John 8

1pa i Jesus me mule ape tauwe Olivet. 2Wa alo matava ran ni me kel ilo tinesara we roŋo, wa o sul nol me mule suria, wa ni me pute siwo, ti vatogora. 3Wa ira vatogo tara Pharise we tak ma suria o vavine me taur alo we pakapaka; wa ineira me mapua alo vatitnai, 4we vet munia wa, Vatogo, me taur o vavine iloke alo we pakapaka, alo ilone ran. 5Wa i Moses me vatraŋ nina alo lea si a patuŋ isei qe ge tamaike: pa iniko, ko we vava o sava ape neia? 6Neira we vava tamaike, pa we meregalea, si a tila lai ineia apena. Wa i Jesus me taqaloŋ siwo, ti raverave mun napisuna alo tano. 7Wa ineira qale varusia; wa ni we totoepe, ti vet muneira wa si, Isei nan kamiu gate ganganor, ni patuŋ raka ineia. 8Wa ni we taqaloŋ siwo mulaŋ, ti raverave mun napisuna alo tano. 9Wa ineira we roŋotag, wa nalolora we veveg qalo kelura, pa neira we rowolue tuwatuwale, me qeteg amaira tamaragai gai niŋa ira paspasoanai: wa i Jesus qale toga magesena, wa o vavine we tira alo vatitnai. 10Wa i Jesus we totoepe, ti sagarag o vavine magesena, ti vet munia wa, Vavine, avea ineira we gaganag si a veveg iniko; isei gate veveg qaloko? 11Naŋ neia wa, Uwe, Lord: isei tagai. Naŋ i Jesus ti vava wa, Wa inau mulaŋ na gate veveg qaloko; mule, nipea ganganor mulaŋ.]

12Naŋ i Jesus ti vet mulaŋ muneira wa, Inau o marmararan talo marama; isei qe tataga inau tete mulemule alo silsiliga, nava te taur o marmararan tape esu mun pulana. 13Naŋ ira Pharise we vava munia wa, Ko we gaganag we tira apeniko kel; nom o vavae gaganag iloke gate nun. 14Naŋ i Jesus ti valuira ti vet wa, Pa si na qe gaganag we tira apenau kel, pa mok o vavae gaganag we nun; ape nau we gilala ape na me van ma avea, wa nau we mule at ivea; nava kamiu gate gilala ape na me van ma avea wa nau we mule at ivea. 15Kamiu we veveg vires visogoi; inau gate veveg isei. 16Wa si nau qe veveg, mok o lea veveg we nun; ape nau gate magesek, pa ikara o Mama i gene me vatraŋ nau ma. 17We nun, me rave alo nomiu o lea wa, O vavae gaganag mor o tanun nirua we nun. 18Inau iloke we gaganag kel ape nau, wa o Mama i gene me vatraŋ nau ma we gaganag mona ape nau. 19Naŋ ineira we vava munia wa, Avea i tamama? Naŋ i Jesus ti valuira wa, