Eksodo 6
6
1Koma Apwiya yaamulleella Mosooyo wi, “Vano oneerewoona nnddo kinaamweerelleemi Farao. Kineeromuwatihera ni nnatta naka namasiva wi aakhumihe athwaaka. Navettho aneerowiikariha mwiillaponi mwaye.”
Mulluku anamwiithana Mose
2 #
Gen 17.1; 28.3; 35.11; Eks 3.13-15 Mulluku amulleella Mose wi, “Mi tti Apwiya. 3Kahooneyella wa Abrahamu, wa Isaki ni wa Yakobo wonanko Mulluku Amasiva Mattheene koma ngaawaalleelle nnddina naka wi tti Apwiya.#6.3 Apwiya: Onani 3.14. 4Kaakeraatthihana echipangano waalonjeza wi kineerewaavaha ellapo ya Kanani, mmo yakhanlliiwamo khalle wonanko alleto. 5Vano kohiiwa okhuwa wa Aisraele, ayo eri wuukaporoni m'mattani mwa Aiguputo nave kohuupuwella echipanganwaaka. 6Sika weyaano waalleelle Aisraele mawaaka awi, ‘Mi tti Apwiya. Nave kineerewuukhumihani mu okaporo m'mattani mwa Aiguputo nave kineerewuuvullusani o mutteko wa kalavulagaga. Nave kineerowoopollani ni nnatta naka namasiva ni ollaka wawoopiha. 7Kineerowaakhullellani nyuwaano wonanko athwaaka nave miyaano kineerokhalla Mullukwaanyu. Muneerodduwella wi mi tti Apwiya Mullukwaanyu, oyo uuvullusalleni o mutteko wa kalavulagaga. 8Nave kineerewuuphiyihani o ellapo eyo kallupenlleemi wi kineeromuvaha Abrahamu, Isaki ni Yakobo. Kineerewuuvahani ellapo yeeyo wi ekhalle yaanyuyaanyu. Mi tti Apwiya.’ ” 9Mose ahaalleella ddenndda Aisraele koma alliwa kheyaamwiiwellelle kaambiiwa alliwa yaari etathillalle murima khalle vookhallani mu okaporwiiwa wa ekuku yawi ddiidda.
10Vano Apwiya yaamulleella Mose wi, 11“Khawe wamulleelle Farao wi awaakhullelle Aisraele wi evenyemo mwiillaponi mwaye.”
12Koma Mose ahaalleella Apwiya wi, “Aisraelaayo khenakiiwellella. Ethiyo Farao anaakiiwellelle mwawiidde? Miyaanothi valle nginawora ollota phaama.”
13Koma Apwiya yaamulamula Mose ni Aroni wi yaalleelle Aisraele ni Farao mwene a o Iguputo wi alliwaayo enaphwanella waavenyihamo Aisraelaayo mu ellapo ya Iguputo.
Mibado dda Mose ni Aroni
14Anamwani a Rubeni, mwaana aamullopwana awaamba a Yakobo, yaari, Hanoki, Palu, Hezironi ni Karimi. Yaalla sika yaari makhollo a mabanja ayo yaromolliwa ni nnddina niwa. 15Anamwani a Simeoni yaari, Yemuwele, Yamini, Ohadi, Yakini, Zohari ni Shaulo mwaana ooyariwa mwa mutthiyana a o Kanani. Yaalla sika yaari makhollo a mabanja ayo yaromolliwa ni nnddina niwa. 16#Num 3.17-20; 26.57,58; 1 Epi 6.16-19Manddina a anamwani a Levi moollikana ni oyariwa wiwa yaari, Gereshoni, Kohati ni Merari. Levooyo aakhalla ni okumi wa miyakha 137. 17Anamwani a Gereshoni yaari, Libini ni Shimeyi, makhollo a mabanjiiwa. 18Anamwani a Kohati yaari, Amuramu, Izihara, Hebroni ni Uziyele. Kohati aakhalla ni okumi wa miyakha 133. 19Anamwani a Merari yaari, Mali ni Mushi. Vano yaalla sika yaari mabanja a Levi ni edduullu ddiwa.
20Amuramu aamutthella murokoriwa a attiitthinnya nnddina naye Yokebede. Yokebedooyo aamuyara Aroni ni Mose. Amuramu aakhalla ni okumi wa miyakha 137. 21Anamwani a Izihara yaari, Kora, Nefegi ni Zikiri. 22Anamwani a Uziyele yaari, Mishaele, Elizafani ni Sitiri.
23Aroni aamutthella Eliseba, mwaana a Aminadabu nave murokoriye a Nashoni. Eliseba aamuyara Nadabu, Abihu, Eleazara ni Itamara. 24Anamwani a Kora yaari, Asiri, Elikana ni Abiyasafu. Yaalla sika mabanja a Kora. 25Eleazara, mwaana a Aroni, aamutthella mmodda mwa anamwani a Putiyele, oyo amuyarelle Finehasi. Vano yaalla sika yaari makhollo a mabanja a Alevi.
26Mose ni Aroni tti alle Apwiya yaalleelliiwa wi, “Akhumiheni Aisraele mu ellapo ya Iguputo, mallokomalloko.” 27Yaalla sika yamuvekille Farao, mwene a o Iguputo wi yaahoollelle Aisraele ovenyamo mu Iguputo.
Apwiya enalamula Mose ni Aroni
28Apwiya yaallota wa Mose o Iguputo 29wi, “Mi tti Apwiya. Wamulleelle Farao mwene a o Iguputo ddittheddene kinaawuulleelleemi.”
30Koma Mose ahaalleella Apwiya wi, “Nyu munnadduwella valle wi miyaano nginawora ollota phaama ddene, vano Faraooyo anaakiiwellelle mwawiidde?”
Currently Selected:
Eksodo 6: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
