Genesis 24

Mwaara Isaki

1Vano Abrahamu ahuulluvalla wunchichi nave Apwiya yaamudalisa mu ddaweera ddaye ddittheddene. 2Nllapo nimodda aamulleella mullupa muttekwaaye muullupalli oyo awehera eyuumaaye ettheene wi, “Ngakiphare vatthi va kasambaroolla#24.2 vatthi va kasambaroolla: Ella yaari ettilla yaweeriha wi ollupella ohiwe orukunusiwa. nave ollupelle. 3Kinapaalla wi ollupelle vamiitthoni va Apwiya Mulluku ooddullu ni vatthi wi khomwaashera mutthiyana mwanaka variyari va anamwalli a Akanani wuno niriihunngu. 4Oye owaani nave wamwaashere mwanaka mutthiyana wenko variyari va abalaaka.”

5Koma mullupa muttekooyo aakoha wi, “Ethiyo keere tini mutthiyanooyo aahipaallaka wuno? Ethiyo mwaninyu kimuhokolloselle o ellapo eyo mwavenyenreenyu?”

6Abrahamu ahaakhulla wi, “Woonesese wi ohiwe omuhokollosella wenko mwanaka. 7Apwiya Mulluku Muullupalli, aakikusa owanihu mu nibanja na attiitthaaka ni mu ellapo kayarelliweemimo nave aakilonjeza moollupella wi, ‘Ellapo ella kineerovaha edduullu ddawo.’ Apwiya eneeromuruma mungelwiiwa uuhoollelle nave wenko oneeromwaashera mutthiyana mwanaka. 8Mutthiyanooyo aahipaallaka wuuthwara wuno oneerottaphuwa o ollupellanngu. Komave ddeerevedde, ohiwe omuvelleella mwanaka wi akhalle wenko.” 9Sika mullupa muttekoolle aahiya nnatta naye vatthi va kasambara a Abrahamu apwinnya nave aallupella wi, “Kineereweera ddittheddene mullonteenyu.”

10Vano mullupa muttekooyo aakusa ekamira* khumi dda apwinnya ni emphaso ddinchichi ddoowallamella mutengo nave aaya o muzinda wa Nahori, mu ellapo ya Mesopotamiya. 11Aphiyalle aaddikokhoriha vatthi ekamirannddo vakhuviru ni ehime, otte wa muzinda. Ddawoona waari misikuwa enthawi yooya atthiyana woorika maaddi. 12Mullupa muttekooyo aavekella wi, “Apwiya Mulluku a apwiyaaka Abrahamu, kinimuuvekani wi ddeko ddikeetelle phaama ollello nave moonihe lonjezo nanyu noohimalla va apwiyaaka Abrahamu. 13Kiri veehimenimva nave atthiyana a m'muzindanimmu enimawa wi erike maaddi. 14Miyaano kineeromuveka namwalli mmodda wi, ‘Kinuuvekani wi murulle munwaanyooyo wi kiwirye maaddi.’ Namwallooyo aakhullella wi, ‘Wiryani nave kiddiwiryihettho maaddi ekamira ddanyu,’ Yooyo sika anaakhalle namwalli oyo mumutthoollelleenyu oorumeyellaanyu Isaki. Ddenndda ddeereya, kineerodduwella wi mohaasungella lonjezo noohimalla apwiyaaka.”

15Ahinamallihe ovekella aamoona moorurumusa Rebeka iireyille muno vanthurini. Olliyoolla aari mwaana a Betuele, mwaana a Milika, mwaara Nahori, mwanamunne a Abrahamu. 16Rebeka aari namwalli ooreera wunchichi nave oohimudduwella mullopwana. Olliye aakitthella wiihimeni wulle nave arikenlle maaddi m'munoni aakhumawo. 17Vano mullupa muttekoolle aamuthamakella wi akumanena nave aallota wi, “Pepaani, kivaheni maaddi a m'munoni mwanyu wi kiwirye.”

18Namwallooyo aallota wi, “Wiryani apwiya.” Nave mwawaakuva aarulla munwaayoolle vanthurini, awuphareellella wi mulletooyo awirye. 19Mulletoolle awiryalle maaddaayo, namwallooyo aallota wi, “Kineerowaanattho maaddi wi ekamira ddanyu ddittheddenennddo ddiwirye mookwakhwana.” 20Mwawaakuva ahiithella maaddi ammunonaalle moowiryella enama nave aahokollweella wiihimeni wulle. Nave aarika maaddi mamodda wi awiryihe ekamira ddittheddenennddo. 21Mulletoolle aarimi phee, anawehesesa nnddo eera namwallooyo wi oone Apwiya yaarimi edalisalle olendwaaye apaalle iyaayi.

