Mateus 16
16
Hetkalurkaka Ranjixyawakna Yine Piranapni
1Waneya satkaka fariseu-ne hiyrunu satkaka saduceu-ne yanwakatlu Jesus retumhiywakapluna. Ranjitluna satu hetkaluru Hoyakalu pixkonu tshinanuya hkamhiywakapa.
2Seyni Jesus wla tshina:
— Kayi rixinixka, wla htshina: “Kihle hohnehetkoplu klu tshinanu tenhohne sero kaynolu.”
3Waneya yetshpotukawa wla htshina: “Hinhetkopatkani klu tshinanu sero hohneru, hiyrunu mapchahlu.” Tenhohne hyihaxini hixa himathetlu ho kihle hohneplu ho hike seyni hi himathetlu xye hohnekaka hetlerutka hanu rixa.
4Xyeklu papko hiwekatshine hektutu kamhatshine potu, Hoyakalu tokanu majnakowaxikatshine hanjitmaklu. Seyni hi satukna hetkaluru rekhitkona seyni Hoyakalu tokanu hinkakletatshrini, Jonas tshinkalurni hetkalurutepka rekhitkona pa hohne. Waneya Jesus hiknokamtna, hyatka.
Fariseu-ne Hiyrunu Saduceu-ne Tserutjeru Piranapni
5Waneya pa sreta wnahlu rapojinixkana, pão hi ruchinik-hanikletna.
6Waneya Jesus wan-tshinna:
— Xako fariseu-ne hiyrunu saduceu-ne tserutjeru.
7Waneya rasruklene yinuwaka hihjekakleta wannakakluko, waneya wla htshinna:
— Wale wan-tshina klu tshinanu pão hi wanikatka.
8Seyni Jesus yijnakotna htshinyawakna waneya repomhana:
— Hixa pso halixle jijirunhi, klu tshinanhe hihjekaka pão hma manijyawakanu tshinanu?
9Hi he himatjemawalu? Hi he hichiniklu hanu nixa hohluretna cinco mil yine cinco pão-yma? Hi pejnuhe chiwatu htsepota nijittshi hixetatshrini?
10Ho hanu nixa hohluretna quatro mil yine sete pão-yma? Hi pejnuhe chiwatu htsepota nijittshi hixetatshrini?
11Hi he himatjema pão pirana hi nkochtsheka? Seyni xako fariseu-ne hiyrunu saduceu-ne tserutjeru.
12Waneklu rimatjematkaluna Jesus hijretna fariseu-ne hiyrunu saduceu-ne hasruklewle pirana tshinanu klu tshinanu rasruklewlena tserutatshri pão hitakkaluru pixka rixa, psolujpako hchitshponkaka.
Pedro Jesus Hiphujtaxyawaka Piranapni
13Waneya Cesareia de Filipe poktshistsi rapojinixka Jesus, rasruklene repomha:
— Kathe rikahwakluna yine Jeji Whene tshinkaluru?
14Waneya ruhitluna, wla htshinruna:
— Satkaka yineru wan-tshina pixa João Batista-yi; satuko wan-tshina Elias-yi; satuko wan-tshinyi pixa Jeremias tshinkaluryi ho satu mitshikawni Hoyakalu tokanu hinkakletatshriyi.
15Waneya Jesus hepomhana:
— Ha hixa, kathe hkahwakno?
16Waneya Pedro hihita:
— Pixni Messias-yi, Hoyakalu hiwekatshri whenyi.
17Waneya Jesus wan-tshinru:
— Poyikowatatshripyi, Simão, João whene. Klu tshinanu xye pirana hi yine hekhityi seyni Puru tenhohne hajeru hiphujetlu.
18Hiyáhoni nunkakyi: Pixni Pedro-yi. Hita halixatshine xye sotlu hoho panawaxikatshinepni. Hiyrunu hipuktshi himukatle hi himukata halliretanru.
19Tenhohne pohirewaxyawaka yohpukapre nenekanyi pixa. Klunerukta pimaletanu xye tshijneya, Hoyakalu himaletanru tenhohneya. Hiyrun-koxa klunerukta pitshitanu xye tshijneya, Hoyakalu hitshitanru tenhohneya.
20Waneya Jesus towutna rasruklene hike hma munkajyawakanuplu Messias rixinri pirana.
