Luk 7
7
Yeso zwey wa faʼa atəw abú usogwi
(Mat 8.5-13)
1Amaʼazənə Yeso si mara ighayn unó mbəŋ abú ba wu, yə noʼ iŋu asin moʼ umə tiya akə Kapenawum. 2Atəw abú usogwi ukɨ feyn mə nə wa faʼa nu yə mə sɨgə sə baʼa iku. Wə wuʼ wa afaʼa wu azəd. 3Amaʼazənə yə zəw anó da Yeso, yə tom atəw abú ba Jû moʼ abú uŋwən kwi u ŋuw boʼo abugə abú Yeso kwi u zaʼa izwey wa faʼa wu. 4Amaʼazənə mbə́ ŋu izən Yeso mbə́ pey yi boʼo ubugə abú uŋwən kwaʼa akə ingəʼ ighayn kwi, “Anom ŋunə kəʼərə kwi ngwə wyere uŋwən. 5Damugə uŋwən wuʼ umba ba abey, yə nibi chim na ibumi ba Jû naʼ ina.”
6Umugə Yeso zəw ney, yə noʼ ni ŋuw nə úŋwən. Amaʼazənə mbə mə́ sə baʼa iŋu pey iyad na wu, atəw abú usogwi wu cha uzi ma kwi uŋuw ghayn abú Yeso kwi, “Masa imə tumə ayə inji inyo cha adi kəʼərə aŋu amə aghəy ngwə inyi ungɨŋ inyi na, 7mə zən kwi cha adi koʼoro aŋu izaʼa inigə umugə amboŋ anigə ghayn aba inayn anigə inyo uŋu wa faʼa iyi mey. 8A wə ghayn ney damugə ayə inyi usogwi kyayn. A yə nibi nə usogwi inyi aton. Abə ghayn abú umoʼ kwi, ‘U ŋuw!’ U yi ŋu, abə ghayn abú uchini kwi, ‘U zaʼa!’ U yi zaʼa abə ghayn abú uŋu wa afaʼa kwi, ‘U faʼa afaʼa zəŋ’ Uyi faʼ.”
9Amaʼazənə Yeso zəw anó zəŋ, yə yere anigə yə gha ma ighayn abú unóŋ ba ŋunə yə niŋe anjim ma kwi, “Ayə ghayn asiʼ inen kwi, kábá ungɨŋ Israel cha adi di zən aŋu wa moʼ ni umə nə ukudu ibeni fiŋ uŋu.”
10Amaʼazənə ba mbənə mbə́ tom sayn Yeso iwene iŋu a na mbə pey yi zən kwi inyo wa afaʼa wu si məy.
Yeso zəmə ŋwə̂ ayey uti
11Cha gha di sa, Yeso noʼ iŋu ungɨŋ asin zənə umə tiya akə Nayn. Mbə məŋə-anó ma nə unóŋ na kyayn ŋu nə uŋwən. 12Amaʼazənə yə́ ŋu pey uchəw ukam ŋunə umə inyi iŋuw ungɨŋ asin awu, yə zən ba u beʼe awu wa moʼ mə duw. Wa ŋunə yə ku amə aba ŋwə̂ feyn yugə abú ayey uti moʼ. Unoŋ ba kyayn mə iyeŋ zaʼa aboʼo ayey uti wu. 13Amaʼazənə Asɨyisəg zən úŋwən, yə kənə akə uŋwən anigə ighayn abú uŋwən kwi, “Imə dey yə.” 14Amaʼazənə yə ghayn nigə, yə ŋu ibira ukon ŋunə mbə beʼe awu wa wu igun. Ba mbənə mbə́ beʼe ukon wu, mbə́ tem anigə ighayn kwi, “Ajoŋ ayə ghayn inigə kwi noʼo atey.” 15Ajoŋ zənə yə ku noʼ chomo iti ni inayn. Yeso naʼ uŋwən abú ingwo ma.
16Igoro sugi inyo ba wu ujum anigə mbə́ mə́ yere Nwiye ghayn kwi, “Aməde wa ukən Nwiye idu akaʼa inja.” Foro kwi, “Nwiye zaʼa iwere ba ma.”
17Ukən da Yeso saŋa ungɨŋ aba abey Judeya ujum nibi saŋa ungɨŋ ubey ujum mbənə umə iyad iyad.
Jon ŋunə yə mə naʼa une tom mbə məŋə ma abú Yeso
(Mat 11.2-19)
18Amaʼazənə mbə məŋə-anó Jon ŋunə yə mə naʼa une ghayn unó mbəŋ ujum abú uŋwən, 19yə tiya ubigə itom úŋwən abú Asɨyisəg kwi, ú ŋuw ibiri abú uŋwən kwi, “Ngwə mə wa ŋunə ba ukən Nwiye mə́ ghayn kwi u yi zaʼa kə mba ni nəmə wa chini?” 20Amaʼazənə ba wu ŋu abú Yeso, mbə́ ghayn abú uŋwən kwi, “Jon ŋunə umə naʼa une cha ngwa inigə kwi mba biri kwi ngwə mə wa ŋunə ba ukən Nwiye ghayn kwi uyi zaʼa kə mba ni nəmə wa chini?” 21Aba ighara wu Yeso zwey ba nanaʼ nu mbə mə nə ikudi isɨgə nanaʼ, yə chi uzugə iboŋ inyo ba ighəy ifəg nanaʼ izən mbayn. 22Amaʼazənə yə aghəy nigə, yə ywiri abú úŋwən kwi, “Mbən ŋuw ghayn unó mbənə mbə zən ni zəw abú Jon. Ifəg itə́ zənə imbayn, ubuʼuri ba umbə iyeŋ uchuŋ chuŋ, akyuŋ mey inyo ba mbənə mbə́ mə́ nə akyuŋ, ikəw tə zəw anó, uwu ba zəmə anigə ba ghayn ukən uchuŋ abú ba ukwaŋ. 23Nwiye zi aborobod igun wa ŋunə cha umə məŋərə ma akə anó moʼ da aŋu.”
24Amaʼazənə ba mbənə Jon tom si noʼ iŋu, Yeso ghayn anó da Jon abú unóŋ ba wu kwi, “Mbən ŋuw ambayn zomo zəŋ ngiya? Mbən zən wa chomo nə ufəʼ tənə ufi mə ŋeʼere?” 25Mbən kwaʼa ŋu izən ngiya? Mbən du iŋu zən wa ni uzi ndwi chuŋ? Mbən zən kwi ba mbənə umə zi ndwi chuŋ igha ma ungɨŋ imbon umbə chomo ungɨŋ itoʼ 26mbən ghayn iniŋ kwi mbən du ŋu zən ngiya? Mbən du iŋu zən wa ukən Nwiye? Aŋ a yə ghayn inen kwi mbən zən wa ŋunə u chigə ma akə wa ukən Nwiye. 27Jon wu amə wa ŋunə mbə́ ŋwaʼanayn da uŋwən ungɨŋ Aŋwaʼanayn Nwiye kwi, “Nwiye ghayn kwi
Ayi cha uŋu wa tom imbey inigə
Uŋwen yi tana inji inigə.”
28Ayə ghayn inen kwi Jon debe chigə ma akə ba ujum mbənə u sí chomo akə igun isəg anigə wa ŋunə amə ukuŋe ungɨŋ anó ufon Nwiye debe chigə ma akə uŋwən. 29#Mat 21.32; Luk 3.12Amaʼazənə ba wu ujum foro mbə́ fere ukab tag zəw anó zəŋ, mbə́ beni kwi Nwiye aghəy anó nu akəʼərə damugə amə Jon yə naʼa une abú úŋwən. 30Anigə ba Farasay ni mbə taʼa ba akə unoʼo á ton anó zənə Nwiye kaʼa da úŋwən damugə cha mbə́ dí beni uma kwi Jon naʼa une abú úŋwən. 31Yeso ŋu imbey ighayn kwi, “Amə ghəy a məg ba mbəŋ akinine akə ngiya? Umə́ ni ngiya? 32Umbə ni buŋ kuŋe mbənə u chomo atiy iyuŋ i tiya uchini ighayn kwi, ‘Mba yə ibiya ngwa inen kwi mbən bin anigə cha mbən mə́ binə, mba kyugwa ikiy idey anigə cha mbən mə idey.’ 33Jon ŋunə yə́ mə́ naʼa une zaʼa cha yə mə jəgə ingəŋ, cha yə mə nugə unoʼ anigə mbə́ ghayn kwi uzugə iboŋ mbə́ ungɨŋ inyo ma. 34Anigə Ŋwə̂ Wa zaʼa ni jəgə nugə unoʼ anigə mbən ghayn kwi mbən zən anóm uŋu, u yə jəgə ni ifuŋ, amə abigə unoʼ. U yə jəgə azi ni mbə́ fere ukab tag foro ba mbənə umə aghəy unó iboŋ. 35Amə ba mbənə umə beni unó mbənə Nwiye mə aghəy umə itey kwi iwe Nwiye akəʼ.”
