Mateus 6
6
Jesus Hasrujyawaklu Pimrine Wepixyawaka Pirana
1— Xako hi yine hetanu hkamhanru hkamrure kihleru Hoyakalu tshinanu klu tshinanu wan-hixini, hiru tenhohne hajeru hike himlujikolu henekanyi.
Henekachlu Hike Mwikatu Tshinanu Piranapni
2— Hiyáhoni pa hixanu penekachaxinri hike mwikatu, hi punkaklexinwa tsru sejirtshiyma, kowi hima pixka, yine hexyawakyi. Waneko pixka hixachatatshine hanjihohnewakapjiya hiyrunu poktshi hanikajiteya yine himalwuxyawakapna. Halikaka ntshinhi yine himalwuxyawakna tsonu hijhatshine hike hiyrunu rumlujikolna hyoptotanutkana.
3Seyni hike mwikane pa hixanu penekachaxinipa, potshkeruko peneklewachatanu pimrine mimatyehixyawakanuplu.
4Potshkeruko peneklewachatanu waneya puru, ptowru pmeta kamhalexikolu hetatshri, henekanyi pumlujikolupa.
Hanjihohneru Pirana
5— Hiyrun-koxa hixa hanjihohnexini, hi pimrine hixachatatshine pixka hixanu. Wanna honra hikchikhihlenutlu hyopkaka hanjihohnerexyawakna hanjihohnewakapjiya hiyrunu hatnu hapo yoptowakkakaya ptowru yineru hexyawakapna. Halikaka ntshinhi yine hexyawakna wanna rumlujikolnina hike hma yoptoxyawakanupna.
6Seyni panjihohnexinipa pixa, pihruko pyanu, puchyahiphaptotetanu, panjitanru puru, yohimaxikowaka hwatshri. Waneya Puru, ptowru pmeta kamhalexikolu hetatshri pumlujikolupa henekanyi.
7— Hiyrun-koxa hanjihohnexinipa, hi himepetanru walerutu hima malixkane pixka. Klu tshinanu wanna kahwaklu hixo tokantshi tshinanu Hoyakalu henekanna ranjirerna.
8Hi wanna pixka hixanu hixa klu tshinanu hixa Hiru himatlu hmahaxinri hma manjitkanuklunuwalu.
Jesus Hasrujyawakna Ranjihohnexyawakna Piranapni
9Hiyáhoni wla hix-hanjihohneretanu: “Nuru, tenhohne hajeru, wanjityi pohitkalurupa pixa phiwaka potukalu.
10Runanutka pixa ppohirewaxyawaka. Pixa halujyawaka kamhako xye tshijneya, tenhohne rix-kamhalexyawakatka pixka.
11Wniklerupa xye hohne tshinanupa penekanwu.
12Pamtakahchinikanyehixinwu wektunu pimrine hektunu wamtakahchinikanyehixyawaka pixka.
13Hi yahtalexikowaka putakanwu, seyni hektutu himukatle halikaka pkochpajinwu. [Pohirewaxyawaka pixanni, himukatlu pixanni hiyrun-koxa hoyaknutshi pixanni rixhohnekanaxyawaka. Amém.]
14— Klu tshinanu hixa hamtakahchinikanyehixinri pimrinkaka hektunu waneya Hirtshi tenhohne hajer-koxa hamtakahchinikanyehitanru hixa hektunu.
15Seyni pimrine hektunu hma mamtakahchinikanyehixinipa hixa, Hirtshi tenhohne hajer-koxa hi hamtakahchinikanyehixinhi hixa hektunu.
Hohajirewlu Piranapni
16— Hixa hohajirewaxini Hoyakalu tshinanu, hi wamonuwhojitatshinetka pimrine hixachatatshine pixka hix-hohajirewleta. Wanna honra rohajirewaxinna hektu rixhojixnawana pimrine hexyawaklu rohajirewatna. Hita wan-tshinhi yine hexyawakna tsonu kamhatshine hike hiyrunu rumlujikolna hyoptotanutkana.
17Seyni pixa hohajirewaxiniklunu Hoyakalu tshinanu, pmachitanu, perohojitanu,
18pimrine mimatyehixyawakapyi pohajirewata seyni Puru metkotu tsonu himatyehitanyi. Waneya Puru, ptowru pmeta kamhalexikolu hetatshri, pumlujikolu renekanyi.
Pohirewnalu Tenhohneya Piranapni
19— Xye tshijne pohirewnale hi hapatjeyehixinwa. Klu tshinanu xye tshijne pohirewnale himata tsalwata hiyrun-koxa kamla himtukjetlu. Katshowhuru koxa hiphapto yotkaka htshowhuxyawakaplu.
20Seyni tenhohne pohirewnale himrexikatshinepwahi, tenhohne pohirewnale mimata tsalawatkatni, hi kamlako himtuklewaxya. Tenhohne katshowhuru hi himukata yotkakhiphaptotleta htshowhuxyawakaplu.
21Klu tshinanu hanukta himrexyalu hpohirewnale wane koxlu hihchinikanu.
Mantshi Katalute Piranapni
22— Yhaltshi wimane katalute. Kihle yhale pixini, piman-koxa kat-yehi potpako.
23Seyni hektu yhale pixinipa waneya piman-koxa mapchah-yehipa. Hiyáhoni katalu pimane hwatshri mapchahalu rixini, hi pa mapchahnukananuktalu!
Hoyakalu Hiyrun-koxa Pohirewlu Piranapni
24— Hi satukna towrertshi walerutu himukata kamhaletlu hepi phurune kamrure. Klu tshinanu ho rahnanutanru satu, satu ramotanu; ho satu repiretanu, satu reyikanu. Hixa hi himukata kkamrurewaklerune hixleta Hoyakalu tshinanu hiyrunu pohirewlu tshinanu.
Wma Kojwakahchinikanuxyawakapa Xye Hiwejinri Tshinanu Piranapni
25— Wale tshinanu wane ntshinhi: Hi hkojwakahchinikanutanu hiwejinri tshinanu, klu hnikanu ho klu hiranu. Hi himane tshinanuko koxa hkojwakahchinikanutanu klu hmakatanu. Hi he hiweklu, nikkaluru yohnik-hijhakalurni? Hiyrun-koxa hi he mantshi, mkatshri yohnik-hijhakalurni?
26Hetanru tenhohne yapatshine kamejirune. Hi rutaklewatna, hi ramluna, hi honantshi himretawakako rimwana. Wanepnawaka Hiru tenhohne hajeru hohlutjetna. Seyni hi he hixa, wanna yohnik-hijhakalun-pothi hixa?
27Hanunhe hixa satkakhi kojwakahchinikanruyma hixolethohneyehixikatshriwa rumukata hiweklexyawaka pejnu hohne?
28— Klu tshinanhe hkojwakahchinikanuta mkatshri tshinanu? Hetanru kahwuru hanu rix-tseruwnaleta. Hi hkamrurewata, hi koxa hjiweta.
29Seyni wane ntshinyi halikaka hi phuru Salomão-niko, phuru potukni, seyni mkatshri kihler-potuko rutakjereru hi kahwuru pa hihlenu rixa.
30Hoyakalukni makawkaklu campo hwatshriptshe xawakni wetleru yetshikawa ramhannatka forno hyoxijikolu tshinanu. Hi he kchana hmakaxyawaka pnute rix-makawkakletanhi hixa pso halixle jijirunhi?
31Hiyáhoni hi hkojwakahchinikanuxinwa, hi wla htshinanu: “Kluhe wnikanu?” ho “Kluhe wuranu?” ho “‘Kluhe wmakatanu”?
32Klu tshinanu xyekaka rujhajetmakna moyakalutene hiyrun-koxa Hiru tenhohne hajeru himatlu xye ptowruka halukanru.
33Seyni mitshikananhapka Hoyakalu pohirewaxyawaka hijhanu hiyrunu Hoyakalu halujyawaka hkamhanu. Waneyakni Hoyakalu henekanhi xyekaka ptowruka.
34Hiyáhoni hi hkojwakahchinikanuxinwa yetshikawa hohne tshinanupa, klu tshinanu waneplu kojwakahchinikanrewlu yetshikawapa. Pa hohnekaka kojwaklu hwatka.
Currently Selected:
Mateus 6: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
