Gênesis 42
42
José Molene Egito Tshijne Rapojyawakna Piranapni
1Waneya rimaxinixka Jacó rawatka honantshi Egito tshijne wla htshinna hwuhenene:
— Haklu tshinanhe hyopukhakakachata hixkakluko?
2Waneya wla htshina:
— Nyijnakpiranyehitlu Egito hima rawa honantshi. Wanetshi hyanu, hanjitapanru honantshi wanna yehiya wma mupniywakanupa seyni wiwejyawakapa.
3Waneya hserpikamtna dez moletkakatshine José molene, honantshi ranjitapyawakapna Egito tshijneya.
4Seyni Benjamim, José hepuru, hi hyokanata Jacó Benjamim moleneyma klu tshinanu wane htshina: Hma mahijewniywakanupa.
5Hiyáhoni Israel whenene pimrine honantshi hanjitapatshineymana hyana klu tshinanu Canaã tshijne rawatka natshi tsru potuko.
6José Egito tshijne hajene towutatshri hiyáhoni walekni honantshi hichanjiyna ptowru tshijne hajeneka. Waneya José molene hapoka, hyoptsojityehitluna hihojna tshiji rutspakna.
7José hexinixkana himolene rimathetna seyni hi runkakna. Riynumatna pokteru tokantshi, repomhiyna wla htshina:
— Hanhe hichpajya?
Ruhitluna:
— Canaã tshijne wuchpajya honantshi wanjitapa.
8José himathetna himolene seyni wanna hi himathetlu.
9José hichinkaplu rupnawle wanna tshinanu hiyáhoni wla htshinna:
— Hixa jimaxikoklerunhi hiyáhoni wkata hina hexyawakaplu hanu sreta hi wuslahya.
10Seyni wanna wla tshinru:
— Hike, wutsrukate, seyni wkata wuna honantshi wanjitapa.
11Hixa ptowrunekwu satupka jeji whenenwu. Hixa ptowutjenwu jejinwu mayloklenwu hi jimaxikoklerunwu.
12Seyni José wla htshinna:
— Hike seyni wkata hina hexyawakaplu hanu sreta hi wuslahyalu tshiji.
13Seyni wanna hihitlu José:
— Ptowrerunwu hixa. Hixa doze moletkakatshinwu jejine, satupka jeji whenenwu, Canaã hajerni. Hepurtshi hituka wuruyma hiyrunu satni hamhanatka.
14Waneya José wla tshinna:
— Hi he wane potuko ntshinatkahi, hixa jimaxikoklerunhi.
15Hiyáhoni netumhanhi hanu hixatshinhi. Faraó hiwaka tshinanu hi hichpakanatka hmapokkanuklunupa hepuru hewi.
16Sat-hixa nyokanatanu rawapyawakaplu hixa mole hepurtshi; seyni hixa pimrinhi preso hyanu rimaxikowaka hixa tokanu ho halikaklahe htshina. Hweyawaxini phuru Faraó hiwaka tshinanu jimaxikoklerunhi halikaka.
17Waneya José map-hohne preso rutakna wanna ptowruneka.
18Waneya map-hohne rixinri José wla tshinna:
— Xye hkamhanu, hiwekanu klu tshinanu Hoyakalu kahwakpiratatshrino hita.
19Hixa jejinhi mayloklene hixini, satkaka hixa hewi hitukanu preso yehi seyni hixa pimrinhi hyanu, honantshi hanikanu hixapjikaka hajene tshinanupa, natshitatshine tshinanu.
20Hma mupniywakanupa hanikanwakatanno hixa mole hepurtshi rimaxikowaka ho halikaklahe hixa tokanu.
— Haté hehe, wane wixanu, wwapanru. — htshinna.
21Waneya htshinyawaka hyinuwak-kamhaletatkana, wla htshinkakna:
— Hixa halikaka majnakowatatshinwu wimolni wkamnireru tshinanu, klu tshinanu hix-mitshi hetlu hi pa kaheknanukananu rixa wimole ranjitmakwu mitshi wuchoxyawakaplu seyni hi wepixlu. Hiyáhoni xawakni xye tshinanu xye hektutu hakanhayehitatkawu.
