Lúkas 9

Yésus ag óm Jóom jɛ́ɛ́ lí Ɓaómɓɛ la bíɓáa

(Mat 10.1-9, 11-14; Mlk 6.6-13)

1Yésus ɔ kómánɛ̄ jóom jɛ́ɛ́ lí ɓaómɓɛ la bíɓáa, ɔ tíi ɓɔ ŋguu la likanʼyɛ nɛ́ bí dúhū mímbūl míɓē mísɛ, nɛ́ bí tálá ki akɔn. 2Ɔ óm ɓɔ li camanɛ lí pɔ́l Likanʼyɛ lí Ɔlolómɛ̄, la li tɔɔyɛ lí ɓot mbólí. 3Ɔ lága ɓɔ́ nɛ́: «Miníh nyɔŋɔ́g ɓé tɔ jam ányúū duwɛ, ɛ́ ɓɛ́ njéŋ, tɔ mpég, tɔ lidí, tɔ mɔní, tɔ mut ah nyɔŋɔ́g ɓé mbɔ́tí ɛ́ɓáa. 4Tɔ yɔɔ́yɔ́ɔ ndáá miní ŋga kɛ́ li níŋgi, tɔɓán átē. Váŋ nɛ́ miní ŋga kɛ́ li ɓógye lí kɛ ɔ́sū. 5Kí ɓot ɓáh lɛ́gle ɓé ɓɛ́nɛ ápah miní ŋga pám, á míɓógo máná mí nyíŋ tísɔn, kután líbūlú lí míkoo máná: náŋ nɛ́ a ŋga ɓɛ́ mbóŋ ɛ ŋga kááhɛ ɓɔ́.» 6La ɓaómɓɛ bú kɛ, Bí ŋgí wɛɛ á míkɔŋ nyú ámbúh nyúŋú, bíg lɛgɛ Pɔ́l m̀ɓɛɛŋ la li tɔɔyɛ lí ɓot mbólí ɓavoóm bísɛ.

Mbóŋ Yésus ɛg teeŋgɛ Elóde

(Mat 14.1-2; Mlk 6.14-16)

7Ɛnɛ́ Élóde ŋ̀kanʼyɛ a Galiléa a ámblé yé ɛ́sɛ ŋgí loo, ɔ nyág, átɔm nɛ́ ɓot ɓá bí ŋgí laga nɛ́, Yohánɛs Ǹtíi-nzoɓan nɛ́ a pāhye; 8ɓáŋá ɓɔ́ɔ́ Elías nɛ́ a sɔ́ sīg-pɛ, ɓatám ɓɔ́ɔ́ m̀pɔ́tle-a-Ɔlolómɛ̄ wa nyɔ́ a eceg ɛ́ kwaŋ nɛ́ a pāhye. 9Elóde ɔ laga nɛ: «Yohánɛs Ǹtíi-nzoɓan, mā-mɛ̄n nɛ́ ma sɛ́mhánɛ́ nyɛ́ m̀mú. Ndí nyɔ́ hɔ́, nyɛ́ a lɛ nzáá é? Mi ŋga ámble bíg laga mí mam mísɛ likɔlɓan la nyɛ́!» La nyɛ́ ɔ sōmó lí ɛ́n lí Yésus.

Yésus ag díɛ́hɛ limut

(Mat 14.13-21; Mlk 6.30-44)

10Á mítiman mí ɓáōmɓɛ, bú máŋlɛ́ Yésus yé ɛ́sɛ ɓá ɓɔŋ. La nyɛ́ ɔ kɛ́la ɓɔ́, bú nɛ́ŋɛ̄ la ɓot, ɓɛɓɛ la tísɔn nyí ɛ ŋga yáŋlɛ nɛ́ Betsaída. 11Ɛnɛ́ ɓot ɓá yí naŋ, bú oŋ nyɛ. Yésus ɔ kālé ɓɔ; ɔ máŋlɛ́ ɓɔ pɔ́l Likanʼyɛ lí Ɔlolómɛ̄, ɔ tálá ɓá bí ŋgí kɔn.

12Á ébúg-lóō, Jóom jɛ́ɛ́ la Bíɓáa bú sīŋglé nyɛ ɓɛɓɛ, bú laga nyɛ nɛ́: «soɛ́ ɓá ɓot, bí kɛ á míkɔŋ la á mítān mí mí lɛ́ ɓɛ́ɓɛ la vá, nɛ́ bí sōmó línanténé la lidí, átɔm nɛ́ bi lɛ énɛŋɛ́ vá la mitán.» 13Ndí Yésus ɔ tímānɛ̄ ɓɔ nɛ́: «Tíán ɓɔ́ lídī ɓɛ́nɛ-mɛ̄n.» Ɓɔ́g bú lāgá nɛ: «Bi byɛ́ɛ́ ja bíkɔgá bítáan la kɔh ɛ́ɓáa… Amáh nɛ́ ɓaá kɛ ɓɛ́hɛ-mɛ̄n á lí sóm lí lídī ányúū jé limut lísɛ.» 14Ɓot bí ɓɛ́ɛ́ váŋ jam-kaa akóó á páam átáan.

Ɔ lāgá ɓáyēge ɓɛ́ɛ́ nɛ: «Tɔɔyánɛ̄ ɓɔ́ bíti bí muúmítáan muúmítáan mí ɓot.» 15Bú ɓɔ̄ŋ naŋ, bú tɔ́ɔyɛ́ ɓot bísɛ. 16Yésus ɔ nyɔ̄ŋ bíŋ bikɔgá bítáan la yíŋ kɔh ɛ́ɓáa, la nyɛ́ ɔ ɓétɛ́ miíh á lóō, ɔ tí Ɔ́lolómɛ̄ mítamlan, ɔ búg byɔ, la nyɛ́ ɔ tí byɔ ɓayége ɓɛ́ɛ́ nɛ́ bí káahánɛ̄ byɔ́ límut. 17Ɓot bísɛ bú dí, bú yál, bú timan la mibuga mí bítun mí má yáhɛ́ jóom lí bísɛɛ la bíɓáa.

Pétlos ag lem Yésus ákaa Nyɔ́-a-Pɔ́hlɛ

(Mat 16.13-21; Mlk 8.27-31)

18Ɔlɔ́ vá, Kasig Yésus a ŋgí kánɛ á mɓagɓanɛ́, ɓayége ɓɛ́ɛ́ bí ɓɛ́ɛ́ elɔŋ la nyɛ́. Váŋ nɛ́ a bíhī ɓɔ́ nɛ́: «Ɓot bíg yó nɛ́ mi lɛ nzáá é?» 19Bú pélē nyɛ́ nɛ́: «Ɓá bíg laga nɛ́ ɔ lɛ Yohánɛs Ǹtíi-nzoɓan, ɓáŋá ɓɔ́ɔ́ Elías, ányúū ɓáŋá ɓatám, m̀pɔ́tle-a-Ɔlolómɛ̄ wa a kwakwáŋɛ nyɔ́ á pāhye.»

20Ɔ bíhī ɓɔ́ nɛ́: «Ɓɛ́nɛ hɔ́, miníg laga nɛ́ mi lɛ nzáá é?» Pétlos ɔ nyɔŋ mpɔ́t, ɔ pélē nyɛ nɛ́: «Ɔ lɛ Nyɔ́-a-Pɔ́hlɛ la Ɔlolómɛ̄.» 21Yésus ɔ ɓéhyɛ́ ɓɔ́, ɔ tíi ɓɔ ndag nɛ́ bí laglág ɓé tɔ mut náŋ. 22Ɔ lēgléné ɓɔ nɛ́: «Ɛ́g somlɛ nɛ́ Mɔɔ́n Mut a táká ŋgandag, nɛ́ ɓacɛ́ŋ bí lílōmɛ, ɓakanʼyɛ ɓatíi-nsúlé la ɓayí-mbéndá bí táŋɓán nyɛ́; bí ólhánɛ nyɛ́, ndí a páhyé á ɔlɔ́ vá yáhɛ áŋháa.»

Nɛ láá mut a nyɛ́ɛ li oŋ lí Yésus

(Mat 16.24-28; Mlk 8.34–9.1)

23Ámbúh náŋ, Yésus ɔ laga ɓɔ́ bísɛ nɛ́: «Nyɔ́ la nyɔ́ a ŋga sómo ma lí oŋ, a vólánɛ̄ nyɛ́-mɛ̄n, ndí a ɓɛ́gɛ̄ ja mbásá yɛ́ɛ̄ ɔlɔ́ sig, a óŋ ma. 24Ákaa ɛ́sɛ, tɔ nzáá a ŋga sómo li suŋ lí éniŋ yɛ́ɛ́, ag kɛ yɔ́ lí jáŋɛ. Ndí nyɔ́ a ŋga jáŋɛ eniŋ yɛ́ɛ́ ányúū yama, a kɛ yɔ́ lí tombanɛ. 25Wɔɔ́wɔ́ɔ nsɛ́ŋ mut a byɛ́ɛ̄ li tombanɛ lí ŋkɔŋ-á-sí ásɛ, kíyáɓɛ́nɛ a jáŋɛ́ éniŋ yɛ́ɛ́, tɔ li ɓɔ́lan lí miɓɛɛŋ mɛ́ɛ́ mísɛ é? 26Ányúū nɛ́ nyɔ́ la nyɔ́ a kɔ̄n ɔsɔ́n ányúū yáma la biɓaŋgá byáma, Mɔɔ́n Mut nyɛ́g ag kɛ li kɔn lí ɔ́sɔ̄n ányúū yɛ́ɛ̄ eceg a ŋga kɛ́ li sɔ́ átē á lipém jɛ́ɛ́, jé lí Ɛ́sāŋɛ́ la jé lí áŋgɛl epúán. 27La mbálɛ, mag laga ɓɛ́nɛ nɛ́, jogo lí ɓot vá lí ŋgá kɛ ɓé lí wú jɔ́ ŋgí lí ɛ́n lí Líkanʼyɛ lí Ɔlolómɛ̄.»

Ɓayége bíŋháa bíg ɛ́n Yésus átē á lipém jɛ́ɛ́

(Mat 17.1-8; Mlk 9.2-8)

28Jam ákaa alɔ́ mwaam ámbúh nyúŋ ŋkwɛl, Yésus ɔ kɛ́ elɔŋ la Pétlos, Yohánɛs la Yákop, bú ɓét á ɔ́kolá vícɛ̄ŋ á míkánɛ. 29Eceg Yésus a ŋgí kánɛ, asú wɛ́ɛ́ wú vēŋ la mbɔ́tí yɛ́ɛ̄ yu púú nɛ pɛ́ŋ ákaa mipúú mí vaŋgá. 30Váŋ nɛ́ a ɓōtlé li kwɛl la ɓot bíɓáa; ɓáŋ ɓot bí ɓɛ́ɛ́ jā Móse la Elías, 31ɓá bí pámlénéé átē á la lipém lí Ɔlolómɛ̄. Bí ŋgí kwɛlene nyɛmb Yésus nyí ɛ ŋgí nyɛɛ li yál á Yélūsalɛm. 32Pétlos la elɔŋ yɛ́ɛ́ bí ŋgí wú ɔ́lɔ̄. Ɛnɛ́ ɓá vɛɛɓe, bú ɛ́n Yésus átē á lipém jɛ́ɛ́, á tɛ́ɛ́ la ɓot bíɓáa. 33Eceg Móse la Elías bí ŋgí somo li ɓáglan la Yésus, Pétlos ɔ yó nyɛ́ nɛ́: «Etāa, ɛ́ lɛ́ nsɛ́ŋ nɛ́ bi tɔ́ɔ̄ yahá vá. Bí óŋ biláá bíŋháa: yá ányúū yɔ́ɔ, etám ányúū Móse, yéŋé ki ányúū Elías.» Ndí Pétlos a ŋgí yí ɓé jam a ŋgí pɔ́t.

34Kasig a ɓɛ́ɛ́ a ŋgí pɔ́tɔg náŋ, mbaga yu sūh, yu bútyɛ́ ɓɔ; la ɓayége bú kɔn woŋ eceg mbaga ɛ ŋgí díí ɓɔ́. 35Váŋ nɛ́ cíŋ ya pámléné muŋ á nyíŋ mbaga, yu yó nɛ: «Nyɔ́ nɛ́ a lɛ̄ Mɔ́ɔ̄n wama, nyɔ́ ma pɔ́hɔ, miní óglé nyɛ́!» 36Eceg nyíŋ cíŋ ɛ ŋgí pɔ́t, Yésus a ɓɛ́ɛ́ ja ɔ yéglé nyɛ́-ntámɛ́. Ɓayége bú tɔɔ nɛ pií, múŋ á nyúŋ alɔ́, ɓáh máŋlɛ ɓé mut tɔ wa yéé ɓá ɛ́n.

