Marki 12
12
Yezu boo giməə mɛn da wuru-lɛduə̃li babaraan wɔ paǹ li
(MAT 21.33-46; LUK 20.9-19)
1 #
IZA 5.1-2. Bɛ kio, Yezu boo giməə da ǹ nɛ, á pɛ:
– Giĩ goon na á wuru bɔ, á da nɛ-kɔle zumu a nɛ, a tɔ mà rezɛ̃, á kungɔn dɔ a ná a lɛnpɛnɛ nɛ, a ná a nɛ mu bɔɔ̃ ǹ yala fɔ̃, a ná a lɛduə̃lin kion dɔ. Bɛ kio, á dí-nyalin goa á ǹ kaa nɛ, á tɔ́n woo zii ni. 2A da nɛ a ma waáraa bɛ́ á dɔ, á dí-nyali goon dia mà a wo wuru dí-nyalin lɛn li, mà ǹ na asɛ a da nɛ gii kɔ la a da nɛ. 3A bɛ́ á woo, ǹ nə́ kũ ǹ nə́ duduwəə, ǹ nə́ loo ǹ nə́ dia ka a gɔn kooro ne. 4Wurudɛnaa tɔ́n dí-nyali goon dɔ dia, ǹ nə́ bɛ dɔ dɛdɛ a mìi ganaa, ǹ nə́ sɔ kakaa la. 5Á wusoo á goon dɔ dia doo, ǹ nə́ nɔmaa ǹ nə́ bɛ dɛ á gã. Ǹ nə́ dí-nyali lɛ gigiã baa miɛ̃, ǹ nə́ ǹ tɛn duduwəə, ǹ nə́ ǹ tɛn dɛ ǹ nə́ gã.
6Wurudɛnaa lɛ a nɛgiĩ dinsɔɔ̃ na á goã sisia, a min lɛa goon toto, a n bɛ lɛ narɛ parsiini. Nyɔɔbaa á bɛ lɛ dia ǹ li. A na á goã taasɛ mà bɛ bɛ́ asɛ a nɛ lɛa mà ǹ tá re nyɛ́ɛ biɛ bɛ-n sɛn. 7Sɛnɛ wuru dí-nyalin lɛn bɛ́ ǹ nə́ yɛ die, ǹ nə́ pɛ kɔn nɛ kɛnɛn: «Haya, a kíɛ̃-saali lɛ á ke. Ka daa wɔ dɛ, wuru lɛ goã wɔa wɔ lɛa.» 8Ǹ ná a nɛgiĩ lɛ kũ ǹ nə́ dɛ, ǹ ná a gere saa ǹ nə́ woo daa wuru lɛ kio.
9Yezu tɔ́n nɔ̀n da ǹ la:
– Wuru lɛ a dɛnaa n die wàa-n zɛnɛɛ kəni? A n die woe wuru dí-nyalin lɛn gialaa, a ǹ dɛ ǹ gã, a na a wuru lɛ koa min kɔsɔn li. 10#LOE 118.22-23. Sàabaa ba la wa, ka boo kɛ pɛ Lawa a sɛ́wɔ-n wa? A n pii:
«Kion-dɔlen bɛ́ ǹ nə́ n piã ka kɔlɔ mɛn nɛ,
bɛ lɛ na á kɛ gùrù dɔ ǹ kɔlɔ baa.
11 Dɛnaa Lawa na á bɛa kaãbaa ǹ dí kɛ nya,
wɔsɛn yii na á bɛ lɛ yɛ.»
12Zuifun goledɛnan nə́ ga Yezu kũ ǹ gɔn li, a giala, ǹ nə́ dɔ̃ mà a na á bɛa boo giməə lɛ da ǹsɛn ganaa. Sɛnɛ, ǹ bɛ́ ǹ nə́ goã nyɛ́ɛ biɛ zaman lɛ nɛ, ǹ nə́ toa walan ǹ nə́ woo.
