Lucas 10
10
Setenta Hiyrunu Hepi Jejine Hyokanata Runkaklewtapyawakapna Piranapni
1Waneya Tsru Hixikatshriwa Jesus setenta e dois jejine hnureta. Hyokanatna hepkaka hkosejyawakapna, ptowru poktshi hiyrunu ptowru tshijnekaka hyiywakapna, Jesus yapamxyawaka pejnupa.
2Wla htshinatkana:
— Hamkaluru halikaka hix-potuko. Seyni kamrurewatatshine hi hixo. Hiyáhoni hanjitanru Tsru Hixikatshriwa hamkaluru towutatshri, kamrurewatatshine hyokanaxyawakapa ramyawakapluna.
3Hajewa. Seyni himatanu. Nyokanathi hatatjewa ovelha-nhi lobo-ne pixkalune hanikajite hyiywakapa.
4Tiyiro mapa hi hanikanu, hi sacola-ko hanikanu. Hiyrun-koxa hi hanikanru sandalha. Hi halikanru hatnu hapo hyoptoxinri.
5Satu pantshi hjihlojinipa, mitshikananhapka wla htshinanna pantshi hajene: “Kihlephi xyepji hwatshine.”
6Hiyáhoni wanepji rawinipa satu yineru kihle hwachleru walekni kihle hwachleru htshinka. Seyni wane hmawkanuklunu jeji kihle hwachle mixkatu htshintokanuxyawaka hixa nwakako hsatkapanu htshinyawaka.
7Walepjiko hwanu. Wane hnijini kluneruktako hohlutko. Hiyrun-koxa wanepjiko hirini klunerukta hitko. Klu tshinanu kamrurewatatshri himukata yoptoletlu hkamrure hipekole. Hi pimripjikaka hyanu.
8— Hanur-poktshiktako hjihlojinipa, kihle yoptole hixkoklunupa, hnikanru kluneruktako henejikolupa.
9Wane poktshi hwatshine hitskalhakakanu. Waneya wla htshinanna: “Hoyakalu pohirewaxyawaka hapokanwakatatkahi.”
10Hanu poktshikta hjihloka hma malukkonuklunupa waneya wane hichpajini. Poktshi pjikaka hapotlo hyanu. Waneya wla htshinanu:
11“Haté tshiji pahi xye poktshi hajeru, wijixi hipxakatshri pahi, wcheyitanu hixa hetanu. Seyni hichinikanru xye: Hoyakalu pohirewaxyawaka hapokanwakatamkahi.”
12Jesus pnuteko htshinna:
— Nunkakhi, halikaka ntshina. Hapnokaxikolu hohnepa Sodoma poktshini salexikolu yohnik-hapnokatlu rixko hma yoptohihlenuxikowakanu poktshiya.
Malixkane Poktshikaka Hapnokaxikowaka Piranapni
13Hiyrun-koxa Jesus wan-tshina:
— Hapnokatkalur-potupyi pixa Corazim poktshi hiyrunu Betsaida poktshi! Klu tshinanu himyekaklewatatshrikaka hkamhakmaka Tiro poktshiya hiyrunu Sidom poktshi hix-yehi hakanhikatshri pixkalutu, waneyamka mitshikawako rehchinikanutanutkana wane poktshikak-hajene, waneyamka mkatshri saco mapa kamhikolu hmakatanutkana rimathexikowakna rehchinikanutatkana hiyrunu tshitshi pahi koxamka hpolojiwuxinwana.
14Rapnokaxikolu hohnepa Tiro hiyrun-koxa Sidom poktshi hi hsaletpotukanatkona hixa salexikowaka pso.
15Hiyrunu pixa Cafarnaum poktshi. Pkahwakhe patskoxyawakapa haté tenhohne? Seyni pixa halikaka puknokko tshiji hitokote hamhikowaka yehi.
16Hixa yijnakotatshine hit-koxa hyijnakotna. Hixa hiknokatshine hit-koxa ruknokna. Hiyrunu hita hiknokatshine, nyokanatjer-koxa ruknokna.
Setenta Hiyrunu Hepi Satojyawaka Piranapni
17Waneya hsatokatkana setenta e dois jejine Jesus yokanrene. Hpoyikowpotutna. Wla htshinatkaluna Jesus:
— Haté kamtshine yijnakotwu wyokanaxinna ruchpakna pixa phiwaka tshinanu!
18Waneya Jesus wan-tshinna:
— Hehe, hita hetlu Satanás kamtshi rujrujyawaka tenhohneya rawrakle pixka.
19Hjemanno. Nenekatkahi pixkontshi himnune hkatsrexyawaka, heklone koxa. Hike rixa. Nenekatkahi pixkontshi hkamnitjene mixkonu hiknojyawakapa. Hike himtukanhi.
20Wanepnawaka hi himuwatanu kamtshine yijnakoxyawakhi tshinanu seyni halikaka himuwatanu klu tshinanu hyonhiwakatka tenhohneya.
Jesus Poyikowaxyawaka Piranapni
21Waneya waneklu hpoyikowpotuta Jesus, Hoyakalu Hiwejikaluru himukatle tshinanu. Waneya wane htshina:
— Nimalwutyi, Nuru, tenhohne tshij-koxa Towutatshriyi. Klu tshinanu pyohimatlu xye pirankaka jimatkaleruneya hiyrunu kahchinikanuruneya. Seyni puphujetlu hike mimatkane hetanuya. Hehe, Nuru, xye pixa palujyawakni.
