Eksodo 23

Echilungamo wa athu attheene

1 # Eks 20.16; Lev 19.11,12; Deu 5.20 “Ohinamoottheraka muthu mmodda. Ohilloteke omboni wawoottha nave ohimukavihereke muthu oolakwa voovelleellani omboni wawoottha. 2Naari athu anchichi yeeraka ddoonanara ohaattakihereke. Nave ohivelleelleke omboni wookhoromaniha echiweruzo munthatoni namillatu wi waaddivellihe athu anchichi. 3#Lev 19.15Waamweeruzaka muthu ohoowa, oheeruzeke moomukondella.

4 # Deu 22.1-4 “Woona eng'ombe ya mudanaawo ehollowaka apaalle bulwaaye, omukuse wamwinnye. 5Wamoona bulu a mudanaawo iikuhalle ni katundu, ohimukhwaranye koma omuvenyihe.

6 # Lev 19.15; Deu 16.19 “Muthu mmodda oohoowa aawiipiwaka mullatu, ohimwimmane echilungamo. 7Orekamellane ddawoottha. Ohimwiiphe muthu oohilakwa ni oolungama vawi miyaano ngimukhululukella muthu awiipha. 8Ohaakhullelle ddamukaphwani vawi nndda ddinnaweeriha athu oweeruza ohoona echilungamo nave sika mullatu onimaakhoromanella athu oohilakwa.

9 # Eks 22.21; Lev 19.33,34; Deu 24.17,18; 27.19 “Ohimuhoose mulleto. Weyaano onnadduwella mmo mulleto anakhallelleeye vawi naweenettho waari mulleto o Iguputo wulle.

Muyakha waneetthanu ni piilli navettho nllapo naneetthanu ni piilli

10 # Lev 25.1-7 “Wa miyakha mitthanu ni mmodda, ollimeke mmiddo m'matani mwawo nave owuhateke. 11Koma muyakha waneetthanu ni piilli oddiithuuwiheke ematannddo. Athu oohoowa sika enaacheke ddoomella dda m'matanimmo nave enama ddamuhakani ddinaacheke ddoohalla. Weereke emoddamoddave yeeyo ni emata ddampesa ni dda olivi ddene.

12 # Eks 20.9-11; 31.15; 34.21; 35.2; Lev 23.3; Deu 5.13,14 “Ophareke mutteko mallapo matthanu ni nimodda koma va nllapo naneetthanu ni piilli ohiphareke mutteko wi eng'ombe ddawo ddiithuuweke ni abulwaaweene nave wi masiva ehokollweelle mwa akaporwaawo ni alleto.

13“Wiiwesese ddittheddene kuulleelleminndda. Ohiddillapelleke milluku ddimodda nave ohiromollekettho ni manddiniiwa.

Ehakallallo ddiraru

(Eks 34.18-26; Deu 16.1-17)

14“Okhalleke ni nllapo na ehakallallo oraru vamuyakhani wi okititimihe miyaano. 15#Eks 12.14-20; Lev 23.6-8; Num 28.17-25Okhalleke ni nllapo na Ehakallallo ya Buledi Oohikhalla ni Yisiti. Wonanko mmo kuulamulelleemi, omucheke buledi oohikhalla ni yisiti mallapo matthanu ni meelli mu mweeri wa Abibu, ekaamba yawi mweeri yooyo waavenyawo o Iguputo. Arive muthu ahiphiyeke vakhuviru ni miyaano ari mattave.

16 # Lev 23.15-21; Num 28.26-31; Lev 23.39-43 “Okhallekettho ni nllapo na Ehakallallo ya Ddoohata Ddawaamba va enthawi yawaamba ohata. Okhallekettho ni nllapo na Ehakallallo Yootthukumaniha Ddoohata ddittheddene va omalla wa muyakha. 17Sika allopwana attheene yooneyelleke vamiitthoni va mi Apwiya Mullukwaanyu, oraru vamuyakhani.

18“Waavelleellaka mukutho wa enama wa miyaano, ohivelleelleke ni buledi ookhalla ni yisiti nave makhura a enama yoovelleella va nllapo naka na ehakallallo ehisungiwe ophiyera ohinase.

19 # Deu 26.2; Eks 34.26; Deu 14.21 “Oweekena ddeko ddaphaama wunchichi dda ddoohata ddawo ddawaamba dda m'matani mwawo, onipuroni na mallapello na Apwiya Mullukwaawo.

“Ohaapeyeke enama ya musaana a epuri apaalle a enkhosa voopharihellani mutteko mukaka wa amennya.

Malonjezo ni malangizo

20“Kineeromurumiha mungelwaaka vahoollo vanyu wi uutetezeni mu ettilla ni wuuphiyihani onipuroni nko kuukhozelleemini. 21Mumwiiwelle olliyooyo nave mwiiwesese nnddo anaalloteeye. Muhimuwukile vawi khawa uukhululukellakani nichimo nawi ddiidda vawi masivaaka eri mwa olliyooyo. 22Koma mwamwiiwella olliyooyo ni weera ddittheddene kinaalloteemi, miyaano kineerewiitana ni adanaanyu nave kineerewaagonjiha attheene ayo enuuvaanyihekeni. 23Mungelwaaka aneerewuuhoollellani nave aneerewuuvollochihani mu ellapo ya Aamori, Ahiti, Aperezi, Akanani, Ahivi ni Ayebusi nave kineerowoononga attheenaayo. 24Sika muhiddikokhorelle milluku ddiwa apaalle oddillapella. Muheerekena nnddo eneeresa athu yaayo. Moonongelleetu milluku ddiwa navettho mwakumulle apotwiiwa oollapellavo. 25Mwaallapelleke Apwiya Mullukwaanyu wi kuudaliseni vawuuvahani yoocha ni maaddi nave kineerewuuchirihani ereta ddittheddene. 26Khakhallavo mutthiyana naari mmodda anaanyingalle nihaka mwiillaponi mwanyummo naari oohiyara khaphwanyeyamo. Kineerewuuvahani okumi woorekama.

27“Kineeroweeriha wi ekooveke miyaano athu attheene enaallipaneke ni nyuwaano. Kineerowaapheelliha muru athu ayo munaawanekeenyuna. Nave kineerowiikariha adanaanyu attheene. 28Kineerowiikara Ahivi, Akanani ni Ahiti muhinaphiye nave eneerothawa wonanko kaarumihelle enwi.#23.28 eneerothawa…enwi: apaalle kaambiiwa kineeroweeriha wi epaneye. 29Ngiwiikariha mu muyakha mmodda woova wi mu ellapweeyo khemukhalla athu nave wi enama ddamuhakani ddineerottotthollanamo. 30Koma kinaawiikareke vang'ono vang'ono ophiyera mwaayarille anamwani anchichi ayo enaakuse ellapweeyo. 31Kineerokeraatthiha ellapwaanyu ovenyera o Enyanja Yoofiira ophiya o enyanja ya Afilisti navettho ovenyera o echipululu ophiya o muhinje wa Yufurate. Kineeroweerihani wi mwaagonjihe athu ookhalla mu ellapweeyo nave muneerowiikariha. 32Muheerena echipangano alliwaayo naarittho milluku ddiwa. 33Ehikhalleke mwiillaponi mwanyu, woova wi enuuchimwiheni. Mwaallapellaka milluku ddiwa, ddawoona, munimaphariwa m'musamphani.”

Currently Selected:

Eksodo 23: MW2019

Highlight

Copy