Nyin giɔ̀mɔ saraa
(MAT 22.15-22; LUK 20.20-26)
13 *Fariziɛ̃n laanka min mɛnɛn bɛ́ kii Erɔdi a pàã li, ǹ nə́ bɛn kɔnɔn dia Yezu li, mà ǹ wo a lɛ zulu, ǹ gɔn da a ganaa ka a din lɛ gɔ́ɔ̃ ǹ boo ne. 14Ǹ nə́ woo ǹ nə́ nɔ̀n da la kɛnɛn: «Mìinaa, wɔsɛn tá doɛ̃, wáa n tá sonbore pii, minbuiinin bɛ́ màn mɛn taasɛ, n ba nyɛ́ɛ biɛ bɛ-n wa, a giala, n ba minin bɔkɔnlɛ we wa, sɛnɛ, ma n minin darɛɛ Lawa a zii ganaa ka peperebaa nɛ. Á siĩni wɔ nyin giɔ̀mɔ saraa Rɔmun kii gole gole la hinlaa, wɔ baran saraa wa?»
15Sɛnɛ, Yezu bɛ́ á dɔ̃ mà sii kɔsɔ tá ǹ gɔ́ɔ̃ nɛ, á pɛ ǹ nɛ: «Wàa na á baa ka á n diɛ ma gɔ́ɔ̃ li? Ka da ka wɔrɔ we goon ne, ma ga a ganaa.»
16Ǹ bɛ́ ǹ nə́ daa nɛ, Yezu nɔ̀n da ǹ la: «Die mìi nyin laanka die tɔ n kiɛ̃-n la?»
Ǹ ná a lɛ si mà Kii Gole wɔ nɛ.
17Yezu tɔ́n pɛ ǹ nɛ: «Màn mɛn bɛ́ Kii wɔ lɛa, ka bɛ kɔ Kii la. Màn mɛn dɔ bɛ́ Lawa wɔ lɛa, ka bɛ kɔ Lawa la.»
Bɛa boo lɛ kaãbaa da ǹ ganaa parsiini.
Nɔ̀n mɛn nə n da geren yii kaa wɔ paǹ li
(MAT 22.23-33; LUK 20.27-40)
18 *Sadusɛɛ̃n man nə́ goã pii mà geren yii a re kiɛ wa. Ǹ kɔnɔn nə́ daa Yezu li, ǹ nə́ nɔ̀n da la, ǹ nə́ pɛ:
19 #
TDP 25.5-6. – Mìinaa, Muizu na á landa kɛ kɔ wɔsɛn la, á pɛ: «Bɛ̀ giĩ mɛn gã, a ná a lɔ toa walan a ná a nɛ yɛ a ganaa wa, ǹ dɔɔ̃n doamaa nɛ a bɛa lɔ giɔɔrɔ lɛ saa a nɛnyaanan yɛ a ganaa, ǹ dɔɔ̃n papaã wole lɛ wɔn lɛa.» 20Ga, nɛgiĩ sɔbaa na á goã lɛlɛ. Ǹ goledɛnaa lɔ saa, a nɛ yɛ a ganaa wa, á gã á toa walan. 21A paabaa ǹ wɔ lɔ lɛ saa, bɛ dɔ́ gã a nɛ toa a kio wa. A sɔɔbaa ǹ dɔn wɔ na á n baa miɛ̃. 22Ǹ sɔbaamaa lɛ tumaa gã, ǹ kɔn nɛ yɛ lɔ lɛ ganaa wa. Bɛ kio lɔ lɛ dɔ́ gã. 23Geren yii kaa pinaa, bɛ̀ geren yii á re kiɛ sonbore, lɔ lɛ n die goɛ̃ die wɔ lɛa? A da yaa, ǹ sɔbaamaa yii saa lɔ lɛa.
