Marcos 13
13
1Waneya Hoyakalupji ruchpajinixka Jesus, satu rasrukleru wan-tshinru:
— Kasruklewakleru, hi pa hihlenukananru pantshikaka hiyrunu hsotlutekaka.
2Waneya Jesus hihita:
— Petluhe xyepjikaka tsrukakalu? Ptowruka petleru hkoptalhako hi satukna sotlu hwahohokakanu.
Salewaktshi, Kojwaklewatatshri Piranapni
3Jesus tuplakanata Oliveiras mriji Hoyakalupji nwaka hyihata. Waneya Pedro, Tiago, João, hiyrunu André hepomhalu wannapkani:
4— Hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka?
5Waneya Jesus yinuwaka hasrukletna, wla htshinna:
— Xakoka hike yokwijetanhi.
6Klu tshinanu hixo hiphujewnanu hita hiwakaya wla tshinatshripa, “Hita Cristo-no” waneya hixopni hyokwijetanunna.
7Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.
8Pa neruymako hyahotkakanu satu neruko. Pa tshijneko yahotanru satupni. Hix-poktshi hiyolikanu. Natshipni. Xyekaka mturu tshino yinuwakle pixkalutni.
9— Wane ntshinhi ptowru potuka hmuphujewnaknukawa klu tshinanu preso hitakko, hjemahchinikanyehitko hiyrunu hanjihohnewakapjikaka hkotshipjexiko. Tsru hixikatshinwa hiyrunu tsrukakalune nwaka hanikko hita hiwaka tshinanu halikaka pirana hpohixyawakapa.
10Hmapokkanuhnapukawa hnikawnahohnexyawaka ralukko kihle piranalu potuko hiwekkaklewatatshri pirana hinkajyawakapna ptowru neruka.
11Hkachitkoklunpatka hi hkojwakahchinikanutanu hanu htshin-hihretanu hjihyehitjen-yehi hapojinipa. Klu tshinanu rapojinpapkopatka hyanumaxyawaka Hoyakalu henektokanutanhi. Klu tshinanu hyanumaxiniklunupa hi hixako htshinrepni seyni Hoyakalu Hiwejikaluru henektokanutanhi.
12Moltshine himolene potuko ruylajixkakanna. Waneko pixka rixan-koxna hirtshine, hwuhenene ruylajixanna. Haté hwuhenene kamnitanna rurna ruylaxyawakapluna.
13Ptowru yineru hahnanutanhi hixa hita tshinanu seyni poyehi halixleru haté hmahle papko, riwekanu.
Tsru Salewaktshi Piranapni
14Jesus pnute hya hinkakleta, wla htshina:
— Hexinpatkalu tsru jhamleru mkahwajikowakanu yehi hixa himathethatatshinhi xako himatjemanru. Waneyakni katukta Judeia hwanu, rasukanu, hipjita hyanu.
15Katukta teno pantshi hohowaka hwanu, hi hserpikanu rejnunkate pantshi hajeru rawapyawakapa.
16Katukta campo hwanu, hi hsatkapanu hipji himkalu rawapyawakapa.
17Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni!
18Hoyakalu hanjitanu katshikleru papkolu hma makanhiywakanupa xyekaka.
19Klu tshinanu tshiji rawanu salewaktshi tsrupotpákolu. Hikeklu hohne wane pixkalutu salewaktshi rawapa xye tshijne yinuwajikolukananuko haté xawakni hiyrun-koxa wane pixkalutu salewaktshi hikeklu hohne hakanhanutnaka.
20Seyni Hoyakalu hma masatkanumkalu salewnikolu papkopa, hikemka hiwekanu. Seyni Hoyakalu nuretanune tshinanu, hmasatanru salewaktshi klu papkopa.
21— Waneya waneklu papkopa yineru wane htshinini: “Hetanu, hewitkalu Messias!”, ho wane htshinini: “Hawlalu! ” — hi halixanru.
22Klu tshinanu hixolune Messias minjene hiyrun-koxa Hoyakalu tokanu hinkakletatshine minjene hakanhanu hiyakolukaka hiyrunu himyekaklewatatshri kamhatshine hyokwijexyawakapna yine. Rumukatkamka haté Hoyakalu nurrene hyokwijetanu.
23Hiyáhoni hislahanru. Wane ntshinhi ptowru potuka hmuphujewnaknukawa.
Jeji Whene Hininri Piranapni
24Waneya Jesus wan-tshina:
— Xye hohne hajeru salewaktshi nikawninipa, waneklutka rutshpokanu tkatshi, hi katalupni ksuru,
25katahirine tenhohne hijrujini, hiyrun-koxa tenhohne hajerkaka hiyolikkako.
26Waneya Jeji Whene retanna, hohimkohi rapojini royaknuyma tsru pixkonuyma koxa.
27Hoyakalu yokanatanna htowrene hiwejikalune tenhohne hajene ptowru sretako rapatjexyawakapna Hoyakalu nurrene ptowru sreta tshiji hichpajikatshine.
Figueira Piranapni
28Waneya Jesus wan-tshina:
— Xawakni himatanru figueira pirana hasrujyawakhi. Hyinuwaka hiptsheklesurexinixka hiyrun-koxa rerotewapluxinixka, himatlu hi howukatkalu mhalu.
29Wane koxa rixanu, hexinpatkalu xyekaka himatanutka hi howukatkalu rakanhiywakapa.
30Hichinikanru xye: Xyekaka wan-hixa hiphujewnaletanu hmupnaknuhnapukawna xawakni mupnakanewa.
31Tenhohne tshij-koxa nikawnanu seyni ntokanu hikeklu nikawnanu.
32— Hike himatlu wale hohne hi hipapkoluko rakanhiywakapa xyekaka. Hiwejikalune Hoyakalu towrene tenhohne hajene hi himatlu, hi Whentshiko himatlu seyni Hirtshi tsonupka himatlu.
33Hiyáhoni hislahinri [hiyrunu hanjihohnetanu] klu tshinanu hixa hi himatlu rapojinri hohnepa.
34Satu jeji howuka yatshripa pixka rixanu. Hmayaknuhnapukawa htowutna htowrerune, rapsatna kamrurewjetatshine kamrurtshi hiyrun-koxa htowutlu hiphapto hislahatshri ruslahyawakaplu.
35Hiyáhoni hislahanu klu tshinanu hi himata hiklu hsatkapanu kapjiru. Ho kayiplahe ho hanikaj-yetshnoplahe ho hohistsiplahe ho yetshpotukawaplahe.
36Chinpotukawa runinipa hma mapyehixyawakanuphi himkatshinhi.
37Ntshinyawakhi ptowrunekhi ntshinanru: Halikak-potu hislahinri!
Currently Selected:
Marcos 13: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
