Eksodo 22

Malamulo a eyuuma

1“Muthu iiya eng'ombe apaalle enkhosa, ayiipha apaalle oyikulliha, allivelle eng'ombe dditthanu va eng'ombe emodda apaalle enkhosa ddisese va enkhosa emodda.

2“Mullupaawiiya aphwanyeya akothollaka enyumba mahiiyu nave iiphiwa, muthu amwiiphallooyo ahillakiwe ekaamba ya nikhame na mullupaawiiyooyo. 3Koma iiphiwa osille, nndduwa nikhumalle, amwiiphallooyo allakiwe ekaamba ya nikhame naye. Arive mullupaawiiya anaphwanella ollivella. Mullupaawiiya aphariwa nave alephela ollivella mullatu, emukullihe ekaamba ya wiiyanko. 4Ello iiyalleeyeeyo yaphwanyeya eri ekumi m'mattani mwaye, khaya tti eng'ombe, bulu apaalle enkhosa, mullupaawiiyooyo allivelle opiilli.

5“Muthu aahiddipwatha eziweto ddaye nave ddavollowa m'matani mwa muthu mmodda, ddichamo mmiddo, mwaneena a eziwetonnddo#22.5 Muthu…eziwetonnddo: apaalle Muthu ahella munllo emata apaalle emata yampesa nave munllooyo wamuvulluwa oya woosa mpesa wa muthu mmoddiiwa, oovullusa munllooyo. ahokollose mmiddo waphaama wunchichi wa m'matani mwaye apaalle mpesaaye waphaama munchichi.

6“Muthu aviddeella munllo oya waphiya ohakani nave woosa mapwiddi a tirigu apaalle tirigu oohiretiwa apaalle emata eyo eri ni mmiddo, oyo addoosillooyo allivelle ddawoonongeyannddo.

7“Muthu asungiha wa muthu mmodda makobiri apaalle ddeko ddimodda ddoowallamella mutengo nave ddiiyiwa mpa mwa muthummo, mullupaawiiyooyo aphariwa allivelle opiilli. 8Mullupaawiiyooyo aahiphariwa, mwaneena a enyumboolle akuselliwe onipuroni noomullapella Mulluku wi ddidduwanyeye aarimi mwaneena a enyumbooyo ahimukusalle katundooyo.

9“Vakhalla waakanella ello ya mwaneena, khaya tti eng'ombe, bulu, enkhosa, epuri, ddoowara apaalle erive ello yarimeelle, eyo muthu mmodda analloteeye wi tti yaaye, athu eellaayo eweena vamiitthoni va Mulluku. Oyo Mulluku anamphwanyeeye wi tti oolakwa amullivelle mukhwaayooyo opiilli.

10“Muthu amwinnya muthu mmodda eng'ombe, bulu, enkhosa, epuri apaalle erive echiweto wi amusungelle nave echiwetweelle ekhwa, ephoreya apaalle yiiyiwa, 11ddisimikizeye voomullupellihani oosungooyo vamiitthoni va Apwiya wi khiiyalle ello ya mwaneeneeyo. Akhalla wi oosungooyo khiiyalle, mwaneenooyo aakhullelle ollupellanko nave oosungooyo ahillivelle. 12Koma akhalla wi oosungooyo ohiiya, allivelle. 13Yattakhuniwa ni enama ddamuhakani, akusewo ddoohallannddo wi ddikhalle omboni koma ahillivelle eyo yattakhuniwe ni enameeyo.

14“Muthu avalla echiweto wa muthu mmodda nave echiwetweeyo yaphoreya apaalle yakhwa mwaneenooyo ahiivo, muthu oovallooyo allivelle. 15Koma yakhwa mwaneenooyo arivo, oovallooyo ahillivelle. Apolleya ni makobiri echiweto nave yakhwa, ahillivelle ekaamba yawi aavelleella makobiri voopolleyani echiwetweeyo.

Malamulo a nllapo ni nllapo

16 # Deu 22.28,29 “Muthu araruwa ni namwalli oyo ahinatomeliwe, allivelle makobiri anaalamuliweeye nave amutthelle. 17Koma attiitthinnya a namwallooyo yakhoota wi muthooyo ahimutthelle mwaniwooyo, muthooyo aneerollivellave makobiri anaalamuliweeye.

18 # Deu 18.10,11 “Muthu aamutthiyana oweera ddookhwiri, iiphiwe.

19 # Lev 18.23; 20.15,16; Deu 27.21 “Arive muthu anakonana ni enama iiphiwe.

20 # Deu 17.2-7 “Arive muthu oovelleella mukutho wa milluku, ohiri wa Apwiyave, iiphiwe.

21 # Eks 23.9; Lev 19.33,34; Deu 24.17,18; 27.19 “Ohimuhoose mulleto apaalle omweeriha okhalla moopaneya vawi naweenettho waari mulleto o ellapo ya Iguputo. 22Ohimuhoose naamukhwelle apaalle mukhwaadduni. 23Waamuhoosaka, miyaano kineerowiiwa olliyooyo aawinllellaka wa miyaano. 24Nave kineerewuushella murima nave kineerowiipha okhotoni wi mwaariyo atthattuwe naamukhwelle nave anaawo etthattuwe ookhwelliwa.

25 # Lev 25.35-38; Deu 15.7-11; 23.19,20 “Wamukongoliha makobiri muthu oohoowa variyari vawo, oheereke wonanko eneerelliiwa aniihu ookongoliha makobiri, ohimuwatihere ovelleella makobiri awoonjereravo. 26#Deu 24.10-13Wakusa yawiikhuneella wa muthu mmodda wonanko echikole wi uullivelle makobiraawo, oyihokollose nndduwa nihinavollowe, 27vawi yawiikhuneellaaye tti yeeyove yootetezellana mwiillaaye. Vano aniikhuneelleke ni tini? Olliyoolla inlla wa miyaano wi kimukavihere, kineeromwiiwa kaambiiwa mi tti eechifundo.

28 # Mit 23.5 “Ohimullotelleke epewe Mulluku nave ohimutembeleleke muthu oyo anaahoollella athwaawo.#22.28 Mulluku: apaalle athu aweeruza.

29“Ohisellihe ovelleella wa miyaano ddoovelleella ddoovenyera va ddinchichi dda ddoohata ddawo dda vinywaawo ni dda makhuraawo a olivi.

“Waavelleellekettho wa miyaano anaawo aallopwana awaamba. 30Ovelleellekettho wa miyaano eng'ombe ddawo, enkhosa ddawo ni epuri ddawo ddawaamba. Mwaana awaambooyo anaakhalle ni amennya mallapo matthanu ni meelli nave oneeromuvelleella wa miyaano va nllapo naneetthanu ni raru.

31 # Lev 17.15 “Okhalle muthwaaka oopatuleya. Sika ohicheke enama yoottakhuniwa ni enama ddamuhakani koma waavahereke anapwa.

Currently Selected:

Eksodo 22: MW2019

Highlight

Copy