22— Nuru, ptowru potuko renekno. Hike himathetlu Whentshi seyni Hirtshipka himathetlu. Hike himathetlu Hirtshi seyni Whentshipka himathetlu hiyrun-koxa katukta raluk-himatyehkakletlu Hirtshi.
23Waneya Jesus hiprotakyehitna rasruklene waneya wla htshinatkana wannapka:
— Kihlehchinikanhi xyekaka pejnu hexini, hiyhaleya.
24Klu tshinanu wane ntshinhi hixo Hoyakalu tokanu hinkakletatshinni hiyrun-koxa phurune haluk-hetletmaklu hixa hetanrutka. Seyni hi retluna. Raluka yijnakoletmakluna hixa yijnakotanrutka seyni hi hyijnakotluna.
Kihleru Jeji Samaria Hajeru Piranapni
25Waneya satu Moisés yonreru pirana himatpotutatshri palnamta hyahoxyawakaplu Jesus. Wla htshin-hepomhaletlu:
— Kasruklewakleru, kluhe nkamhanu nkayaxyawakaplu hiwejikaluru hikeklu hohne mnikawnakatupa?
26Waneya Jesus wan-tshinru:
— Hanhe htshina yonruru pirana? Hanhe htshin-yonhata?
27Waneya jeji wla tshin-hihretlu:
— “Pamotanru Tsru Hixikatshriwa Poyakalute psol-potuko pajiya, psol-potuko piwejinriya, psol-potuko pmixkonuya, psol-potuko pihchinikanuya; pamotanru pimwastsitanru pamoxnawakwa pixka.”
28Waneya Jesus wan-tshinru:
— Hehe, wane potuko ptshin-hihreta. Wane potuko pixanu waneyapa piwekanu.
29Seyni hinanchitkaluru pirana hasruklewatatshri haluka powratlexnawa hiyáhoni wla htshinru Jesus:
— Seyni katnihe nimwastsireru?
30Waneya Jesus hihitlu:
— Wanekananru satu jeji Jerusalém poktshi yopijikatshri. Jericó nwaka hyakananumta. Katshowhurune yehi rapokana. Hkomkahanruna. Ruylakanruna. Waneya hyatkana. Rupnakastsitkani ruchomtatkaluna.
31Waneyakta satu sacerdote wale hapoko yopikakanaxya. Retamxininatkalu jejni pa sretatnu hapo hyapamta, hyatka.
32Waneko pixka rixatka satu Levi tshinkaluru klopicha. Wane rapokamta retamtanru. Riknohachamtan-koxlu wale.
33Seyni satu Samaria tshijne hajeru wale hapok-koxa yapamtatshri hapyehixinixkalu jeji. Retlu. Retwamonutlu.
34Hyanwakatlu. Hpoyichretlu. Nhihtshiha ruyokhohotlu vinho-ha koxa. Waneya hipratji hoho rutakatkalu. Ranikatkalu, himkajexikowakapji rutakatkalu. Waneko rinoxyalu.
35Waneya wale prika hyatka. Seyni mitshikananhapka tiyiro hepi hohne kamrurtshi wenru pso hkochpaka waneya kapjiru reneka. Wla htshinru:
— Puslahanru. Klunerukta wane pnute psaletanutka wale tshinanu, nsatkapinipa, nwenutanyi.
36Hiyáhoni xawakni kathe pkahwaka pixa, nyi mapa jejine tshinanu, rimwastsirexyawakluna katshowhurune hiylakleru?
37Waneya hinanchitkaluru pirana hasruklewatatshri wla tshinru:
— Retwamonutjeru halikaka himwastsiretlu.
Waneya Jesus wan-tshinru:
— Pyanu. Waneko pixka pixanu pixa.
Jesus Hetapna Marta Hiyrunu Maria Tshinkalurone Piranapni
38Waneya Jesus rasrukleneyma yatka. Satu poktshi nwaka hyatkana. Sato suxo Marta tshinkaluro, wale poktshi hajero yoptotlu Jesus topjiya.
39Waneyatka tepuro Maria tshinkaluro Tsru Hixikatshriwa Jesus jixistsi ttuplakanatatka. Tyijnakokanatlu htokanu.
40Seyni Marta tshinkaluro kojwakahchinikanuta hixo kamrurtshi, pantshi hajeru tshinanu. Hiyáhoni tapokanwakatlu Jesus. Waneya wla ttshinru:
— Tsru Hixikatshriwa, hike pix-pixa tuknokamtano nepuro, hitapkani kamrurewatana? Hiyáhoni pyokanatanro tepixyawakapno.
41Waneya Tsru Hixikatshriwa Jesus wan-tshinro:
— Marta, Marta, kojwakahchinikanutatshroyi, mimatahichinikanuwatkátoyi hixo pa hixanu tshinanu.
42Satupkalu hijhakalur-potu. Maria-kni kihleru nuretatka. Hiyrun-koxa hi tkonko tnurreru.
Currently Selected:
Lucas 10: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