Jesus Hinkaklexyawaklu Rupninri Hiyrunu Riwejinritnaka Pirana
21Wale hohnekananuko Jesus yinuwaka hinkakletna rasruklene Jerusalém rujha yalexyawaka pirana hiyrunu hsalewniywaka hixo pa hixanu tshinanuya pirana tsrukakalune judeu-ne hiyrunu tsru hixikatshinwa sacerdote-ne myoya, kasruklewaklerune hinanchitkaluru pirana hasruklewatatshine myoy-koxa. Hiyrun-koxa ruylatko seyni map-hohne rixinri riwekanutnaka pirana.
22Waneya Pedro haniklu Jesus kahnete, hyinuwaka hiykoletlu. Waneya Pedro wla tshinru Jesus:
— Hikeklu, Tsru Hixikatshriwa! Wale hikeklu hohne rakanhayehitanyi!
23Waneya Jesus hiprotakanwakatlu, wla htshinru:
— Pasujinno, Satanás pixkalutu. Nutspekakjermakyi; pixa hi Hoyakalu hchinikanu pimwa seyni jeji hchinikanu halikaka pimwa.
Jesus Homkahitatshri Haluklu H-cruz-te Rutaykopixyawaka Piranapni
24Waneya Jesus wla tshinna rasruklene:
— Satu yineru haluk-homkahrexinno, rujhanru wale ralujyawaka ruchoxyawaka, rutaykopitanru h-cruz-te waneya romkahitanno hita.
25Klu tshinanu katukta haluk-hiwekkakletanru riwejinri, ramtakanru riwekle; seyni katukta hita tshinanu hamtakanru riwekle riwekanu.
26Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna? Kluhe xawaka ripekotanru satu jeji riwejinri tshinanu?
27Klu tshinanu Jeji Whene hiyrunu hiwejikalune htowrene tenhohne hajene hapokanu Hoyakalu hoyaknuyma. Waneya renekanru satkaka yineru hkamrure wenru.
28Halikaka ntshinhi, satkaka hewi hajeru hma mupnaknukawa, retanru Jeji Whene hapokatshritka waleko hpohirewaxyawakaya.
Currently Selected:
Mateus 16: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Mateus 16
16
Hetkalurkaka Ranjixyawakna Yine Piranapni
1Waneya satkaka fariseu-ne hiyrunu satkaka saduceu-ne yanwakatlu Jesus retumhiywakapluna. Ranjitluna satu hetkaluru Hoyakalu pixkonu tshinanuya hkamhiywakapa.
2Seyni Jesus wla tshina:
— Kayi rixinixka, wla htshina: “Kihle hohnehetkoplu klu tshinanu tenhohne sero kaynolu.”
3Waneya yetshpotukawa wla htshina: “Hinhetkopatkani klu tshinanu sero hohneru, hiyrunu mapchahlu.” Tenhohne hyihaxini hixa himathetlu ho kihle hohneplu ho hike seyni hi himathetlu xye hohnekaka hetlerutka hanu rixa.
4Xyeklu papko hiwekatshine hektutu kamhatshine potu, Hoyakalu tokanu majnakowaxikatshine hanjitmaklu. Seyni hi satukna hetkaluru rekhitkona seyni Hoyakalu tokanu hinkakletatshrini, Jonas tshinkalurni hetkalurutepka rekhitkona pa hohne. Waneya Jesus hiknokamtna, hyatka.
Fariseu-ne Hiyrunu Saduceu-ne Tserutjeru Piranapni
5Waneya pa sreta wnahlu rapojinixkana, pão hi ruchinik-hanikletna.
6Waneya Jesus wan-tshinna:
— Xako fariseu-ne hiyrunu saduceu-ne tserutjeru.
7Waneya rasruklene yinuwaka hihjekakleta wannakakluko, waneya wla htshinna:
— Wale wan-tshina klu tshinanu pão hi wanikatka.
8Seyni Jesus yijnakotna htshinyawakna waneya repomhana:
— Hixa pso halixle jijirunhi, klu tshinanhe hihjekaka pão hma manijyawakanu tshinanu?
9Hi he himatjemawalu? Hi he hichiniklu hanu nixa hohluretna cinco mil yine cinco pão-yma? Hi pejnuhe chiwatu htsepota nijittshi hixetatshrini?
