João 13
13
Jesus Herokajixixyawakna Rasruklene Piranapni
1Tsru niklu hohne Páscoa tshinkaluru hohne wkatanu Jesus himatatka rapokatka hipapkolutka xye tshijne ruchpajyawakapa, Ruru Hoyakalu nwaka hyiywakapa. Ruchinikatkana yine walenune xye tshijne hwatshine. Ruchinikhohnekanatna rupninri hohne potuko.
2Jesus hiyrunu rasruklene hali nikletatka. Kamtshi koxa hali hitakahchinikanretatkalu Simão whene, Judas Iscariotes tshinkaluru, Jesus rekhixyawakapa hkamnitjeneya.
3Jesus himatatkalu ptowru potuko reneklu Ruru Hoyakalu htowuxyawakapa Jesus. Hiyrun-koxa Jesus himatlu Hoyakalu yehi hichpajikatshrini hiyrun-koxa Hoyakalu nwaka yatshripni wale.
4Waneya nikjexikowaka yehi hpalniyatka. Himkalu roho hajeru kahnete rutaklu. Satu cheymanepi hkochtsheka. Rostuptshijita.
5Waneya wane pnute bacia rutakhatlu honha waneya hyinuwaka herokajixletna, rasruklene hiyrunu cheymanepi hiptshiji hostutatshri hcheyijixixyana.
6Waneya Pedro-stsi rapoka. Pedro wla tshinru:
— Tsru Hixikatshriwa peroka jixitenohe?
7Waneya Jesus wla tshinru:
— Nkamhanru hi pimatjema xawakni seyni xekoyakpatka pimatjemanru.
8Waneya Pedro wla tshinru:
— Pixa hikeklu perokajixitanno hita.
Waneya Jesus hihitlu, wla htshinru:
— Nma merokakanuklunupyi hi psojikna hit-yehi pwini.
9Waneya Pedro wla tshinru:
— Tsru Hixikatshriwa hi nojixi tsonu perokanu seyni perokanru nomyo koxa hiyrun-koxa nojiwu.
10Waneya Jesus wla tshinru:
— Hijixi tsonu herojikalurutka. Wan-hixatshri powratka psoluka. Hixa powralunhi seyni satu hixa tsonu hi powra.
11Klu tshinanu wale honra himathetatkalu rekhitjerupa. Hiyáhoni wale tshinanu wane htshina, “Satupkahi hi powra.”
Han-hixatshrihe Yineru Potu Tsru Hixyawaka Piranapni
12Waneya Jesus rali herokajixletatkana, himkalu roho hajeru rawatka, htuplatatnaka. Waneya wla htshinna:
— Himatjemluhe klu kamrurtshi nixhi?
13Hixa wan-tshinjetno, Kasruklewakleru ho Tsru Hixikatshriwa htshinno. Kihleru, wane potuko htshinno klu tshinanu halikakni, wan-hixatshrino.
14Hita, Kasruklewaklerno hiyrunu Tsru Hixikatshriwano nerokajixithi hix-koxa hijhalu herokajixkajyawaka, nixakanaxyawakhi pixka.
15Klu tshinanu satu hyimlerupa nekhithi hixa. Hiyáhoni hix-yinhi haluka wan-hixletna pimrine hita hixyawakatkahi pixka.
16Halikakni, halikakni wane ntshinhi, Towrertshicha hi htowutjeru yohnik-himukatatshrini wale. Hiyrun-koxa yokanatkaluru hi hyokanatjeru yohnika tsruni wale.
17Xyekaka pirana himatatshri, kihle hchinikanurupni xyekaka hasrujikolu hkamhini.
18Seyni hi hixa ptowruneka nkochtsheka wane ntshinini. Klu tshinanu nimatna nnurrene hanu hixatshinetkani. Hoyakalu tokanu yonatkaluru tshinyawaka hpoyahokajyawakapa tshinanni. Wla htshina yonatkaluru: “Hitayma nijittshi nikatshri pnut-hohne hkamnitanno.”
19Hiyáhoni nunkakhapkathi rakanhinipa ntshinyawakhi pirana, halixyawakapno hita nixyawaka.