Yésus ag pámɛ mɔɔ́n m̀búl m̀ɓé á nyúū

(Mat 17.14-18; Mlk 9.14-27)

37Á ɔlɔ́ ví ŋga óŋ víŋ, eceg Yésus la ɓayége ɓɛ́ɛ́ ɓá suh ɔ́kolá, m̀ɓáláŋ á límut wú sɔ́ lí ɓoman la nyɛ́. 38Váŋ nɛ́ mut wa a tɛ́ɛ́ nlón átē á limut nɛ́: «Á Ŋ̀yéglɛ, ma sɔ́hyé wa, légɓé mɔɔ́n wama ányúū nɛ a lɛ́ ma pɔmbɛ. 39Á bíceg, m̀búl m̀ɓé ág yaanɛ nyɛ́ ejeseŋge; a ɓōtlé lí lón ŋgele ya. Ág kóndɛ nyɛ́ la li pámhánɛ lí nyɛ livúh á ányu, ag mwahɛ já nyɛ́ la ndutu ecɛ́ŋ, wá tɔmbɛ́ nyɛ́ nɛ́ yɔkɔy. 40Ma sɔ́hyé ɓayége ɓɔ́ɔ nɛ́ bí dúhū wɔ́, ndí ɓáh la ɓé.» 41La Yésus ɔ nyɔ̄ŋ mpɔ́t, ɔ lága nɛ: «Á nyɔŋɔn ŋgíla ŋyéɓé la miɔ́ŋɔ miɓé nyí! Tɛɛla ǹjén mi ŋga ɓɛ́ ɓɛ́ɓɛ la ɓɛ́nɛ ndí la li ɔ́hánɛ lí ɓɛ́nɛ é? Sɔ́ la mɔɔ́n wɔɔ vá.» 42Mɔɔ́n nyɛ́ la li pám ɔ́sū ví Yésus, m̀búl m̀ɓé wú léé nyɛ á sí, wú pógɛ́ nyɛ nɛ́-tɛ́ɛ ɔ kónd. La Yésus ɔ kímɛ́ nyúŋ m̀búl m̀ɓé, mɔɔ́n ɔ tɔ́ɔ̄ mbólí la nyɛ́ ɔ tímānɛ nyɛ ɛsáŋɛ́. 43Ɓot bísɛ bí ɓɛ́ɛ́ váŋ bú nyág la Ŋguu ecɛ́ŋ Ɔlolómɛ̄.

Yésus ag lɛgɛ sīg-pɛ nyɛmb yɛ́ɛ̄

(Mat 17.22-23; Mlk 9.30-32)

Kasig yéé ɓot bísɛ bí ɓɛ́ɛ́ bí ŋgí mɛmɛ Yésus ányúū mam mísɛ a ŋgí ɓɔŋ, ɔ laga ɓayége ɓɛ́ɛ́ nɛ: 44«Miní ámblé jam mi ŋga somo ɓɛ́nɛ li laga m̀ɓɛɛŋ: Mɔɔ́n Mut ag kɛ li nuŋlɛ á mɔ mí ɓot.» 45Ndí ɓɔ́ bí ŋgí ámblé ɓé bíŋ biɓaŋgá; ŋgɔpɔ yɛ́ɛ̄ yu sɔ́lɔ̄ ɓɔ, á lí ɓɔŋ nɛ́ bíh sɔ́ŋtánɛ́gɛ́ ɓé yé a ŋgí máŋlɛ ɓɔ́; ɓɔ́g bú kɔn woŋ li bihi lí nyɛ likɔlɓan lá jéŋ litɔt.

Nzáá a lɛ mut ǹcɛ́ŋ á póla yaná?

(Mat 18.1-5; Mlk 9.33-37)

46Mbihi ya yu sɔ́ ɓayége á míɔ̄ŋɔ á li yí lí nzáá á póla yaɓá a lɛ mut ǹcɛ́ŋ. 47Kasig Yésus a sɔ́ŋtánɛɛ mbihi bí ŋgí ɓatɓan, ɔ nyɔ́ŋ mɔɔ́n ntɔ́ga, ɔ tɛ́ɛ́yɛ́ nyɛ á ŋgwáāg yɛ́ɛ̄, 48a byɛ́la ɓɔ́ nɛ́: «Tɔ nzáá a lɛ́glé nyɔ́ mɔɔ́n á jóō jáma, a lɛ́glé ma; tɔ nzáá ki a ŋga lɛ́gle ma, a lɛ́glé nyɔ́ a óm ma. Átɔm nɛ́ nyɔ́ a lóohán lí ɓɛ́ lí ntɔ́ga á póla yaná ɓɛ́nɛ bísɛ, nyɛ́ nɛ́ a lɛ mut ǹcɛ́ŋ.»

