Eksodo 1

Aisraele enahoosiwa o Iguputo

1 # Gen 46.8-27 Anamwani aallopwana a Yakobo ayo yakelle o Iguputo ni olliyooyo ni mabanjiiweene yaari, 2Rubeni, Simeoni, Levi, Yuda, 3Isakara, Zebuloni, Benjamini, 4Dani, Nafutali, Gadi ni Ashere. 5Yosefe aari akeraattheye khalle o Iguputo. Echiwerengero ya athu ooyariwa mwa Yakobo yaari 70.#1.5: Ottaphullella wakhalle omodda wookhalla ni mawu awi 75 (onani Mit 7.14). 6Vano Yosefe aakhwa nave asinne ni mbadwiiwa muttheenoolle yaakhwattho. 7#Mit 7.17Koma Aisraele, edduullu ddiwa, yahaayara anamwani anchichi. Yaaruuwa, yahaata ekhalla amasiva manchichi nave eddalla ellapweeyo.

8 # Mit 7.18 Vatulli viwa o Iguputo waavollochihiwa mwene mmodda oyo ahimudduwellille Yosefe. 9Mwenooyo ahaalleella athwaaye wi, “Aisraelaalla ennaatesa nave tti amasiva manchichi onikhwaranya hiyaano. 10#Mit 7.19Nave ngiiwesesani, hiyaano neerena mweezeru athu yaalla. Naachenjerelle wi ehivirellelle waata kaambiiwa enthawi ya ekhoto, alliwaalla ttuuwora ottakanyiherana ni adanaahu ni ollipana ni hiyaano, eneerothawamo#1.10 eneerothawamo: apaalle eneerolamulella. mwiillaponi mwahummu.” 11Nave yahaahiyavo uullupalli a thangata owaaphariha mutteko Aisraelaayo mwa ekuku. Aisraele yaamumakella Faraooyo mizinda dda Pitomu ni Ramsesi, nko wasungiwa ddoocha. 12Koma alliwaayo yahoosiwiiwa wunchichi, yaanavirellella waata wi emwareyelle mu ellapo ettheeneeyo. Sika wi Aiguputo yaanawoova alliwaayo, 13nave yaanaawatihera mwa ekuku ophara mutteko wa okaporo. 14Okumi wa Aisraele waari wookatamiha ekaamba ya mutteko woovoreya wawoopa enjerwa navettho mitteko ddoohiyanahiyana dda m'matani. Yaanaawatihera mwa ekuku ophara mitteko ddittheddene ddootopiha.

15Sika mwene a o Iguputoolle aallota ni Sifira ni Puwa, azamba ayo yaakavihera atthiyana a Eheberi vooyarani wi, 16“Mwaawaayarihaka atthiyana a Eheberi, ayariwa mwaana aamullopwana, mwiipheni koma akhalla aamutthiyana, muhiyeni.” 17Koma azambaayo yaanamoova Mulluku, mwawi mawu a mwenaalle kheyaawaapwathillettho, sika anamwani aallopwanaayo yaanaahiya ni okumi. 18Vano mwenoolle aawiithana azambaalle ni waakoha wi, “Ethiyo kaambiiwa tini mwaahiyalleenyu ni okumi anamwani aallopwana?”

19Azambaalle yaamwaakhulla wi, “Atthiyana a Eheberi khenaphwanaphwana ni atthiyana a Aiguputo. Atthiyana a Eheberi tti amasiva vawi muzamba ahinaphiye, alliwa enakhalla emuyarille mwaana khalle.” 20-21Sika Mulluku aaweerella ddaphaama azambaayo nave ekaamba yawi azambaayo yaanamoova Mulluku, ahaavaha anamwani. Nave Aisraele yaavirellellave oruuwa, waata ni okhalla amasiva manchichi. 22#Mit 7.19Vano Farao ahaalamula athwaaye attheene wi, “Arive mwaana aamullopwana ooyariwa mwa Aheberi mumuvokhelleke m'muhinjeni wa Nailo koma anamwani attheene aatthiyana, mwaahiyeke ni okumi.”

Currently Selected:

Eksodo 1: MW2019

Highlight

Copy