Yeso ŋu unuʼ Sayimon nu amə wa Farasay
36Wa Farasay moʼ tiya Yeso kwi u zaʼa jəg nu uŋwən. Anigə Yeso ŋu inyi ungɨŋ na ma ichomo ijəg. 37#Mat 26.7; Mak 14.3; Jon 12.3Ayey moʼ mə asin awu nu yə mə aghəy unó iboŋ. Amaʼazənə yə zəw kwi Yeso yə jəgə ungɨŋ na wa Farasay wu, yə ŋu nə ungəd nyuʼərə nyoʼoro isugi ungɨŋ ichəŋ alabasta. 38Wə pey yi tem anjim Yeso iyad ughəw ma ni uchəw isiy nebe ughəw ma awu anigə ni fira akə inyoŋ atəw ma. Wə soro ughəw ma anigə zoʼ akə ungəd nyuʼərə nyoʼoro wu. 39Amaʼazənə wa Farasay wu zən anó zəŋ, yə kono ungɨŋ fiŋ ma kwi, “Anom ŋunə adi mə kwaʼa wa ukən Nwiye, nji yə mi kyay ayey ŋunə umə bira uŋwən nibi kyay ukudu ayey ŋunə amə uŋwən umugə umə aghəy unó iboŋ.” 40Yeso ywiri abú uŋwən kwi simon ayə nə anó moʼ ighayn inigə. Sayimon biri kwi, “Ataʼa ba amə anó ngiya ghayn.” 41Yeso ghayn abú uŋwən kwi, “Anom ubigə moʼ yimə ukab abú wa ŋunə umə choʼo ukab. Wa feyn mə yimə uŋwən akɨ ichuʼ itəŋ wa chini yimə uŋwən ichuʼ ighum itiŋ. 42Amə cha ukab abú wa moʼ akaʼa úŋwən iwiy abú wa wu. Wa wu sayn ukab wu abú úŋwən uma ujum. Akaʼa ba mbənə ubigə amə ngwa mi wuʼe wa wu azəd?” 43Sayimon ywiri kwi, “Mə kono kwi amə wa ŋunə yə sayn ukab nanaʼ abú uŋwən.” Yeso ghayn kwi, “Ngwə ywiri anji chuŋ.” 44Amaʼazənə yə ghayn nigə, yə gha ma iney ayey wu ighayn abú Sayimon kwi, “Ngwə zən ayey ŋunə? Mə nyi ungɨŋ inja na cha ngwə naʼa ayə une iniŋ kwi a səw umbəŋ ughəw awu anigə ayey ŋunə səw umbəŋ ughəw ni isiy ma ifira akə inyoŋ atəw ma. 45Cha ngwə di soto ayə itɨŋ ndəʼ amaʼazənə mə zaʼa. Anigə iti amaʼazənə mə zaʼa akəŋ, cha udi si sayn ma imə soto umbəŋ ughəw. 46Cha ngwə zoʼo ayə inyi atəw nə ungəd anigə yə zoʼ umbəŋ ughəw nə ungəd nyuʼərə nyoʼoro 47Anigə ayə ghayn inigə kwi, mə waʼ unó iboŋ ma anjim iwuʼi nanaʼ zənə uŋwən tey. Wa ŋunə u waʼa unó iboŋ ma pipi yə tey aba iwuʼi pipi.” 48Amaʼazənə Yeso ghayn ney, yə ghayn abú ayey wu kwi, “Mə si wa umbə unó iboŋ.” 49Ba mbənə mbə́ chomo mə jəgə ni Yeso uki ghayn akaʼa uma kwi, “Amə ngwa ŋunə umə waʼa unó iboŋ ba?” 50Anigə Yeso ghayn abú ayey wu kwi, “Injə ibeni fiŋ chi ayə angəʼ ŋuw akə aborobod.”
Currently Selected:
Luk 7: NGI
Highlight
Share
Copy
Want to have your highlights saved across all your devices? Sign up or sign in
© 2023 CABTAL