22Namwalloolle amallihalle owiryiha ekamirannddo, mulletoolle aakhumiha echipini ya golide yoowallamella mutengo wonanko hafu ya sekeli, amuwariha Rebeka vaphunani vaye. Aamuwarihattho m'miwonini mwaye ebangili piilli ddoowallamella mutengo wonanko makobiri a golide khumi. 23Vano aamukoha wi, “Pepaani, killeelle, ethiyo attiittho ttaani? Ethiyo nookhallavo nipuro nawi ttuukona miyaano ni akhwaakaalla?”

24“Attiitthaaka tti Betuele, mwaana a Nahori oyo amuyarelleeye Milika.” 25Aavirellella ollota wi, “Ddoocha dda enamanndda ddookhallawo owaani nave nipuro nawi nyuwaano ttuukonavo nookhallawottho.”

26Vano mulletoolle aakokhora vatthi nave ahaallapella Apwiya. 27Nave aallota wi, “Etitimihiwe Apwiya Mulluku a apwiyaaka Abrahamu, ayo esungalle moororomelleya lonjezo niwa wa apwiyaaka. Apwiya aakihoollella miyaano wa abale a apwiyaaka.”

28Sika vano namwalloolle aathamakella o enyumba ya amennya, aatthopoollella mwaha muttheenoolla. 29‏-30Vano Labani, murokoriye a Rebekooyo aathamakella wiihimeni waari mullupa mutteko a Abrahamu wulle. Labani ahoona echipiniille ni ebangili m'muwononi mwa murokoriye nave aamwiiwa Rebekooyo allotaka nnddo muthooyo amulleelleeye. Aphiyalle veehimeni valle, amuphwanyille mullupa mutteko a Abrahamoolle iimenlle vakhuviru ni ekamira. 31Nave aamulleella mulletooyo wi, “Hankoni wuno vawi nyuwaano tti muthu oyo Apwiya emudalisalliiwa. Kaambiiwa tini mwiimenlleenyu wuno? Miyaano kohuupotokosellani khalle nipuro mpa mwahu navettho nipuro nookonavo ekamira ddanyu.”

32Sika mulletoolle aavollowa mpa nave Labani aamuttaphulla katundu ddamutukhullalle ekamirannddo. Vatulli viwa aaddivaha munyepu ni yoocha ekamirannddo navettho ahaavaha maaddi wi ehape alleto attheene. 33Ewiille yoocha, mulletoolle aallota wi, “Ngicha ophiyera killonte nnddo kiweelleemi.”

Vano Labani aamulleella wi, “Llotani.”

34Olliyooyo aallota wi, “Mi tti mullupa mutteko a Abrahamu. 35Apwiya ahaadalisa wunchichi apwiyaaka nave aawunnuwiha wunchichi. Ahaavaha enkhosa ni epuri ni eng'ombe ddinchichi. Ahaavahattho siliva ni golide, akaporwiiwa aallopwana ni aatthiyana navettho ekamira ni abulu anchichi. 36Sara, amwara a apwiyaaka naari yuulluvanlle yahaayarella mwaana aamullopwana. Vano apwiyaakaayo aamuvaha eyuumiiwa ettheene mwaanooyo. 37Sika vano apwiyaaka yaakillupelliha wi kisunge mawiiwa wi, ‘Mwanakoolla ohiwe omwaashera mutthiyana variyari va anamwalli a ellapo ella ya Kanani, wuno kinakhalleemiwo. 38Koma oye owaani wa attiitthaaka ni abalaaka, wamukuselle mutthiyana mwanaka wenko.’ 39Nave kaawaakhulla apwiyaaka wi, ‘Ethiyo keere tini mutthiyanooyo akhoota okithwara wuno?’ 40Alliwa yaakaakhulla wi, ‘Apwiya ayo kikhanlleemi kiwiiwellellaka enthawi ddittheddene, eneeromuruma mungelwiiwa wi eete nimodda ni weyaano nave aweeriha wi ddiweetelle phaama. Nave oneeromwaashera mwanaka mutthiyana ovenyera wa athwaaka, o nibanja na attiitthaaka. 41Weera ddenndda, oneerottaphuwa o ollupell nngu. Koma weyaano waphiya onibanjani nakanno, athwaakaayo yuukhoota, oneerottaphuwa o ollupellanngu.’

