Luk 6

Ibiri da aney aku abú Jû

(Mat 12.1-8; Mak 2.23-28)

1Amə aney aku ba Jû moʼ, Yeso nə mbə məŋə-anó ma mə chigə ungɨŋ imbayn ikwi, mbə məŋə-anó ma mə yeŋ yə pa ikwi moʼ iməʼe itɨŋ ma ikoro. 2Anigə ba Farasay moʼ biri kwi, “Aton zənə mbən mə aghəy unó mbənə cha noʼo tey ma kwi mbən aghəy aney aku amə da ngiya?” 3Yeso ywiri abú úŋwən kwi, “Cha mbən di si foŋ ngwen anó zənə ufon Dafid aghəy Amaʼazənə uŋwən ni ba mbənə mbə́ mə nə uŋwən mə zaŋa injey? 4Wə inyi iŋu ana Nwiye i num ingəŋ zənə mbə́ naʼa nə aghəy ifa abú Nwiye ijəg inaʼ imoʼ abú ba mbənə mbə́ mə́ nə uŋwən nu chama adi boŋ kwi wa moʼ jəg ingəŋ zəŋ ichigə akə ba mbənə umə faʼa ambəŋ Nwiye.”#6.4 Amaʼa wu, amə chama na utinə ba mə inyi utinə amə ungɨŋ u aghəy moʼ mbə chimə umə tiya akə Tent. 5Anigə Yeso nwi ghayn kwi, “Ŋwə̂ Wa amə Asɨyisəg kaba igun aney aku.”

Yeso zwey wa nu abugə ma ku

(Mat 12.1-8; Mak 2.23-28)

6Amə aney aku ba Jû chini, Yeso ŋu ungɨŋ na bumi ba Jû ni taʼa ba. Wa moʼ mə awu nu abugə jigi ma si ku. 7Mbə taʼa ba akə unoʼ nə ba Farasay moʼ mə awu ungɨŋ. Mbə́ mə́ kaba inji izi usaʼa igun Yeso. Anigə mbə mə́ bə ney uŋwən izən kwi umi zwey wa aney aku. 8Asɨmə Yeso kyay unó mbənə mbə́ mə́ kono ungɨŋ fiŋ uma anigə ighayn abú wa ŋunə abugə ma ku kwi noʼo atey izaʼa item imbey ba ujum. Anigə yə noʼ atey iŋu item. 9Anigə Yeso ghayn abú úŋwən kwi, “Ayə biri inen kwi ikɨ mə tey kwi mba ighəy ichuŋ aney aku, kə kwi mba aghəy ibɨ? Imə tey kwi ba chi wa angəʼ kə kwi u sayn wa kuw?” 10Yə́ ney úŋwən uma ujum ighaba anigə ighayn abú anóm ŋunə abugə ma kuw kwi, “sa injə abugə.” Wə sa, anigə abugə ma gha ni faʼa.

11Anigə ba mbənə mbə́ mə́ taʼa ba akə unoʼo nə mbə́ Farasay mbə bɨ fiŋ azəd nə Yeso anigə mbə ti ni ghayn akaʼa uma anó zənə umi aghəy abú Yeso.

Yeso choʼ ba tom Kristo ighum cho bigə

(Mat 10.1-4; Mak 3.13-19)

12Aney moʼ, Yeso koʼ iŋu igun ugum iŋu ichaʼara Nwiye. Wə chaʼara Nwiye akə afəb wu ujum. 13Amaʼazənə isəg kyiʼi yə tiya mbə məŋə-anó ma ichoʼ ighum cho bigə akaʼa úŋwən. Wə tiya úŋwən akə ba tom Kristo. Umbənə yə choʼo amə́ 14Sayimon (nu yə chəw akə Pita) nə unya anóm ma Andrew. Wə nibi choʼo Jems, Jon, Filip, Batolomew 15Mathew, Tomas, Jems ŋwə̂ Afiyus ni Sayimon (ŋunə mbə mə́ tiya akə Zealod) 16Judas ŋwə̂ Jems, foro Judas Iskariyod ŋunə yə fənə Yeso.

Yeso mə taʼa ba nibi zwey ba

(Mat 4.23-25)

17Yeso swiʼi igun ugum nə ba tom Kristo. Mbə́ pey yi tem asin ibara ni mbə məŋə-anó ma foro ikwiy ba nu yə noʼo usin mbənə umə ungɨŋ Judeya foro a Yerusanem foro iyad aba Tyre nə Sidon. 18Mbən zəw unó mbənə Yeso mə́ ghayn. Mbə́ ŋu kwi u yi aghəy inyo uma imey. Wə chi uzugə iboŋ inyo ba mbənə uzugə iboŋ mə́ naʼa ingəʼ abú úŋwən. 19Ikwiy ba wu ujum mə kaba inji ibira uŋwən damugə ikay mə duw inyo ma ighəy inyo ni mey abú úŋwən uma ujum.

Anó da aborobod nə akənə

(Mat 5.1-12)

20Yeso ney mbə məŋə-anó ma ighayn kwi,

Nwiye zi aborobod igun inen umbən ba ukwaŋ

Damugə amə umbən mi jəg anó fon Nwiye!

21Nwiye zi aborobod igun inen umbən mbənə injəy mə zaŋa akinine

Mbən yi jəg ikod.

Nwiye zi aborobod igun inen umbən mbənə mbən mə chwey isiy akinine

Damugə mbən yə chiʼ.

22 # 1Pi 4.14 Nwiye zi aborobod igun inen umbən mbənə ba mə́ bana ngwen iton ngwen, jimə ngwen ighayn kwi mbən mə ba umə aghəy unó iboŋ. Unó mbəŋ ujum amə damugə mbən beni Ŋwə̂ Wa 23#Ifa 7.52mbən wuʼe ngwen aney zənə anó zəŋ aghəy sə mbinə ni iwuʼi damugə umbi choʼ afaʼa kyayn inen anəŋ azobo. Amə nigə umbən umbaʼ imbey mbə mə́ ighəy abú ba ukən Nwiye.

24Ingəʼ kyayn yi mə igun inen umbən mbənə mbən mə́ nə imbon

Damugə mbən si mə nə u ghəy mbənə u ghəy mbən chomo ungɨŋ ichuŋ!

25Ingəʼ kyayn yə mə igun inen mbən mbənə mbən mə́ jəgə koro akinine

Damugə mbən yi sə chomo injəy!

Ingəʼ kyayn yə mə igun inen umbən mbənə mbən mə chiʼe akinine

Damugə mbən yi sə kənə anigə ichew isiy!

26Ingəʼ kyayn yi mə igun inen umbən mbənə ba ujum mə ghayn anó chuŋ da ngwen damugə amə nigə nu mbaʼ imbey mə́ aghayn da ba ukən Nwiye figə unó.

Anó ni iwuʼ ba abana

(Mat 5.38-48; 7.12a)

27A yə ghayn inen umbən mbənə mbən mə zəw anó zənə amə ghayn kwi, mbən wuʼ umbən ba abana mbən aghəy ichuŋ abú ba mbənə umə bana ngwen, 28mbən zi aborobod igun ba mbənə umə zi idon itən igun ichaʼara Nwiye igun u mbənə umə́ jimə ngwən. 29Wa moʼ bə feyn injə aba indəʼ gha aba zi itey abú uŋwən ufeyn, wa moʼ bə num ungwə kud nibi sayn u num injə ndwi fən. 30Wa moʼ bə ibiy aghəy moʼ inigə naʼa abú uŋwən, wa moʼ bə fiyn injə aghəy sayn ibiri ayə. 31#Mat 7.12Mbən ni aghəy abú ba umbi unó mbənə mbən mə kaba kwi uni aghəy inen. 32Mbən bə mə wuʼ aba ba mbənə u wuʼi ngwen, aborobod mi si zaʼa inen da ngiya? Kábá ba mbənə umə aghəy unó iboŋ umbə nibə iwuʼe ba mbənə umə wuʼe úŋwən. 33Mbən bə mə ighəy ichuŋ aba abú ba mbənə umə aghəy ichuŋ inen aborobod mi si zaʼa inen ngiya? Kaba ba mbənə umə aghəy unó iboŋ umbə nibə aghəy nigə. 34Mbən bə choʼo ukab inaʼ aba abú ba mbənə mbən kono kwi umbi gha inaʼ, aborobod mi si zaʼa inen ngiya? Kábá ba mbənə umə aghəy unó iboŋ umbə nibə choʼo ukab inaʼ abú ba mbənə umə aghəy unó iboŋ boʼo umi gha num unun ŋunə mbə naʼa. 35Anigə mbən ni wuʼ umbən ba abana sə ighəy ichuŋ abú úŋwən. Mbən ni choʼo ukab inaʼ abú ba mbənə mbən kono kwi cha umi gha inaʼ uma inen, mbən bə aghəy nigə, mbən yi mə nə u choʼo afaʼa kyayn. Anigə mbən yi mə buŋ Nwiye ŋunə ukwey chigə isəg damugə u yi aghəy ichuŋ abú ba mbənə cha umə naʼa uma yə mbeni ayə abú uŋwən foro abú ba mbənə umə íkyúgə. 36Mbən mə nə adiri abú ba numugə ungwen Mbaʼ mə nə adiri abú ba.

