Zâŋ 7

Nyîn a Zezúri zi láɓulaw hí̧ nɛ́ nyá

1A falké nɔ́, Zezú há̧ra̧ ɓil kaw a Galilê, a zi ɓay a sé ɓil kaw a Judé yá, ɓayhí̧lé mbây a Juyífri kaw ɛ́ ŋgboro ɓay a í nɛ́. 2Dáy nâm záymûn a Juyífri, a kú ná ɓá ɓil gbáʼari gí ɗɛ́ŋ dá. 3Nǎŋnɔ́, nyîn nɛ́rí̧ sa hí̧ nɛ́ ɓá: «Mɔ́ uru sé ɓil kaw a Judé, rá̧lǒo gunbɔʼɔri kú kó péna ka mɔ niŋ kɔ́! 4Njuku ka zi ɓá kú tu nɛ́y, zi niŋ péna a mɛ̌ ɓá múnáké yá. A mɔ kaw niŋ hɛ̧ri̧ ka ndé kɛrɛ a njukuri, mɔ́ tɔ́ʼɔ mûn nɔ́ hí̧ njukuri, a kú kó mɔ́!» 5Ɓayhí̧lé nyîn nɛ́rí̧, kuriri kɔ́, kú zi láɓulaw hí̧ nɛ́ nyá. 6Dáy Zezú rerú ɓay hí̧ kuriri a sa: «Nâm a mǐ pa̧n ka̧ nyá ɓáy, a wǎyri nâm too ná ɗɛ́ŋ. 7Njuku a tísiriri, zi ma fɔny wǎyri yá, a mǐ, kú fɔny mí, ɓayhí̧lé mi sa ɓá péna niŋa a kuriri zi belyá. 8Wǎyri, i sé gel záymûnké. Dáy a mǐ, mi tí sé ná nyá, ɓayhí̧lé nâm a mǐ pa̧n a ka̧ yá ɓáy.» 9A Fal saɓay nɔ́ hí̧ kuriri, ké rekaw ɔ Galilê.

Zezú sé gel záymûn a Zerúzalɛ̂m

10Gelka, nyîn nɛ́rí̧ kála sé gel záymûnké, Zezú zi sé a ɓil dawá yá, ké uru a sé ɓá múnáké. 11A gel záymûnké, mbây a Juyífri ɛ́ Zezú a vbí ɓá: «Ké e a sí̧ lé?» 12A ɓil a njukuri, kú kaw ŋgɔ̧rɔ̧ ɓay a bazeŋ a kuriri sé tûlé, njuku a há̧narí̧ sa: «Ké ɓá njuku a béláké», njuku a fékéri sa ɓá: «Tí nǎŋ nyá, ké kaw rɔ́ʼɔ njukuri.» 13Dáy, njuku saɓay a mɛ̌ tɛ̧́ kála zi tí yá, ɓayhí̧lé kú ŋgú wɔ́w a mbây a Juyífri.

14Sêe záymûnké ka̧ lawgel dá, dáy Zezú sé kaw ɓil vûn a Gáŋvbôn a kaw tɔ́ʼɔhɛ̧ hí̧ njukuri. 15Mbây a Juyífri kaw yér a sa ɓá: «Ná a̧ní rá̧ njuku nɛ́ zi mbɛl hɛ̧ nyá, rá̧ a tu ɓay a Gáŋvbôn nǎŋ lé?»

16Zezú resa hí̧ kuriri ɓá: «Hɛ̧tɔ́ʼɔ a mǐ, zi gí a gél ní nyá, gí a gel a njuku ka pé míy. 17Njuku mí zi ɓay a niŋ hɛ̧ ka Gáŋvbôn ziy, e tu ɓá hɛ̧tɔ́ʼɔ a mǐ, gí a gel a Gáŋvbôn malé mi kaw saɓay sé tûl ní ka mûn ní lé. 18Njuku ka saɓay a mɛ̌ ka mûn nɛ́y, kaw ɛ́ hɔ̧́na a mɛ̌. Dáy, njuku ka ɛ́ hɔ̧́na a njuku ka pé nɛ́y, mɛ̌ nɔ́, ké ɓá gbát njuku, hɛ̧ a ndáráyaké zi tí ka lawɛ́ yá. 19Tí ɓá Mɔyíze pé hí̧ wǎyri sáŋna nyá lé? Dáy njuku a há̧na mbêw a bazeŋ a wǎyri ka tɔ́ŋ sáŋnaké zi tí yá. Dáy ɓayhí̧rá̧, i ɛ́ ŋgboro í mí lé?» 20Njukuri sa hí̧ nɛ́ ɓá: «Mɔ erú ka têm ɓéké. A gé ɛ́ ŋgboro í mɔ́ lé?»

