandɛnan nə́ soo ǹ nə́ n bɔ kiwi doo.
Yezu boo mɛn da gɔ́rɔ da gere wɔ gɔn la
(MAT 21.20-22)
20A lɛawaa baayɛlɛ yiisoon ne, ǹ bɛ́ kiɛ̃ zii la, ǹ nə́ gɔ́rɔ da lɛ yɛ. Á saa a lon-a á laa yǎa a gòonən ganaa. 21Sii mɛn bɛ́ á n zɛnaa, Piɛrɛ yiri gisĩ a nɛ, á tɔ́n pɛ Yezu ni: «Mìinaa, n lɛn pipiã bíi da mɛn lɛ li, ga a ganaa, a tumaa laa ka kaka!»
22Yezu tɔ́n pɛ a kialandɛnan lɛn manɛ: «Ka golee Lawa li. 23#MAT 17.20; KOR1 13.2. Man pii ka nɛ sonbore ne: Bɛ̀ min mɛn golee Lawa li, ǹ dɛnaa á boe la a pɛ kele kɛ din ni mà a yoo a n bɔ kànaa, a wo n dɔ yìsi mu gole li, bɛ̀ á golee li ma pɛ lɔn, á die n zɛnɛɛ miɛ̃, bɛ̀ á n gɔ́ɔ̃ baa goon, a nə n zɛnɛɛ nɛ. 24Bɛ lɛ na á toa ma á pii ka nɛ: Bɛ̀ ka á màn mɛn nyankoe Lawa lon, ka golee li ka á re yii, bɛa màn lɛ á die n koe ka la. 25#MAT 6.14-15. Bɛ̀ ka golee lon ka á Lawa nyankoe, a da yaa sii tá ka laanka min bii, ka toa ǹ dɛnaa nɛ, màn mɛn bɛ́ toɛ ka Di Lawa ka dɔn sii baraan toa ka nɛ.
[ 26Sɛnɛ bɛ̀ ka a ka miãn sii baraan toɛ ǹ nɛ wa, ka Di Lawa a die ka dɔn sii baraan toɛ ka-n wa.]»
Yezu a pàã lɛ n boe maa?
(MAT 21.23-27; LUK 20.1-8)
27Ǹ nə́ wusoo ǹ nə́ woo Zeruzalɛmu. Yezu bɛ́ n bibiĩ Lawa a kion, Lawa a wúlu-bɔlen goledɛnan nə́ daa a li kun ka landa sii-daraalin ni ka Zuifun goledɛnan nɛ, 28ǹ nə́ nɔ̀n da la: «Ma n bɛa siin kɛn lɛn zɛnɛɛ ka wàa pàã nɛ? Die na á ǹ zɛnaa ǹ pàã kɔ n la?»
29Yezu tɔ́n pɛ ǹ nɛ: «Masɛ dɔ́ n die nɔ̀n goon diɛ ka la, bɛ̀ ka a binyəə kɔ ma la, min mɛn bɛ́ á siin lɛn zɛnaa ǹ pàã kɔ ma la, ma á die bɛa dɛnaa pii ka nɛ. 30Lawa na á ZAÃ dia hinlaa minbuiinin man nə́ dia mà a da *batɛmu da minin ganaa? Ka a binyəə pɛ ma nɛ.»
31Ǹ dinin nə́ liere kɔkɔ kɔn bii ni, ǹ nə́ pɛ kɔn nɛ:
– Bɛ̀ wɔ́ pɛ wáa Lawa na á dia, a n die nɔ̀n diɛ wɔ la kɛnɛn: «Wàa na á baa ka waa a boo la wa?» 32Bɛ̀ wɔ́ pɛ wáa minbuiinin man nə́ dia, haya...!
Ǹ nə́ goã nyɛ́ɛ biɛ zaman lɛ nɛ, a giala, min tumaa n taasɛ mà ZAÃ n Lawa a boo gii-dali lɛa taãn-taãnɛ.
33Ǹ nə́ tɔ́n pɛ Yezu ni mà ǹsɛn ba doɛ̃ wa.
Yezu tɔ́n pɛ ǹ nɛ: «Bɛ̀ ka a doɛ̃ wa, min mɛn bɛ́ á siin kɛn lɛn zɛnaa ǹ lɛ kɔ ma la, ma dɔ a bɛa dɛnaa pii ka-n wa.»
Currently Selected:
Marki 11: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