22Waneya Rúben yanumatatka wla htshinatkana:
— Hi he hitamka hiykotatkahi mitshi hektuntshi hma mkamhiywakanuplu mturu? Seyni hixa hi kajnakotkahi mitshi. Hiyáhoni xawakni wwenutanru waleni hraha.
23José hiynumaxinna tokantshi yokakatshriyma tsonu riynumaxyana. Hiyáhoni hi rimatatkana José himatjematkalu htokanna.
24Waneya José hiprotakatka ratjini sreta hyihatatka waneya htshiyahatatka. Waneya wanna sreta ruprotakatnaka riynumatatkana waneya himolna Simeão tshinkaluru hnuretatka. Wanna hetanuko rostukjixatkalu.
José Molene Canaã Tshijne Nwaka Hsatojyawakapna Piranapni
25Waneya José h-saco-nena htsepotakjixlu chiji hiyrun-koxa htowutna satkaka yineru saco-te rutajyawakapluna htiyirotna. Htowutna hitaphalna renejikowakapna hnikamtanrupna. Waneya wane potuko rixkana.
26Waneya honantshi hiprane jumento-ne hwunutna waneya hyatkana.
27Waneya satu wanna kotpuka-saco-neta hipra jumento rohluxyawakapa himkawaka yehiya. Waneya retlu htiyirote saco hruko twiywaka.
28Waneya himolene runkaklu, wla htshina:
— Ye, ntiyirotekta hsatkajyahonukno klu tshinanukta n-saco-ne hrukoko twa ntiyirote.
Waneya rutukhajpiratna, tsru piklu rixna wla htshinkakna:
— Kluhe wla rimixwu Hoyakalu?
29Waneya hyamtna rapokluna rurna Jacó yehi Canaã tshijneya. Ptowru potuko ruknohjerna pirana runkakluna.
30Wla htshinruna:
— Jeji, wale tshijne towutatshri yanhakwu. Hixa jimaxikoklerunwu hkahwakwu hiyáhoni wane hima wyatka wexyawakaplu hanu sreta hi ruslahyana.
31Seyni hixa wla tshinru:
— Hixni hi jimaxikoklerunwu. Hi wuna wkata wexyawakaplu hanu sreta hi hislahyalu tshiji.
32Hixa doze moletkakatshinwu jejine, satupka jeji whenenwu, Canaã tshijne hajerni. Hepurtshi hituka wuruyma hiyrunu satni hamhanatka.
33Waneya jeji wale tshijne towutatshri wla tshinwu:
— Rimaxikowaka hixa tokanu ho halikaklahe htshina satu himole hiknokamtanu hewi hitayma hixa pimrinhi honantshi hanikanu hixapjikaka hajene tshinanupa, wane hixatshinhi yanutka.
34Hwapanru hixa mole hepurtshi, wale hanikanu hita nwaka. Wane hixatshinephi nimathetanhi jimaxikoklerune hmixyawakanu seyni halikaka jejinhi mayloklenhi. Waneya hixa mole nsatkakajinhi, hmaronewatanu xye tshijneya.
35Waneya ripkakamxiniklunruna h-saco-nena satkaka wanna hikchiklu htiyirotna poyitkaluru h-saco-neyna. Waneya htiyirotna poyitkaluru rexinixkana wanna hiyrun-koxa rurna rexinixkalu hpikna.
36Waneya rurna Jacó wla tshinna:
— Hita hamtakawhenkaka. José-ni hamhanatka, Simeão-ni koxa hamtajyatkano hiyrun-koxa xawakni Benjamim haluka hanikletatnaka. Xyekaka ptowruka kamnitno.
37Waneya Rúben yanumatatka wla htshinru ruru:
— Palujini nowhenene hepi puylatanu Benjamim nma misatkapkanuklunupa pix-yehi. Hita hislahle putakanru hit-halikaka hisatojinyi pixa nwaka.
38Waneya wla htshinru:
— Noturu hi hixaymaplu klu tshinanu himoleni hipnatka hiyáhoni walepkani. Rahijewninipa hatnu hapoya klatajiwuruknotshi hipuktshi nwaka yanu tsru wamontshiyma.
Currently Selected:
Gênesis 42: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