Anó ni imə saʼa ba umbi

(Mat 7.1-5)

37“Mbən mə́ saʼa ngwen ba umbi boʼo cha Nwiye mi saʼa ma ngwen, mbən mə chiŋe ngwen ikum ba umbi boʼo ka Nwiye chiŋe ma itən. Mbən nyaba unó iboŋ ba umbi boʼo Nwiye mi nyaba umbən unó iboŋ. 38Mbən sə naʼa u aghəy abú ba boʼo Nwiye mi mə naʼa inen. Nwiye yi naʼ inen chigə ma umugə mbən mə naʼa. Nwiye yi naʼa u aghəy inigə usugi buʼe. Inji zənə ngwə mə məgə u aghəy ki naʼ abú ba mbi, amə nigə Nwiye mi məg u aghəy inaʼ inigə.”

39 # Mat 15.14 Yeso ghayn inayn maʼa abú úŋwən kwi, “Cha ufəg mə yimə ma abugə abú ufəg chini, umbə aghəy nigə, nji úŋwən uma ujum umbi fwayn ubəg. 40#Mat 10.24, 25; Jon 13.16; 15.20Cha wa ŋunə umə kweme afaʼa mə chigə ma akə wa ŋunə umə itey afaʼa abú uŋwən. Asɨmə ubə si kweme afaʼa imara uyi mə ichin ni wa ŋunə yə mə itey afaʼa abú uŋwən.”

41“Aton zənə ngwə mə́ zənə ukəg aghəy ungɨŋ ighɨ ungwə unya anigə cha ngwə mə zənə ayə ikəg uwayn ungɨŋ injigə mi ighɨ mə da ngiya? 42Kə ngwə ghayn abú ungwə unya anóm kwi, unya anóm tem achiyə ukəg aghəy zəŋ ungɨŋ i nji ighɨ nu cha ngwə zən ayə ikəg uwayn i mə ungɨŋ injigə? Ungwə afigə unó, dey chi ikəg uwayn zənə imə ungɨŋ nji ighɨ ki ngwə mi zən anji uchuŋ ukəg aghəy zənə amə ighɨ ungwə unya anóm.”

Ano da azad ni itɨŋ ma

(Mat 7.16-20; 12.33-35)

43“Cha azad chuŋ mə kuwə ma itɨŋ iboŋ, cha azad iboŋ mə kuwə ma itɨŋ chuŋ. 44#Mat 12.33Umbə kyay azad feyn feyn akə itɨŋ ma cha azad amba mə kuwə ma akyugwa, cha amba mə kuwə ma piya. 45#Mat 12.34Wa chuŋ yə chiyə unó chuŋ ungɨŋ fiŋ ma zənə isugi nə unó chuŋ, wa iboŋ yə chiyə unó iboŋ ungɨŋ fiŋ ma zənə isugi nə unó iboŋ damugə unó mbənə uchəw mə ghayn amə unó mbənə usugi ungɨŋ fiŋ ma.”

Mbə́ chimə na ubigə

(Mat 7.24-27)

46“Aton zənə mbən mə tiya aŋu kwi Asɨyisəg, Asɨyisəg anigə cha mbən mə ighəy ngwen unó mbənə amə́ ghayn inen amə da ngiya? 47Ayi tey umugə wa ŋunə u zaʼa iniŋ izwaray anó mbənə amə ighəy u məŋi. 48U yə ni wa ŋunə u bə sə chimə ina, u toŋ asin awu iŋu ayə asey izi ati ghəy igun ukob. Amaʼazənə ugwi bə sugi azəd ichigə yə komo ina wu, cha na wu mi bene damugə mbə́ chim anji chuŋ. 49Anigə wa ŋunə u zəw inyi inayn cha umə aghəy ma unó mbənə amə ighayn u yə ni wa ŋunə u chimi na ni cha uzi ma ati, ugwi bə sugi azəd u zaʼa yi komo ina wu, ibene saʼa akə inji iboŋ.”

Currently Selected:

Luk 6: NGI

Highlight

Copy