Lucas 8
8
Suxone Jesus Hepixjerone Piranapni
1Waneya wane wkatanu, Jesus ptowru poktshi nwaka hyapa, tsru poktshi hiyrun-koxa mtserutu poktshikaka. Runkaklewakananumta kihler-potuko tokantshi Hoyakalu pohirewaxyawaka pirana. Waleymana rasruklene, doze-na.
2Hiyrun-koxa waleymana satokaka suxo rutskalaklenetka, kamtshi ruknojinine satkaka hiyrun-koxa rutskalaklerone satkaka hyeyixlekakayna. Sato wanna hepire Maria Madalena tshinkaluro. Wala honra mitshikananu sete kamtshine takajika.
3Hiyrun-koxa sato suxo Joana tshinkaluro, Cuza tshinkaluru hnunro phuru Herodes hitakanru waleyma htowuwaxyawakapa. Hiyrun-koxa Susana hiyrun-koxa pimrone hixolune. Wanna Jesus hepixjekanata hejnuyma rimwalerna.
Hitaklu Tataji Jiplaljekleru Piranapni
4Waneya hixolune yine ptowru poktshikaka hichpajikatshine hapatjeyehitlu Jesus. Waneya Jesus satu yapkaklu pirana runkakatkana:
5— Satu jitaklewakleru hichpakamta rutaklewtapanu. Waneya ruplaljetatajitlu. Pimriji hatnu hapostsi hapoktatajita. Wane hkatsrejikatka, runna kochitshin-koxa hnikloktatajitanruna.
6Pimriji sotlu hanikajite hapoktatajita. Wane ruptshejyatka riprih-hapkatanatka klu tshinanu hi khatshij-yehinru.
7Pimriji kona yehi hapoktatajita. Waneya konaymakananuko htseruwna, hkakmokanatkalu.
8Seyni pimriji kihle tshijiwaka hapoktatajita. Htseruwna, hjiwata. Satkakaji pejnu tshinanu cem-ji rawa. Waneya wane htshinna Jesus:
— Kajnakopnahi hyijnakoxyawakapa, hyijnakotanu.
Jesus Hasruklu Klu Hyapkakleta Hitataji Jiplaljekleru Pirana
9Waneya Jesus hasruklene hepomhalu Jesus:
— Hanhe htshina xye yapkaklu pirana?
10Waneya wane htshinna Jesus:
— Hixamka henekka himaxyawakaplu mimatkotu pirana Hoyakalu pohirewaxyawaka pirana. Seyni pimrine tshinanu yapkaklu nkamhiylu ptowru piranako. Rexinna retmakna, hi rapkathojitna; hjeminna, hjemmakna hma mimatjeminixipna.
11— Xyeni yapkaklu. Hitataji Hoyakalu tokanni.
12Hatnu hapostsi hapoktatajitatshri yaholni tokantshi jematshine. Seyni runa Satanás kamtshi. Hkonyana tokantshi rajiyna hitakkaluru hma malixyawakanupluna, hma miwekkajikowakanupna.
13Sotlu hanikajite hiknokkalune wannani tokantshi jematshine. Tokantshi hjeminixkana hyoptotmakluna tsru rumuwleymana. Seyni hi waneyna hitskina wanna. Hiyáhoni pchini tsonu halixatshinepni. Runinipa yahtaletlewlu ramtakanruna tokantshi hjemlerna.
14Kona yehi hapoktatajitatshine, wanna Hoyakalu tokanu jematshine pixkalune. Seyni kojwakahchinikanrukaka, ho pohirewnalu, ho poyikowlukaka xye hohne hexikaluru mixkowpotuta waneya xekoyaka hkakmokannatkalu. Hiyáhoni hi hjiwatanatkana.
15Seyni halikaka kihle tshijiwaka hapoktatajitatshine, wannani potuk-hajirune, kihle hajirune. Hyijnakotluna tokantshi. Romkahitluna hjemlerna. Hmachiretleymana hjiwatanutkana.
Katalu Piranapni
16— Hike yineru lamparina nikotatshri hachhaji hpuko hitakanro. Hi hijeko hpukoko rutakanro. Seyni kihlero halikaka lamparina kihle nikotle tixyawaka tutajikowaka, ptowru yineru hapkathojixyawakapa tnikotle tshinanu.
17Klu tshinanu ptowruka yohimluru ruphujetko. Ptowru tokantshi yohimatkaluru rimathetko, runkakletko.
18— Hiyáhoni hislahinwa hanu pixa yijnakoletanru xye hima: Klu tshinanu hwikatshri pnute renekko. Seyni hike mwikatu haté seyo rimwaleru hkonkona.
Jesus Hinro, Himolen-koxa Piranapni
19Waneya Jesus hinro, himolen-koxa yanwakatlu Jesus. Seyni hi rumukata hapoklestsitluna hixolune yine tshinanu.
20Waneya runkakka. Wane htshinruna:
— Punro, pepurun-koxa maleka rawna. Raluk-hetletyina.
21Waneya Jesus wan-tshinna wanna ptowruneka:
— Katnihe nunro, nomolene wannani Hoyakalu tokanu yijnakotatshine hiyrunu ntshinyawaka kamhatshine.
Jesus Kanniphalu Hitukkajyawaka Piranapni
22Waneya pa hohnekotnaka Jesus kanawa hpokowna rasrukleneyma. Waneya wla htshinna:
— Tujra sreta wnahlu powha wyanu.
Waneya hyatkana.
23Seyni hkopruhatka pchinikna Jesus himkamta. Waneya hyopyoka tsru kanniphalu tsru powhaya. Htsepohjetlo kanawa hiyáhoni katsephatkalo. Tsru jhamleru potukni ptowruka.
24Waneya rasruklene yanwakatlu Jesus, hkomyekluna wane htshinruna:
— Kasruklewakleru, Kasruklewakleru, wupnahetkotanuna!
Waneya Jesus yotunotatka htshihetjetlu kanniphalu hiyrunu tenoplojhal-koxa. Waneya rutukatka kanniphalu. Pokokha rixatka hipowha.
25Waneya Jesus hepomhatkana rasruklene wane htshinna:
— Hanurhe hixa halixle?
Seyni hpikatkana hiyáhoni wane htshinkakna wannakakluko:
— Hanu hixatshri koxni xye jeji? Klu tshinanu kanniphalu hipowha koxa yijnakotlu.
Jesus Hitskalajyawaklu Jeji Hixolune Kamtshine Himwatshri Piranapni
26Waneya tujra wnahlu tsru hipowha Gerasa sreta rapokna, Galileia powha wnahlu.
27Waneya kanawa ruptejinixka Jesus satu jeji poktshi hajer-makni, kamtshine himwatshri yoptotlu. Hix-hohne mamkatni. Hi pantshiko rawa seyni yomletshi rawa.
28Waneya Jesus rexiniklunu hsaplewata. Hyawnamta Jesus-stsi. Tsru plama rixa waneya wane htshin-saplewleta:
— Jesus, Hoyakalu ten-potu hajeru whene! Kluhe pixannatkano? Nanjityi hi psaletpotutanunno.
29Wale wan-tshina klu tshinanu Jesus yokanatatkalu kamtshi ruchpajyawakaplu jeji. Hixo kata kamtshi kachitlu hipokananu. Hiyáhoni rostutka. Yomuwatsamka rostutka himyonota, hihpeji koxamka. Seyni yomuwatsni hiknajromtana hmixkonu tshinanu. Waneya popriwaka ranikjekanatluna kamtshine.
30Waneya Jesus hepomhalu:
— Klu hiwakyihe?
Waneya ruhitlu kkamtshiteru. Wane htshina:
— Nhiwakni Hixoluru.
Wane htshina kkamtshiteru klu tshinanu hix-potu kamtshine jihloklu wale.
31Waneya kamtshine hanjitlu Jesus teno pnawaka hma yokanaxyawakanupna.
32Wanekananru hixoluru porco hipjitastsi hnikakanaxyana. Waneya kamtshine hipokananu ranjitluna Jesus ritshixyawakapna porco mane hjihlojyawakanapna. Waneya Jesus hitshitna.
33Hiyáhoni ruchpakamtatkana kamtshine. Waneya porco-ne mane hitokote hjihlokamtatkana. Waneya hixolunni porco-nni hipjita hijrujyanatka. Hipowha rapokanna waneya hipowha rahyejyanna.
34Waneya xye rexinixkana porco-ne hinotatshine rasukamtna. Runkaklewatna tsru poktshiya, hsana hajen-koxa.
35Waneya hixolune yine hinamta retapyawakanapna klu rixanna. Waneya rapokluna Jesus nwaka. Retluna kkamtshithixapatshri. Htuplakanata Jesus jixistsi. Kamkatkalu kkamtshithixapatshri, kahchinikanutkalu. Waneya rimyekatkana yine.
36Waneya kkamtshithixapatshri hetakanatjene hinkakna hanu rixa hitskalakletkatka.
37Waneya hpikpotutatkana ptowrunek-yine Gerasa tshiji sreta hajene. Hiyáhoni ranjitluna Jesus wanna tshijne ruchpajyawakapa. Waneya kanawa hpokownatka Jesus. Waneya hsatokhonukatka ruchpakakanaxyawaka sreta.
38Seyni wale jeji kkamtshithixapatshri hanjitmaklu Jesus, waleyma rixyawakpatka. Seyni Jesus yokanatlu. Wla htshinhonuklu:
39— Pipji pyanutka. Punkakanna yine Tsru Hixikatshriwa Hoyakalu rix-hepixlexyawakyi pirana.
Hiyáhoni ralimta. Runkaklewatatka hipoktshi hajene yehiya Jesus hixyawakatkalu.
Jesus Sato Suxo, Sato Mturo Rutskalajyawaka Piranapni
40Waneya pa sreta wnahlu rapojinixka Jesus, hixolune yine yoptotlu, tsru poyikowluyma. Klu tshinanu waneko hkahwakakanaxyaluna.
41Waneya runa satu tsru hitakkaluru hanjihohnewakapji hajeru, Jairo hiwakatletatshri. Hyoptsojityehitlu Jesus jixistsi. Ranjitlu Jesus hipji hyiywakapa,
42klu tshinanu richitsho, satopkaluto, doze mhaleruto, tupnakastsitkani. Waneya Jairo-pji hyakananumxiniwa Jesus hixolune yine hipxakjemtlu.
43Waneya twa sato suxo hihrahawatatshro. Doze hwalapu hima tuhrahawatatka. Hixo kpinrewaklerunemka pinixnixkalo hiyrunu tnikatlewatanatka ptowruka twinri. Hike himukata hitskalhakakletlo.
44Jesus tjimne sretako tunya waneya tkamrukamkatlu. Waneklukawa potuko tutukahrahatatka.
45Waneya repomha Jesus:
— Kathe kamrukamkatno?
Seyni ptowru yineru hi hitni htshinna. Waneya Pedro wan-tshinatkalu Jesus:
— Kasruklewakleru, hixolune yine katshnekyi ripxakjetyina.
46Seyni Jesus wan-tshina:
— Yineru kamrukamkatatkano. Nimata klu tshinanu ruchpakamxyatkano npixkonu.
47Waneya texnawa suxo hi tumukata yohimlexnawa, hitatakatshroko yanwakatlu Jesus. Waneya Jesus jixistsi tuknojnawa. Waneya tunkaklewata ptowru yineru hetanu klu hikolukle tkamruklu hiyrunu waneklukawa tutskalhiywakatka pirana.
48Waneya Jesus wan-tshinro:
— Chrima, palixle hitskalakyi. Pyanu kihlehchinikanpatkayi.
49Waneya hyanumsakanaxiniwa Jesus, Jairo-pji hichpajikatshine htowrene hapoka. Waneya wane htshinruna:
— Pchítshoni hipnanatka. Hi pnute pkojwakanru hasruklewatatshri.
50Wale hjemini Jesus, wane htshinru Jairo:
— Hi ppikanu. Palixachatanu, pchitsho hitskalhanu.
51Waneya Jesus Jairo-pji hapojinipa, hi ritshitna pimrine wanna hatjini hjihlojyawakna. Pedro, Tiago, João hiyrunu mturo hiru, tunro, wane pejnu tsonu himukata wane yaleta.
52Wane pchinika ptowru yineru tshiyahata hsaplewjepotutna mturo pohwaka tshinanu. Seyni Jesus wan-tshinatkana:
— Hituk-tshiyahletanutka. Mturo hi tupna seyni tumkachata.
53Seyni rutsolhitatluna Jesus, wanna himata tupniywakanatka.
54Waneya Jesus kosemyoxininatkalo mtúroni, wane htshinro:
— Mturo, ppalna!
55Waneya tiwejinri hiwekatnaka. Waneklutka mturo yotunotatka. Waneya Jesus hohlujixlo mturo.
56Turu, tunro koxa himyekatka seyni Jesus hijretna hike hmunkajyawakanupluna wale pirana.
Currently Selected:
Lucas 8: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