10Ho hanu nixa hohluretna quatro mil yine sete pão-yma? Hi pejnuhe chiwatu htsepota nijittshi hixetatshrini?
11Hi he himatjema pão pirana hi nkochtsheka? Seyni xako fariseu-ne hiyrunu saduceu-ne tserutjeru.
12Waneklu rimatjematkaluna Jesus hijretna fariseu-ne hiyrunu saduceu-ne hasruklewle pirana tshinanu klu tshinanu rasruklewlena tserutatshri pão hitakkaluru pixka rixa, psolujpako hchitshponkaka.
Pedro Jesus Hiphujtaxyawaka Piranapni
13Waneya Cesareia de Filipe poktshistsi rapojinixka Jesus, rasruklene repomha:
— Kathe rikahwakluna yine Jeji Whene tshinkaluru?
14Waneya ruhitluna, wla htshinruna:
— Satkaka yineru wan-tshina pixa João Batista-yi; satuko wan-tshina Elias-yi; satuko wan-tshinyi pixa Jeremias tshinkaluryi ho satu mitshikawni Hoyakalu tokanu hinkakletatshriyi.
15Waneya Jesus hepomhana:
— Ha hixa, kathe hkahwakno?
16Waneya Pedro hihita:
— Pixni Messias-yi, Hoyakalu hiwekatshri whenyi.
17Waneya Jesus wan-tshinru:
— Poyikowatatshripyi, Simão, João whene. Klu tshinanu xye pirana hi yine hekhityi seyni Puru tenhohne hajeru hiphujetlu.
18Hiyáhoni nunkakyi: Pixni Pedro-yi. Hita halixatshine xye sotlu hoho panawaxikatshinepni. Hiyrunu hipuktshi himukatle hi himukata halliretanru.
19Tenhohne pohirewaxyawaka yohpukapre nenekanyi pixa. Klunerukta pimaletanu xye tshijneya, Hoyakalu himaletanru tenhohneya. Hiyrun-koxa klunerukta pitshitanu xye tshijneya, Hoyakalu hitshitanru tenhohneya.
20Waneya Jesus towutna rasruklene hike hma munkajyawakanuplu Messias rixinri pirana.
Jesus Hinkaklexyawaklu Rupninri Hiyrunu Riwejinritnaka Pirana
21Wale hohnekananuko Jesus yinuwaka hinkakletna rasruklene Jerusalém rujha yalexyawaka pirana hiyrunu hsalewniywaka hixo pa hixanu tshinanuya pirana tsrukakalune judeu-ne hiyrunu tsru hixikatshinwa sacerdote-ne myoya, kasruklewaklerune hinanchitkaluru pirana hasruklewatatshine myoy-koxa. Hiyrun-koxa ruylatko seyni map-hohne rixinri riwekanutnaka pirana.
22Waneya Pedro haniklu Jesus kahnete, hyinuwaka hiykoletlu. Waneya Pedro wla tshinru Jesus:
— Hikeklu, Tsru Hixikatshriwa! Wale hikeklu hohne rakanhayehitanyi!
23Waneya Jesus hiprotakanwakatlu, wla htshinru:
— Pasujinno, Satanás pixkalutu. Nutspekakjermakyi; pixa hi Hoyakalu hchinikanu pimwa seyni jeji hchinikanu halikaka pimwa.
Jesus Homkahitatshri Haluklu H-cruz-te Rutaykopixyawaka Piranapni
24Waneya Jesus wla tshinna rasruklene:
— Satu yineru haluk-homkahrexinno, rujhanru wale ralujyawaka ruchoxyawaka, rutaykopitanru h-cruz-te waneya romkahitanno hita.
25Klu tshinanu katukta haluk-hiwekkakletanru riwejinri, ramtakanru riwekle; seyni katukta hita tshinanu hamtakanru riwekle riwekanu.
26Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna? Kluhe xawaka ripekotanru satu jeji riwejinri tshinanu?
27Klu tshinanu Jeji Whene hiyrunu hiwejikalune htowrene tenhohne hajene hapokanu Hoyakalu hoyaknuyma. Waneya renekanru satkaka yineru hkamrure wenru.
28Halikaka ntshinhi, satkaka hewi hajeru hma mupnaknukawa, retanru Jeji Whene hapokatshritka waleko hpohirewaxyawakaya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil