Eksodo 15

Nchipo na Mose

1 # Yaw 15.3 Vano Mose ni Aisraelaalle yahiipa nchipo wa Apwiya wi,

“Kinapaalla kiwiipelle Apwiya ekaamba yawi aapambana mootitimiheya,

ahaavokhella mu enyanja akavalo ni oowellavo.

2 # Mas 118.14; Yes 12.2 Apwiya sika masivaaka ni ekophollo ddaka,

alliwa tti oovullusaaka.

Alliwa tti Mullukwaaka nave kineerewaatitimiha,

tti Mulluku a attiitthaaka nave kineerewaatthamalla wunchichi.

3Apwiya tti mullupa akhoto,

Apwiya sika nnddina niwa.”

4“Apwiya yaavokhella mu enyanja magareta ni akhoto a Farao,

yahaapwiniha oohoollellaaye aphaama wunchichi mu Enyanja Yoofiira.

5Maaddi a enyanja yoowallamelleeyo yahaahuruwella attheene,

yaapwina ophiyera vatthi va enyanja wonanko nlluku.

6Nyu Apwiya, nnattanatta nanyu tti nootitimiheya, ekaamba ya masiviiwa,

Apwiya, nnattanatta nanyu ninnaanyenya adani.

7Munnaagonjiha adanaanyu ni ntitimiho nanyu nuullupalli,

osha murima wanyu onnawoosa wonanko mittatthi.

8Mwaaviddeellelleenyu maaddaalle, yahuukellana vanipuroni nimodda,

maaddi oothamaka yahiimella wonanko esiri,

embali yoowallamella ya enyanja yaari yoollipa.

9Mudanoolle aallota wi, ‘Kineerewaathwara nave kineerewaaphara,

kineerokawa eyuumiiwa nave murimaaka oneerokwakhwanihiwana,

kineerokhumiha nsupada nave kineerowoononga ni nnatta naka.’

10Koma mwahaaviddeellella ni ephevwaanyu nave enyanja yahaamirya,

yaapwina wonanko mukoko ophiyera vatthi va maaddi awoopiha.”

11“Nyu Apwiya, ethiyo vookhalla mulluku mmodda oophwanaphwana ni nyuwaano?

Ttaani ari wonanko nyuwaano, ootitimiheya ekaamba ya weella wanyu?

Ttaani ari wonanko nyuwaano vaweerani mitteko dda masiva ni ddoottikhiniha?

12Mwaatthoonyiha nnattanatta nanyu,

nave ethaya yahaamirya.”

13“Koma athu ayo mwawoopollilleenyu, mwahaahoollella ni echikondaanyu yoohimalla,

mwahaahoollella ni masivaanyu, oya onipuroni nanyu naweella.

14Mitundu ddimodda ddahiiwa nave ddaatthukumella,

woova wunchichi wohaaphara Afilisti.

15Sika vano mamwene a o Edomu aatathilla murima,

oohoollella a o Mowabu ahaamba otthukumella,

athu attheene enakhalla o Kanani aakukhumuwa.

16Attheenaayo ennoova wunchichi.

Ekaamba ya masivaanyu muullupalli,

alliwaayo eri ellapo tuu wonanko nlluku,

ophiyera athwaanyu, nyu Apwiya, eviralle,

athu mwawooponlleenyu wuukaporoni.

17Munnaavollochiha nave munnaahiya vamwaangonaanyu,

vanipuroni mvo nyu Apwiya mwapangilleenyu wi mukeraattheyevo,

mu enyumbaanyu eyo mwayimakelleenyu.

18Nyu Apwiya, muneerokhalla mwene wa enthawi yoohimalla.”

Nchipo na Miriyamu

19Mvo akavalo a Farao ni magareta ni oowella va akavalo yavollowilliiwa mu enyanja, Apwiya yahaahokollosella maaddaayo nave yaaweeriha attheenaayo wi epwine. Koma Aisraele yaheeta vawumma muwari mwa enyanjeeyo.

20Vano Miriyamu, namallotella aamutthiyana, murokoriye a Aroni, aamukusa maasa nave atthiyana attheene yaamuthwara vatulli ewiipaka amaasiiwa, yiinaka. 21Nave Miriyamu aawiipella alliwaayo nchipo nawi,

“Wiipelleni Apwiya ekaamba yawi aapambana mootitimiheya,

ahaavokhella mu enyanja akavalo ni oowellavo.”

Maaddi oowaawa

22Vano Mose ahaahoollella Aisraele ovenyera o Enyanja Yoofiira wulle eya yavollowa mu echipululu ya Shuri. Yaheeta mwemmo mallapo mararu, oohiphwanya maaddi. 23Nave yaaphiya o Mara koma wenko maaddiiwa yaari oowaawa, mwawi kheyaaworille waawirya. Sika ekaambiiwa nipuronno yanivahilliiwa nnddina nawi Mara.#15.23 Mara: Nnddina nenna mu Eheberi ninattaphullella owaawa. 24Nave athwaalle yaakhupanyella wa Mose, emukoha wi, “Ethiyo hiyaano ninaawirye tini?” 25Sika Mose aavekella moollipiha wa Apwiya nave Apwiya yaamooniha mwanakopo. Mose aavokha mwanakopooyo m'maaddini nave maaddaayo yaahiya owaawanko.

Wenko Apwiya yahaavaha athwaayo malamulo ni ehuddiho nave aaweesattho. 26Yaallota wi, “Mwaakiiwellellaka mi Apwiya Mullukwaanyu, muneera ddoolungama ni opwatha malamulwaaka ni wiiwellella nnddo kinuuhuddiheemini, nguullakani ni erive ereta eyo kaallakilleemina Aiguputo. Mi tti Apwiya ayo enuuchirihani.”

27Vatulli viwa yaaphiya o Elimu nko waari aneetuutu khumi ni eelli ni miteekho dda kanjeza 70. Nave yaatthipella misasa ddiwa vakhuviru ni mvo vaari maaddi.

Currently Selected:

Eksodo 15: MW2019

Highlight

Copy