24Yezu tɔ́n pɛ ǹ nɛ: «Ka a doɛ̃ mà ka dinin manə n dinin siɛ̃ wa? A giala, ka a Lawa a boo giala miɛ wa, ka a doɛ̃ dɔn mà pàã tá Lawa lon wa. 25Ka dɔ̃, bɛ̀ geren yii kaa ǹ mɛn pinaa, giĩ a re lɔ siɛ wa, lɔ dɔ a re we giĩ li wa, sɛnɛ, ǹ tumaa n die goɛ̃ ka Lawa a piɛ a dia dí-a wolen bɛ́ lɔn. 26#BBN 3.6. Geren yii kaa wɔ paǹ li, tɛ yoo daãn mɛn ganaa Muizu ná a boo da a sɛ́wɔ nɛ, ka bɛa bǎã kɛ lɛ pɛ sɛ́wɔ lɛ-n wa? A na á n kiɛ̃ walan mà Lawa na á pɛ Muizu ni, ǹ digolon wɔ paǹ li mà asɛ n Abrahamu a Lawa lɛa, Izaaki a Lawa lɛa, Zakɔba a Lawa lɛa. 27Ma bie geren Lawa lɛa wa, bɛ n nyɛɛ mà bɛa minin kɛn lɛn ǹ nə́ gã lɛlɛ mà ǹ yii á koo sisia. Bɛ lɛ tɔ ganaa, ka sã parsiini.»
Dí-pɛ lɛ mɛn a sii n kaka á la ǹ miãn manɛ?
(MAT 22.34-40; LUK 10.25-28)
28 #
LUK 10.25-28. Landa sii-daraali goon nə́ ǹ lɛ ma liere koe kɔn. A bɛ́ á yɛ mà Yezu boo binyəə sonbore kɔ Sadusɛɛ̃n la, a dɔ nə́ n zɔ̃ á dɔ a li á nɔ̀n da la kɛnɛn: «Dí-pɛ lɛ mɛn a sii n kaka á la ǹ miãn tumaa nɛ?»
29 #
TDP 6.4-5. Yezu tɔ́n pɛ nɛ:
– Dí-pɛ mɛn a sii bɛ́ kaka á la ǹ miãn manɛ, bɛ n ka kɛ nɛ: «Izirayeli minin lɛn, ka n too kɔ: Dɛnaa, wɔa Lawa lɛ n Dɛnaa Lawa lɛa, goon toto. 30N Lawa, Dɛnaa Lawa narɛ ka n foo tumaa nɛ, ka n gɔ́ɔ̃ tumaa nɛ, ka n pàã tumaa nɛ.» 31#LWS 19.18. Dí-pɛ lɛ a paabaa ǹ wɔ mɛn a sii bɛ́ kaka, bɛ n ka kɛ nɛ: «N miã kɔsɔ dɔ narɛ ka n bɛ́ n din narɛ lɔn.» Dí-pɛ kɔ́n banban á n kaka á la bɛa màn paa kɛ-n wa.
32 #
TDP 4.35. Landa sii-daraali lɛ tɔ́n pɛ Yezu ni: «Sonbore ne, Mìinaa! N màn mɛn pɛ, sonbore ne. Lawa goon toto na a tan wɔa Dɛnaa lɛa, bɛ̀ á n bɔ bɛ lɛ nɛ, kɔsɔ banban. 33#OZ 6.6. Bɛ lɛ na á toa, min doamaa nɛ a Lawa narɛ ka a foo din tumaa nɛ, ka a yiri din tumaa nɛ, ka a pàã din tumaa nɛ, a doamaa nɛ a ǹ miã kɔsɔ dɔ narɛ ka a bɛ́ a din narɛ lɔn. Bɛ á soɛ parsiini á la *wúlu màn tiɛ̃ laanka wúlu tɔrɔ kɔsɔn tumaa nɛ, ǹ bɛ́ ǹ mɛnɛn koe Lawa nɛ.»
34Yezu bɛ́ á yɛ mà á boo da ka yiridɛnaabaa nɛ, á tɔ́n pɛ nɛ: «N laanka *Lawa a kiibaa ǹ bǎã wɔlɔ a sɔsɔɔ kɔn ganaa wa.»
