Eksodo 16

Mana ni ayuurwe

1Vatulli viwa Aisraele attheene yaatimulla ovenyera o Elimu nave va nllapo na 15 na mweeri waneepiilli evenyille o Iguputo, yaaphiya o echipululu ya Sini, variyari va Elimu ni mwaango wa Sinai. 2Nave yaakhupanyella wa Mose ni Aroni muchipululuni mulle wi, 3“Waweerokhalla phaama Apwiya yaniiphelleke o Iguputo weewulle, nko nakhalleseehu nichaka enama ni buledi nave naanavona. Koma nyuwaano munikuselle o echipululu wuno wi muniiphe attheene ni ettalla.”

4 # Yoh 6.31 Vano Apwiya yaamulleella Mose wi, “Kineerewuuvahani yoocha eyo enaamore wonanko murimu ovenyera oddullu. Athu enaakhumeke nllapo ni nllapo enaya yatthukumanihaka yoocha yookwakhwanella nllapo nenno wi kiweese nave koone yaarimi ethwareke malamulwaaka apaalle iyaayi. 5Va nllapo naneetthanu ni nimodda, ewolleke nave ekhozeke yoocha yookwakhwanella mallapo meelli.”

6Sika Mose ni Aroni yahaalleella Aisraele attheene wi, “Misikuwa vaava muneerodduwella wi tti Apwiya yuukhumihalleni o Iguputo 7nave waasaka muneerewoona ntitimiho na Apwiya. Vawi ahiiwa okhupanya wanyu wowaavaanyiha. Ethiyo niri aani awi mukhupanyelleke wa hiyaano?” 8Nave Mose aallota wi, “Tti Apwiya ayo enuuvaheni misikuwa enama yawi muche nave ohinase buledi awi muvone, ekaamba yawi ahiiwa okhupanya wanyu ottheene woomuvaanyiha. Hiyaano niri aani? Okhupanya wanyu khemunakhupanyella wa hiyaano koma wa Apwiya.”

9Vano Mose aamulleella Aroni wi aalleelle athwaayo wi, “Waani mwiimelle vamiitthoni va Apwiya ekaamba yawi ahiiwa okhupanya wanyu ottheene.” 10Sika Aroni aallota wa mulloko muttheenoolle nave mullokooyo waarukunuwa oweha o echipululu nave ntitimiho na Apwiya nahooneya m'muraponi moorurumusa. 11Apwiya yaamulleella Mose wi, 12“Kohiiwa okhupanya wa Aisraele. Nave alleelle wi, ‘Misikuwa muneerekoocha enama nave ohinase muneerekomucha buledi ookwakhwanella, sika muneerodduwella wi mi tti Apwiya Mullukwaanyu.’ ”

13Misikuwa waaphiya ayuurwe nave yaaddalla virive veko vamisasanimvo. Osaka wene waakhalla nikame virive veko waapheella misasannddo. 14Nave nikamenno namallilliiwa, vatthi vatthevene va echipululu vahooneya ddeko ddooshashaalla wonanko nakhuttu. 15#1 Ako 10.3Aisraele yoonilliiwa ddekonnddo, kheyaaddidduwenlle nave yahaamba okohana wi, “Ethiyo ddenndda tti tini?”

Mose ahaalleella wi, “Olla tti buledi yuuvahilleni Apwiya wi mumuche. 16Apwiya aalamula wi arive muthu a nyuwaano amutthukumanihe moollikana ni mmo anaachelleeye, sika wi makilogaramu meelli arive muthu mu nibanja mwaye.”

17Nave Aisraele yaheera ddennddo, amodda yaamutthukumaniha munchichi nave amodda vang'ono. 18#2 Ako 8.15Koma yamulingalliiwa ni yoolingella ya makilogaramu meelli, yaphwanyille wi ayo yamutthukumanihalle munchichi kheyaarina oohalla nave ayottho yamutthukumanihalle vang'ono kheyaayelleelle. Arive muthu aatthukumanihalle moollikana ni muyezo. 19Mose ahaalleella wi, “Ahikhallevo anaasunge erive ello ophiyera ohinase.” 20Koma athu amodda kheyaamwiiwellelle Mose nave yaasunga yoocha emodda ophiyera ohinase. Ohinasevo yoocheeyo yaaddalla ni miingu nave yahunta. Vano Mose ahaashella murima. 21Sika orive ohinase arive muthu aanatthukumaniha moollikana ni muyezwaaye. Koma nndduwa naawaambaka oviha erive ello yoohalla vatthi yaanattotthowa.

22Koma va nllapo naneetthanu ni nimodda yaanatthukumaniha ya mallapo meelli, sika wi makilogaramu masese arive muthu. Vano oohoollella a Aisraele yaanawa wa Mose emulleella ddenndda. 23#Eks 20.8-11Vano Mose ahaalleella wi, “Apwiya aalamula wi, ‘Osiisello tti nllapo nawiithuuwa, na Sabata, noovelleelliwa wa Apwiya, apeyani nnddo munapaallaanyu waapeya nave arikani nnddo munapaallaanyu waarika. Ddoohallannddo muddisunge mvitthe ophiyera osiisello.’ ”

24Mose alamulalle ddenndda, athwaayo yaasunga yoohalleeyo ophiyera ohinase nave ettheeneeyo kheyaari ni miingu nave kheyaawuntalle. 25Nave Mose ahaalleella athwaayo wi, “Icheni yeella ollello vawi tti nllapo na Sabata na Apwiya vawi khamuyiphwanya vaattemva. 26Muyiwolleke wa mallapo matthanu ni nimodda. Koma va nllapo naneetthanu ni piilli, nllapo na Sabata, khamuyiphwanyaka.”

27Va nllapo naneetthanu ni piillinno, athu amodda yaaya wi yayiwolle koma kheyaayiphwanyille. 28Sika Apwiya yaamukoha Mose wi, “Ethiyo munaakhalleve athu ookhoota wiiwellella mawaaka ni malamulwaaka ophiyera niini? 29Upuwellani wi miyaano, Apwiya, kohuuvahani nllapo na Sabata. Sika ekaamba ya yeella va nllapo naneetthanu ni nimodda kinnuuvahani yoocha yookwakhwanella mallapo meelli. Arive muthu akhalleke nko ariiye va nllapo naneetthanu ni piilli.” 30Sika athu yaaniithuuwa va nllapo naneetthanu ni piilli.

31 # Num 11.7,8 Yoocheeyo Aisraele yayiromollille wi mana.#16.31 mana: Mawu yaalla eniiweya wonanko a Eheberi ayo enattaphullella wi Ethiyo yeella tti tini? (Onani evesi 15). Mooneyellwiiwa yaari wonanko miittho a mavilla navettho aweella. Voochani yaddiva wonanko buledi oowaapeyiwa moottakanyihera ni enwi. 32Vano Mose aallota wi, “Apwiya aalamula wi, ‘Musungewo mana mamodda wi edduullu ddanyu ddoone yoocha eyo kuuvahilleemini mu echipululu, kuukhumihalleni o Iguputo wulle.’ ” 33#Ahe 9.4Nave aamulleella Aroni wi, “Kusa moosungellamo ohiyemo mana ookwakhwana makilogaramu meelli. Weera ddiiddo ohiye vamiitthoni va Apwiya wi manaayo esungeye ophiyera enthawi ya edduullu ddanyu.” 34Moollikana ni mmo Apwiya yamulamulelliiwa Mose, Aroni aahiya moosungellamommo vahoollo va nibokosi na echipangano wi manaayo esungeye. 35#Yos 5.12Aisraelaayo yaakhalla echaka manaayo miyakha 40 ophiyera yaaphiya o ellapo wookhalla athu, omalireni wa ellapo ya Kanani. 36Makilogaramu meelli enallikana ni echigawo yaneekhumi ya yoolingella ya efa.

Currently Selected:

Eksodo 16: MW2019

Highlight

Copy