21Zezú sa hí̧ kuriri ɓá: «Mi niŋ hɛ̧sáʼama mbêw dáy wǎyri too, i kaw yér! 22Ɓayhí̧lé Mɔyíze hí̧ wǎyri sáŋna vbé ganzá hí̧ gun wɔ̧rɔ̧́njukuri,#7:22 Sáŋna a Mɔyíze hí̧ ŋgboro ɓá kú vbé ganzá hí̧ gun wɔ̧rɔ̧́njukuri a fal mbuŋa a kuriri nâm zíndɔ̂ʼɔsére. Rá̧ nâm zíndɔ̂ʼɔséreké nɔ́ mí ka̧ a sêe ɔʼɔ a Juyífri lé, kú vbé ganzá rú nǎŋ. [a tu ɓá, zi tí ɓá Mɔyíze pé títáʼaké yá, ɓá zîi a manárí̧ pé tí taʼaké], dáy wǎyri, i zibɔʼɔ vbé ganzá hí̧ njukuri ka nâm ɔʼɔ. 23Dáy wǎyri mí vbé ganzá hí̧ njuku ka nâm ɔʼɔ, a mí zi many sáŋna a Mɔyíze yáy, ɓayhí̧rá̧ i ɗí hɛ́rɛ kuu mǐ ɓay ka mi ŋgɛ́rɛ njuku a sêe ɔʼɔ lé? 24Í pɔŋ walɓay táŋ ŋgboroké sé tûl hɛ̧ kóna a nûn ɓǎŋ, í walɓay ka ŋgboro ɓá ndáráké.»

Njukuri vbí ɓá Zezú ɓá Kiris lé?

25Njuku Zerúzalɛ̂m a há̧narí̧ sa: «Tá njuku nɛ́ pé kú ɛ́ nɛ́ ɓay a í nɛ́ nyá lé? 26Í kó, ké saɓay a mbɛl a njukuri, dáy njuku a há̧na mbêw, ka saɓay hí̧ nɛ́ zi tí yá. Malé mbây a manárí̧ tu ɓá ké ɓá Kiris dá lé? 27Njuku nɛ́, ná tu gel gína a mɛ̌. Dáy sêe ka Kiris e gína, njuku a há̧na mbêw zi tu gel gína a mɛ̌ nyá.»

28Zezú kaw tɔ́ʼɔhɛ̧ a ɓil vûn a Gáŋvbôn, a sa ɓá gbénáké ɓá: «I tu mí ɓá táŋáké, a tu gel ka mi erú rá̧ ka gí. Mi zi gí ka tûl ní nyá. Dáy, njuku ka pé mí, ɓá gbát njuku, i zi tu nɛ́ nyá. 29Mǐ, mi tu nɛ́, ɓayhí̧lé mi gí a gé lé, ɓá mɛ̌ pé, pé mí gí.» 30A goló, kú ɛ́ ŋgboro ɓay a ŋgbá nɛ́, dáy njuku a há̧na mbêw zi ɓá ndɔ̂ʼɔ ɗa nɛ́ nyá, ɓayhí̧lé nâm a mɛ̌ zi ka̧ nyá ɓáy. 31A ɓil dawá, njukuri ɓá ŋgɛ̧́náké láɓulaw hí̧ nɛ́ a sa: «Sêe ka Kiris e gínay, ké e niŋ hɛ̧sáʼama ndé ɓala njuku nɛ́ ka niŋ lé?»

Kú pé njukuri sé ŋgbá Zezú

32Fariziyɛ̧́ri̧ láɓay ka njukuri kaw ŋgɔ̧rɔ̧ké sé tûl a Zezú. Ɓaykénɔ́ pé, gáŋnjuku a nzáʼaká̧nari̧ rá̧ Fariziyɛ̧́ri̧ pé gun bɔʼɔ a kuriri ɓay a sé ŋgbá nɛ́. 33Zezú sa: «Mi e kuu wǎyri a ɓil nâm kpay ɓáy, a falké, mi e resé ziŋ njuku ka pé mí gíy. 34I e ɛ́ mí, dáy a tí ziŋ mí nyá, ɓayhí̧lé i zi ma sé gel ka mi e serú yá.» 35A tûl ɓay nɔ́, mbây a Juyífri vbí há̧narí̧ a bazeŋ a kuriri ɓá: «Gel a sí̧, ké e séna rá̧ ná tí ziŋ nɛ́ nyáy lé? Malé ké e sé gel a Juyífri ka ɓɛrɛ ma bazeŋ Girɛ́kri, dáy ké sé tɔ́ʼɔhɛ̧ hí̧ Girɛ́kri lé? 36Ɓay nɔ́ zi ɓay a sá ɓá hí̧ lé: I e ɛ́ mí, a tí ziŋ mí nyá, ɓayhí̧lé i zi ma sé gel ka mi e kawrú yá?»

