Eksodo 7

1Apwiya yaamwaakhulla Mose wi, “Ngoona, kineeroweeriha wi okhalle wonanko Mulluku wa Farao nave mwanamunno, Aroni, sika anaakhalle wonanko eyanwaawo. 2Wamulleelle Aroni ddittheddene kuulamulelleeminndda nave olliye sika anaamulleelle Farao wi awaakhullelle Aisraele okhuma mwiillaponi mwaye. 3#Mit 7.36Komathi kineeromummiha murima nave naari keereve ddoottikhiniha ni ezizindikiro ddinchichi o Iguputo, 4Faraooyo khawiiwellellani. Vano kineeromullaka Iguputo vaweerani mitteko dda masiva nave kineerewaahoollella malloko a athwaaka, Aisraele, waakhumiha o Iguputo. 5Sika Aiguputo eneerodduwella wi mi tti Apwiya, kaallaka nave kaakhumiha Aisraele mwiillaponi mwiwammo.” 6Nave Mose ni Aroni yaheera nnddo Apwiya yaalamulalliiwa. 7Enthawi yeeyo yallotiiwa ni Farao, Mose aari ni miyakha 80 nave Aroni aari ni miyakha 83.

Ekopo ya Aroni

8Vano Apwiya yaamulleella Mose ni Aroni wi, 9“Farao uulamulani wi, ‘Erani yoottikhiniha.’ Weyaano Mose wamulleelle Aroni wi, ‘Kusa ekopwaawo, yiivokhelle vatthi vamiitthoni va Farao wi etthattuwe enowa.’ ” 10Sika Mose ni Aroni yaaya wa Farao yeera moollikana ni mmo Apwiya yaalamulalliiwa. Aroni ayivokhella vatthi ekopwaayeelle vamiitthoni va Farao ni enduna ddaye nave yaatthattuwa enowa. 11Vano Farao aawiithana athwaaye eezeru ni amasenga. Nave alliwaayo yaheerattho emoddamoddave yeeyo mwa masengiiwa. 12Yaaddivokhellattho vatthi ekopo ddiwa nave ddaatthattuwa enowa. Koma enowa ya Aroneeyo yaaddimirya enowa ddiwannddo. 13Farao ahummave murima nave khaapwathille nnddo yamulleelliiwa moollikana ni mmo Apwiya yallotelliiwa.

Yoottikhiniha yawaamba: Maaddi enatthattuwa nikhame

14Vano Apwiya yaamulleella Mose wi, “Farao tti awumma murima wunchichi vawi animakhoota owaakhullella athwaaka wi evenyewo. 15Oyeewo ohinase wakumanena ayaaka omuhinjeni wa Nailo. Wamutiyerelle vakhwipi va muhinjooyo. Navettho okuse ekopo yatthattuwalle enoweelle.” 16Wamulleelle wi, “Apwiya Mulluku a Aheberi, ookiruma wa nyuwaano wi kuulleelleni mawu awi, ‘Owaakhullelle athwaaka wi evenyewo wi eye yakillapelle ochipululuni.’ Koma ophiyera ollello khokiiwellelleve. 17#Yaw 16.4Sika Apwiya eneereweera ddeko wooniha wi tti Apwiya. Ngoona, kineerowashulla maaddi a m'muhinjenimmu ni ekopo eri m'mattani mwakeella nave maaddi mattheenaalla eneerotthattuwa nikhame. 18Ehomba ddittheddene ddineerokhwa nave maaddaayo eneerewunkha, mwawi Aiguputo kheworattho owirya maaddi a m'muhinjeni yoolla.”

19Apwiya yaamulamulattho Mose wi, “Mulleelle Aroni wi, ‘Kusa ekopwaawo, oyitthoonyihelle omaaddini mattheene a mu Iguputommu wonanko mihinje, mitthipidda, matokwi ni mathiyeene. Nave maaddi a mwiillaponi mutthemwene eneerotthattuwa nikhame nave mwiillaponi mutthemwenemmo munaakhalle nikhameve naari ni muddoorikellamo maaddi ddene, dda miteekho ni dda malluku.’ ”

20Sika Mose ni Aroni yaheera moollikana ni mmo Apwiya yaalamulalliiwa. Aroni#7.20 Aroni: Mu Eheberi mookhalla mawu awi olliye. aakusa ekopwaaye awashullana maaddi a m'muhinjeni vamiitthoni va Farao ni enduna ddaye nave maaddi mattheenaayo yaatthattuwa nikhame. 21Ehomba ddittheddene dda m'muhinjenimmo ddaakhwa nave Aiguputwaayo kheyaaworille owirya maaddaayo ekaamba yawunkhanko. Nave mu ellapo ettheene ya Iguputo mwaari nikhameve. 22Koma amasenga a o Iguputwaalle naalliwattho yaheera ddennddo mwa masengiiwa sika wi Farao ahummihave murima. Khaawiiwellelle Mose ni Aroni moollikana ni mmo Apwiya yallotilliiwa. 23Sika Farao aahokollweella o enyumba waye ohiddipwathattho ddennddo. 24Aiguputo attheene yahaamba okata museresere mwa muhinje wa Nailo wi erike maaddi oowirya vawi kheyaaworattho owirya maaddi a m'muhinjenooyo.

25Vaavira mallapo matthanu ni meelli Apwiya enanarihalle muhinjoolle.

Currently Selected:

Eksodo 7: MW2019

Highlight

Copy