A n bɔ bɛ-n lɔn, min kɔ́n yii wɔ á nɔ̀n da la doo wa.
Krita a Davida tɔrɔ baa giala na á saa lɔn?
(MAT 22.41-46; LUK 20.41-44)
35Yezu bɛ́ minin darɛɛ Lawa a kion, á nɔ̀n da ǹ la kɛnɛn:
– Wàa na á baa landa sii-daraalin tá pii mà Minin Nyin-sili lɛ n kii Davida tɔrɔ lɛa? 36#LOE 110.1. A giala, Davida dinmaa na á pɛ ka Lawa a Yiri Fu barka-n kɛnɛn:
Dɛnaa Lawa pɛ maa Dɛnaa nɛ:
«Giã ma gusin,
yǎa ma gɔ̀lɔ̀baa lɛ piɛ̃ koe n la,
n zɔ́ɔn nə die kiɛ tán n gòãn giulun.»
37Davida dinmaa lɛ n bíi mà «asɛ a Dɛnaa.» A n siɛ lɔn ǹ tá taasɛ mà Minin Nyin-sili n Davida tɔrɔ lɛa dɔn?
Yezu gɔn-waa mɛn wɔ landa sii-daraalin wɔ paǹ li
(MAT 23.1-36; LUK 20.45-47)
Zaman gigiã goã n too koe Yezu a boo lɛ ganaa parsiini. 38A na á goã pii minin manɛ a daraa lɛ gɔ́ɔ̃-n kɛnɛn: «Ka n parabaa ka landa sii-daraalin kɛn nɛ, bibiə̃ n kɔɔ̃nɛ ǹ ganaa ka dɔnkɛ sɔsɔrɔn nɛ, maǹ giɛ li minin nə guguru kɔ ǹ fòo da ǹ nɛ zaman bǎã nɛ. 39Bɛ̀ ǹ nə́ woo lɛsɔkɔn kion, bǎãn mɛnɛn bɛ́ yii, bɛn lɛn giãman nə kɔɔ̃nɛ ǹ ganaa. Màn-bii dadara bǎãn nɛ, giã ǹ bǎã sonboren man kɔɔ̃nɛ ǹ ganaa. 40Maǹ mɛnɛɛ lɔ giɔɔrɔn la ǹ tá ǹ gɔn màn yii sii ǹ la, ǹ wusoo ǹ wo Lawa nyankɔ ǹ belebɔ la, ka ǹ sii zɛnaa wa. Ǹ nɔmaa dɔ n die gole koe a kɔnpɛ ka ǹ zɛnaa ǹ siin ni.»
Lɔ giɔɔrɔ màn mɛn kɔ Lawa la
(LUK 21.1-4)
41Bɛ kio, Yezu giã tán Lawa gɔ ǹ wɔrɔ kaa ǹ goo yɔrɔ-a, á ga minin wɔrɔ da goo ne ǹ gɔn ganaa. Pàãma gigiã wɔrɔ gole da a nɛ. 42Lɔ giɔɔrɔ doobaa goon daa á wɔrɔ we bisin paa kaa a nɛ, bɛa wɔrɔ lɛ a kiɛ̃ taman goon la wa. 43Yezu tɔ́n a kialandɛnan bíi, á pɛ ǹ nɛ: «Man pii ka nɛ sonbore: Lɔ giɔɔrɔ doobaa kɛ màn mɛn da a nɛ, á la min din tumaa wɔ nɛ. 44A giala, gialakunun kɛn maǹ nə́ màn bɔ ǹ gɔn màn gigiã kɛ nɛ, ǹ nə́ da goo lɛ nɛ. Sɛnɛ, lɔ kɛ sɛ na á ná a doobaabaa ǹ wɔ din tumaa saa á da a nɛ, a bɛ́ n din toe ka màn mɛn nɛ ke lɛn.»
Currently Selected:
Marki 12: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