Mbii ka hí̧ ndísɛ̌ʼɛ

37Kɔ́rɔ́ nâm, ka ɓá gáŋ nâm záymûnké, Zezú uru a ew sâa, a sa ɓá gbénáké: «Njuku mí lá kpɔʼɔmbii lé, ké gí gél ní, a ké gí nzó mbii! 38Njuku ka láɓulaw hí̧ mí, ɓá báŋké nɔ́ ka Mbété sáy, gáŋmbiiri ka hí̧ ndísɛ̌ʼɛ e ú a ɓil lawɛ́.» 39Ké saɓay nɔ́ ɓay a Têm Pukí, ka njuku mí láɓulaw hí̧ nɛ́ e ziŋáké, dáy Têm Pukíké pa̧n gí yá ɓáy, ɓayhí̧lé Gáŋvbôn pa̧n hɔ̧́ Zezú yá ɓáy.

Njukuri wal há̧narí̧ ɓay a Zezú

40A Fal láɓay nɔ́, njuku a há̧narí̧ a ɓil a njukuri sa: «Njuku nɛ́ ɓá gbát porofɛ́t a Gáŋvbôn!» 41A fékéri sa ɓá: «Mɛ̌ ké ɓá Kiris!» «Dáy njuku a fékéri ɓáy, sa ɓá Kiris ma tɛ̧́ gí a Galilê yá! 42Ɓayhí̧lé Mbété a Gáŋvbôn sa ɓá Kiris e ɓá gun zîi a Davít. Ké e tɛ̧́ gí a Bɛtɛlɛyɛ̂m, pû a Davít!» 43A goló njukuri wal há̧narí̧ ɓay a Zezú. 44Njuku a há̧narí̧ zi ɓá kú ŋgbá nɛ́, dáy njuku ɓá ndɔ̂ʼɔ ɗa nɛ́ zi tí yá.

Mbây a Juyífri kpúlaw a kuriri

45Gunbɔʼɔ a gáŋnjuku a nzáʼaká̧nari̧ kuu Fariziyɛ̧́ri̧ regí. Kú gí vbí kuriri ɓá: «Ɓayhí̧rá̧ kú zi ŋgbá Zezú gírú yáy lé?» 46Dáy Gunbɔʼɔ a kuriri, zi a sa hí̧ kuriri ɓá: «Njuku a há̧na zi saɓay nǎŋ bɔʼɔ mbêw ɓá báŋa njuku nɔ́ nyá!» 47«Dáy Fariziyɛ̧́ri̧ sa hí̧ kuriri: Wǎyri kɔ́, ké rɔ́ʼɔ wǎyri kɔ́ lé? 48I kó mbây a há̧na mbêw malé ɓurú Fariziyɛ̧́ri̧ láɓulaw hí̧ njuku nɔ́ lé? 49Dáy njuku nɔ́rí̧ zi tu sáŋna a Mɔyíze yá, ɓá njukuri ka Gáŋvbôn háhɛ̧ kɔ̧ tûl a kuriri!»

50Nikodɛm ka gí gel a Zezú ka haŋa sû̧ŋ, ka ɓá mbêw a bazeŋ a Fariziyɛ̧́ nɔ́rí̧, sa hí̧ kuriri ɓá: 51«Sáŋna a manárí̧, zi ɓá ɓay ŋgbá njuku ɗambɛl táŋ lá nzɛ́ʼɛ, táŋ tu hɛ̧ a ké niŋ nyá.» 52Dáy, kú rerú ɓay a sa hí̧ nɛ́ ɓá: «Mɔ̌ kɔ́, mɔ ɓá njuku a tísiri a Galilê pí lé? Mɔ ɛ́ ɓil Mbété a Gáŋvbôn ɓá táŋáké, mɔ e kó ɓá, porofɛ́t a há̧na zi tɛ̧́ bɔʼɔ mbêw ka tísiri a Galilê yá.»

[ 53Dáy njuku mbêw mbêw too, rekála sé nzáʼa vûn a mɛ̌.

Currently Selected:

Zâŋ 7: pnz

Highlight

Copy