Genesis 25

Edduullu ddimodda dda Abrahamu

(1 Epi 1.32-33)

1Abrahamu aamutthellattho mutthiyana mmodda nnddina naye Ketura. 2Ketura aamuyarella Abrahamu Zimirani, Yokishani, Medani, Midiyani, Ishibaki ni Shuwa. 3Yokishani aamuyara Sheba ni Dedani nave anamwani a Dedani yaari Aashuri, Aletushi ni Aleumi. 4Midiyani aamuyara Efa, Efere, Hanoki, Abida ni Elida. Nndda sika ddaari edduullu dda Ketura.

5Abrahamu aamuhiyera Isaki ddittheddene aariiyena. 6Koma ahinakhwe ahaakawellawo emphaso anaaye amoddaalle aayarilleeye mwa awariye ang'onong'ono. Attheenaayo ahaarumiha o ellapo ya wookhuma nndduwa wi yakhalle wenko, waavenyihawo wa mwanaye Isaki.

Okhwa ni ovitthiwa wa Abrahamu

7Abrahamu aakhalla ni okumi wa miyakha 175. 8Nave akhwille mwamurendelle navettho uulluvallille wunchichi. 9Anaayaalle, Isaki ni Ishmaele, yaamuvittha munikhunguninne na Makipera, mu emata elle khalle yaari ya Efuroni mwaana a Zohari o Hiti. Emateeyo yaari wookhuma nndduwa wa Mamure. 10#Gen 23.3-16Yaari emata eyo Abrahamu ayikullalleeye wa Ahiti. Sika Abrahamu ni mwaariye Sara yavitthiwe wenko. 11Akhwille Abrahamu, Mulluku aamudalisa mwanaye Isaki oyo akhalla vakhuviru ni “Neetuutu a Ookumi Anakoona Miyaano.”

Edduullu dda Ishmaele

(1 Epi 1.28-31)

12Nna sika ntthopoollo na edduullu dda Ishmaele, mwaana a Abrahamu oyo amuyarelleeye Hagara, kaporo a o Iguputoolle. 13Alla sika manddina a anamwani a Ishmaele, awaamba aari Nebayoti, vatulli viwa aamuyara Kedara, Adibeele, Mibisamu, 14Mishima, Duma, Masa, 15Hadadi, Tema, Yeturi, Nafishi ni Kedema. 16Alla sika anamwani aallopwana a Ishmaele. Yaari mamwene khumi ni eelli, arive mwene aakhalla ni mizi ddaye ni misasa ddaye. 17Ishmaele akhwille ari ni miyakha 137 nave aavitthiwa mu mahame. 18Edduullu dda Ishmaele ddakhalla mu ellapo ya variyari va Havila ni Shuri, wookhuma nndduwa wa Iguputo, va ettilla ya o Asiriya. Nave ddakhalla moohiyana ni edduullu ddimodda dda Abrahamu.

Oyariwa wa Esau ni Yakobo

19Ella sika epilli ya Isaki mwaana a Abrahamu. Abrahamu aamuyara Isaki. 20Isaki aari ni miyakha 40 enthawi eyo amutthellilleeye Rebeka mwaana a Betuele Muaramu a o Mesopotamiya. Murokoriye Rebeka aari Labani, Muaramu. 21Vano vawi mwaara Isaki khaayara, Isakooyo aamuvekella mwaariye wa Apwiya. Apwiya yahiiwa ovekella waye nave Rebeka aakusa erukullu. 22Koma anamwani eellaayo yaambeelliiwa ollipana m'mirimani mwaye, aallota wi, “Kaambiiwa tini nndda ddinakeereyelliiwa?” Sika ahaakoha Apwiya wi emwaakhulle.

23 # Aro 9.12 Apwiya yaallota wa oolliye wi,

“M'mirimani mwawo muri mitundu miilli dda athu.

Oneeroyara mitundu dda athu ddoollipana,

mwaana mmodda anaakhalle amasiva omukhwaranya mukhwaaye,

muullupalli aneerekomurumeyella mung'onong'ono.”

24Enthawi yooyara ekwakhwanne, Rebeka ahaayara anapattha. 25Mwaana awaamba aari oofiira nave mwiillaaye muttheene waari wonanko yoowara yamapururu. Sika yaamuvaha nnddina nawi Esau.#25.25 Esau: Nnddina nna ninapharihiwa mutteko vooromollani o Seiri, echigawo eyo vatulli viwa mwakhalla edduullu dda Esau. Niniiweya wonanko na Eheberi nno ninattaphullella amapururu. 26Vooyariwani mung'onong'onwaaye, nnatta naye napharille etotopwa ya Esau. Sika yaamuvaha nnddina nawi Yakobo.#25.26 Yakobo: Nnddina nenna niniiweya wonanko na Eheberi nno ninattaphullella etotopwa. Anamwanaalla yayariwe Isaki ari ni miyakha 60.

Esau anakulliha ottekweenaaye

27Asombwaayo yahunnuwa nave Esau aari oosaya enama, ookonda weeteeta. Koma Yakobo aari oomaalleya, ookonda okhalla vaatte. 28Isaki aamukondesesa Esau ekaamba yawi aanacha enama nnddo amuvaheeye iipha. Koma Rebeka aamukondesesa Yakobo.

29Nllapo nimodda Yakobo ahaapeya echipele nave Esau aari avenyeraka ohakani nave avolliwe ettalla wunchichi. 30Sika aamulleella Yakobo wi, “Ettalla eneerokiipha. Kivahe vang'ono echipele yoofiira waapeyilleeweeyo.” (Sika ekaambeene yaamuvaha nnddina nawi Edomu).#25.30 Edomu: Nnddina nenna niniiweya wonanko na Eheberi nno ninattaphullella oofiira.

31Koma Yakobo ahaakhulla wi, “Waambeelle okikullihella ottekweenaawo, kihinuuvahe yoocheella.”

32Esau aallota wi, “Ngoona, miyaano kihanlle vang'ono okhwa ni ettalla. Ethiyo kinaaphurena tini ottekweene?”

33 # Ahe 12.16 Yakobo aallota wi, “Waambeelle ollupella osimikizella wi ottekweenaawooyo wookikullihella?”

Sika Esau aallupella nave akulliha ottekweenaaye wa awaamba oyariwa wa Yakobo. 34Vano Yakobo aamuvaha Esau buledi ni echipeleelle nave Esau aacha navettho aawiryella maaddi, vatulli viwa aatimulla avenyavo. Mmu sika Esau avevullelleeye ottekweenaaye wa awaamba oyariwa.

Currently Selected:

Genesis 25: MW2019

Highlight

Copy