20Halikakni, halikakni ntshinhi, Katuktako yoptoxinri nyokanatanru hit-koxa hyoptotatka. Hiyrun-koxa nyoptojerupa nyokanatjeru koxa hyoptotanu.
Jesus Hinkaklexyawaklu Satu Rasrukleruko Kamnixyawakaplu Piranapni
21Waneya Jesus hali wan-tshinretatka hkojwakahchinikanuxnawa waneya ruphujetpotutlu wla htshina:
— Halikakni, halikakni wane ntshinhi, satu hixa nkamnitjene hekhitanno.
22Waneya rasruklene yopukhakaka, hi rimatahchinikanutna katu pirana hkochtsheka.
23Wanekananru satu Jesus hasrukleru, ramotleru potuko, Jesus sta hinaple hikoluhatshri.
24Waneya Simão Pedro hitsejrihjeta Jesus-stsi hikoluhatshri repomhiywakaplu Jesus katu piranrahe hkochtsheka.
25Hiyáhoni Jesus sta rutspanopotutatka waneya repomhalu Jesus, wla htshina:
— Tsru Hixikatshriwa, katu piranhe ptshina?
26Waneya Jesus wla tshinru:
— Walepakni hijpa pão yotshmoluru psoji nenekanu.
Waneya pão psoji hyotshmota. Waneya Simão whene, Judas Iscariotes tshinkaluru reneklu.
27Pão yotshmoluru hnika waneya chinpotukawa Satanás kamtshi jihloklu. Waneya Jesus wla tshinru:
— Wuya pkamhalerupa pkamhahapkatanu.
28Hetanu, hi satukna yineru nikawakakwa hwakanatatshine himatlu klu pirana hkochtsheka Jesus wane htshininri Judas.
29Klu tshinanu satkaka wanna kahwaklu Jesus hanjikjixlu pa hixanu hmahaxinrina tsru niklu tshinanupa ho tiyiro renekakjixlu hike mwikane, klu tshinanu Judas tshinkaluru honukla hinotjekanatlo tiyiro mapa yehi.
30Hiyáhoni rali yoptolexinixkalu pão psoji, hyatka. Hoyetshnotkani.
Herotu Towrexikolu Piranapni
31Waneya rali yalexinixka Judas, Jesus wla tshina:
— Xawaknitka Jeji Whene tshinkaluru hoyaknu hiphujetka. Hiyrun-koxa Hoyakalu hoyaknu hiphujetka wale tshinanu.
32Hiyáhoni Hoyakalu hoyaknu hiphujexika wale tshinanu. Xawakni Hoyakalu tshinan-koxa ruphujexika wale hoyaknu. Chinpotukawa ruphujexikolupa royaknu.
33Nowhenene mtserunhi pchini tsonu nimwanhi. Xekoyaka hijhanumkano seyni judeu-ne ntshinakanaxyawaka pixka koxa ntshinanhi hixa, nyiywakapa nwaka hi himukata yaleta.
34Nowhenene mtserunhi herotu towrexikolu nunkakanhi. Waleni hamotkajyawaka. Namotjekanaxyawakatkahi pixka, waneko pixka hix-koxa hamotkajyawaka.
35Xye tshinanu ptowru yineru himathetanhi nomkahitjene hixyawaka, hamotkajini.
Jesus Hinkaklu Pedro Wkatakluyakawa Piranapni
36Waneya Simão Pedro hepomhalu, wla htshinru:
— Tsru Hixikatshriwa hanhe pyanu?
Waneya Jesus wla tshinru:
— Nyiywakapa nwaka hi pumukata himotsletanno xawakni. Seyni xye pnutpatka pomkahitanno.
37Waneya Pedro wla tshinru:
— Seyni Tsru Hixikatshriwa, klu tshinanhe hi numukata homkahretanyi xawakni? Klu tshinanu haté niwejinri nuknokanu pixa tshinanupa.
38Waneya Jesus wla tshinru:
— Halikaklahe, haté piwejinri puknokanu hita tshinanupa? Klu tshinanu halikakni, halikakni ntshinyi, hma yanumatkanuklunuwa patlapa, pixa map-kata pweyawatanu. Pma mimatletanutu ptshinanno.
Currently Selected:
João 13: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
