Eksodo 24
24
Okeraatthihiwa wa echipangano
1Apwiya yaamulleella Mose wi, “Ngawa wa miyaano omwaangoni wuno ni Aroni, Nadabu, Abihu navettho oohoollella 70 a Aisraele. Vano mukillapelleke miyaano muri voorekamella. 2Weyaano Mose sika onaakaatamelle koma amoddaayo ehikaatamelle. Aisraele attheene oohallaayo ehiwe omwaangoni.”
3Mose aaya aalleella athu mawu ni malamulo mattheene ayo Apwiya yamulleelliiwa. Nave athwaayo yahaakhulla vamodda wi, “Nineereweera ddittheddene nnddo Apwiya ellotilliiwa.” 4Nave Mose aalemba mawu mattheene a Apwiya. Nave aavenya moopeha ohinase aamba omaka nikuwa museresere mwa mwaango. Nave ahiimesa malluku khumi ni meelli a malloko khumi ni meelli a Aisraele. 5Vano ahaaruma asombwe a Aisraele wi yavelleelle mikutho ddooshellelliha ni wiipha eng'ombe wi yavelleelle wa Apwiya mikutho ddeeyaattano. 6Mose aakusawo hafu a nikhame, anihella mu embale nave nikhame noohalla aaniithella vanikuwani. 7Vano aakusa nibukhu na echipangano, aweerengella athwaayo mowiiweya phaama. Nave athwaayo yaallota wi, “Nineereweera ddittheddene nnddo Apwiya ellotilliiwa nave nineerowiiwellella alliwaayo.”
8 #
Mat 26.28; Mrk 14.24; Luk 22.20; 1 Ako 11.25; Ahe 10.29;
Ahe 9.19,20 Vano Mose aakusa nikhame na m'mbaleninne aamiddana athwaayo nave aallota wi, “Nikhame nenna sika ninasimikiza echipangano eyo Apwiya ekeraatthihalliiwa ni nyuwaano vawuuvahani mawu mattheenaalla.”
9Sika Mose, Aroni, Nadabu ni Abihu navettho oohoollella 70 a Aisraele yaawella mwaango 10nave yaamoona Mulluku a Aisraele. Vatthi va manyallwaaye vaakhalla ello yawooneya wonanko musewu woopangiwa ni nlluku na safiro noowala wonanko oddullu. 11Mulluku khaawoonongille oohoollella a Aisraelaayo. Alliwaayo yaamoona Mulluku nave yaacha ni owirya.
Mose vamwaangoni wa Sinai
12Apwiya yaamulleella Mose wi, “Ngawa wa miyaano omwaangoni wuno nave otiyere weewuno. Kineerewuuvaha malluku ayo kilembilleemivo malamulo wi kaahuddihe athu.” 13Vano Mose aatimulla ni oomurumeyellaaye, Yoswa nave Mosooyo aawella mwaango wa Mulluku.#24.13 Mose aatimulla: Ottaphullella wakhalle omodda wookhalla ni mawu awi (Mose ni Yoswa) yaatimulla. 14Olliyooyo aari aalleellille khalle oohoollellaalle wi, “Munitiyereke vaava ophiyera nuuphwanyeni. Aroni ni Huri munaakhallekena vaava. Oyo anaakhalleke ni millatu ddaye ayeekena wa alliwaayo.”
15Sika Mose aawella mwaango nave mwaangooyo waakhuneelliwa ni murapo. 16Ntitimiho na Apwiya naakitthella vamwaangoni wa Sinai nave waakhuneelliwa ni murapo mallapo matthanu ni nimodda. Va nllapo naneetthanu ni piilli, Apwiya yaamwiithana muwari mwa murapommo. 17Wa Aisraelaalle, ntitimiho na Apwiyanne nooneya wonanko okhara wa munllo vamwaangoni. 18#Deu 9.9Mose aavollowa m'muraponimmo aphiya vaddullu va mwaango. Mose aakhalla wenko mallapo 40, otthaana ni mahiiyu.
Currently Selected:
Eksodo 24: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