42“Vano ollellova kiphiyalle veehimeni, kaavekella wi, ‘Apwiya Mulluku a apwiyaaka Abrahamu, mukikavihere wi ddikeetelle phaama voolendonaakoolla. 43Kiri veehimenimva, vaawa namwalli wi arike maaddi, miyaano kimuveka wi, kivaheni maaddi m'munoni mwanyummo wi kiwirye. 44Olliye aakaakhulla wi wiryani navettho kineerowiryiha ekamira ddanyunndda, yooyo anaakhalle namwalli oyo Apwiya emutthoollilliiwa wi akhalle mwaara a mwaana a apwiyaaka.’ 45Kihinamallihe wene ovekella wakanko, moorurumusa kaamoona Rebeka iireyille muno vanthurini, akitthellaka wiihimeni wi arike maaddi. Sika kaamuveka wi, ‘Kivahe maaddi kiwirye.’ 46Mwawaakuva aarulla munwaaye vanthurini, akilleella wi, ‘Wiryani nave kineerowiryihattho ekamira ddanyunndda.’ Sika kaawirya nave olliyooyo aawiryihattho ekamirannddo. 47Vano kaamukoha wi, ‘Ethiyo attiittho ttaani?’ Olliye aakaakhulla wi, ‘Attiitthaaka tti Betuele, mwaana a Nahori oyo amuyarelleeye Milika.’ Enthawi yeeyo kaamuwariha echipini vaphunani navettho ebangili vamuwononi. 48Vano kaakokhora vatthi kaatitimiha Apwiya. Kahaatitimiha Apwiya Mulluku a apwiyaaka Abrahamu, ekaamba yookihoollella phaama wunchichi. Apwiya aakiphiyiha wa mbaliiwa a apwiyaaka, nko kimphwanyeemiwo mwanaye oyo anaakhalle mwaara a mwaana a apwiyaaka. 49Nave vano mwapaalla oweerella echifundo moororomelleya apwiyaaka, killeelleni navettho mwaahipaallaka killeellenittho wi miyaano koone yaweera.”

50Labani ni Betuele yahaakhulla wi, “Vawi nndda tti ddoovenyera wa Apwiya, hiyaano khaninna yoollota. 51Ngoonani, Rebeka olla mukuseni murowekena. Mwamuvelleelle wa mwaana a apwiyaanyu wi akhalle mwaariye moollikana ni mmo Apwiya ellotellwiiwa.” 52Mullupa mutteko a Abrahamoolle iiwalle mawaalla, aakokhora vatthi aatitimiha Apwiya. 53Vano aakhumiha ddeko dda siliva ni dda golide ni ddoowara nave aaddivelleella wa Rebeka. Aavelleellattho emphaso ddoowallamella mutengo wa murokoriye a Rebekooyo ni wa amennya.

54Mullupa muttekooyo ni athu aariiyenaayo yaacha ni owirya nave yaakona wenko. Evenyille ohinase, mulletooyo aallota wi, “Kittaphulleni wi kihokollweelle wa apwiyaaka.”

55Koma amennya Rebeka ni murokoriyooyo, yaallota wi, “Iyaayi, namwalloolla akhalleve ni hiyaano enthawi vang'ono, yoohiyeveella mallapo khumi, vatulli viwa sika aneeroyaawo.”

56Koma mullupa muttekooyo aallota wi, “Pepaani, muhikisellihe wawi Apwiya aakeetiha phaama wunchichi voolendonaakoolla. Kittaphulleni wi kihokollweelle wa apwiyaaka.”

57Sika yaamwaakhulla wi, “Hankoni nimwiithane namwallooyo wi nimukohe.” 58Sika yaamwiithana Rebeka emukoha wi, “Ethiyo onnapaalla othaananana ni mulletoolla?”

Rebeka ahaakhulla wi, “Ee, kineerothanana.”

59Sika yaamwaakhullella Rebekooyo ni mullupa muttekwaaye aamutthiyana ovenyera enamwanaaye wi ethaanane ni mullupa mutteko a Abrahamu ni athwaaye oomuvelleella. 60Nave yaamudalisa Rebekooyo voollotani wi,

“Weyaano murokorihu, Apwiya yuudalise wi

okhalle moowe a athu awaata wunchichi.

Edduullu ddawo ddineerewaagonjiha adaniiwa.”

61Vano Rebeka ni akaporwaaye aatthiyana yaatimulla ewella ekamira, enathaanana ni mulletoolle. Nave mullupa mutteko a Abrahamoolle aamukusa Rebeka.

62Isaki aari avenyillewo o echipululu ya#24.62: Ottaphullella wakhalle waamodda wookhalla ni mawu awi o echipululu ya; mu Eheberi mookhalla mawu awi voovenyerani o. “Neetuutu a Ookumi Anakoona Miyaano,” nave akhalla o echigawo yoomwera. 63Nllapo nimodda misikuwa, Isakooyo eeteetaka ohakani, ahoona ekamira ddiwaaka. 64Vano Rebeka atukhullalleeye miittho nave amoonilleeye Isaki, aakittha va ekamiraaye, 65nave aamukoha mullupa mutteko a Abrahamu wi, “Ethiyo muthu olla anawa wuno ttaani?”

Mullupa muttekoolle aamwaakhulla wi, “Yaalla sika apwiyaakaalle.” Vawi ddiiddo Rebeka aakusa ekuwo, iikhuneellana ekhove.

66Mullupa muttekooyo aamutthopoollella Isaki ddittheddene ddeereyille. 67Vano Isaki aamukusa Rebeka wi akhalle mwaariye nave avollowana m'musasani mwa amennya. Isaki aamukonda wunchichi Rebekooyo vawi aakhurumuseya murima o okhwa wa amennya wulle.

Currently Selected:

Genesis 24: MW2019

Highlight

Copy