Mut nyɔ́ a ŋgá tɛ́ŋgánɛ ɓé ɓɛ́nɛ a lɛ lá ɓɛ́nɛ

(Mlk 9.38-41)

49Ɛnɛ́ Yohánɛs a nyɔ́ŋ mpɔ́t, ɔ laga Yésus nɛ́: «Á ŋ̀yéglɛ, ɓa ɛ́n mut nyɔ́ a ŋga dúhu mimbúl míɓē á jóō jɔ́ɔ, la ɓɛ́hɛ bu sómo nyɛ́ li suŋɛ náŋ, ányúū nɛ a sē ɓé elɔŋ la ɓɛ́hɛ.» 50Ndí Yésus ɔ tímānɛ̄ nyɛ nɛ́: «Miníh suŋhɛ́gɛ́ ɓé nyɛ, átɔm nɛ́ nyɔ́ a ŋgá tɛ́ŋgánɛ ɓé ɓɛ́nɛ a lɛ lā ɓɛ́nɛ.»

Yésus ag kɛ á Yélūsalɛm

51Kasig eceg li nyɔŋɓɛ lí Yésus a lóō ɛ́ ɓɛ́ɛ́ ɓɛ́ɓɛ, ɔ nyɔ́ŋ mísɛ́mɛg lí kɛ á Yélūsalɛm. 52Ɔ dúgɛ́ ɓálɛgɛ minjɛn ɓɛ́ɛ́ ɔ́sū. La ɓɔ́ bú nyɔŋ nzen, bú níŋgí á ŋkɔŋ wa á Samália, á lí ɓoŋhan lí mísɔ̄ mɛ́ɛ́. 53Ndí ɓot bí nyúŋ ŋkɔŋ bú pún nyɛ li kale, átɔm nɛ́ a ŋgí kɛ á Yélūsalɛm. 54Ɛnɛ́ Yákop la Yohánɛs, ɓayége ɓɛ́ɛ́ ɓá ɛ́n naŋ, bú yó nyɛ nɛ́: «Ɛtáŋɛ, ɔ sē ɓé nɛ ɔ yéɓé nɛ bi ɓāt nɛ́ nzáan ɛ ɓógó á lóō, ɛ súh ɛ dígɛ́ ɓɔ́ é?» 55Ndí Yésus ɔ yáan, ɔ nyáálé ɓɔ. 56La ɓɔ́ bú loo li kɛ á ŋkɔŋ ntám.

Li cóó lí mam mísɛ á li oŋ lí Yésus

(Mat 8.19-22)

57Múŋ ápah bí ɓɛ́ɛ́ á nzen, mut wa a byɛ́la Yésus nɛ́: «Mag oŋ wa tɔ véé ɔ ŋgɔ kɛ̄.» 58Yésus ɔ tímānɛ̄ nyɛ nɛ́: «Mbaŋga ɛ́ byɛ́ɛ bivóg, anɔn á byɛ́ɛ́ mumbú, ndí Mɔɔ́n Mut nyɛ́, ah byɛ́ɛ́ ɓé línanténé.»

59A byɛ́la nyɔ́ŋɔ́ ntám nɛ: «Ōŋ ma.» La nyɔ́ŋ mut ɔ tímānɛ̄ nɛ: «sóon mwahɛ́ yágá ma mi kɛ́ mi jé etāa.» 60Ndí Yésus aá la nyɛ́ nɛ́: «Mwahɛ́ mimbim mí jé mimbim máɓá, ndí wa, kɛɛ́n lɛ̄gɛ́ pɔ́l Likanʼyɛ lí Ɔ́lolómɛ̄.»

61Mut ntám sīg-pɛ ɔ lága nyɛ́ nɛ́: «Mág mag oŋ wa Ɛtáŋɛ, ndí sóon mwahɛ́ yágá ma mi kɛ́ mi nāŋgánɛ ndog yama.» 62La Yésus ɔ lága nyɛ́ nɛ́: «Nyɔ́ la nyɔ́ a ŋga sál la eɓag, ndí a légɓé mbúh, ah kɔ́ɔ́ ɓé la Ekombo Ɔ́lolómɛ̄.»

Currently Selected:

Lúkas 9: NTB

Highlight

Copy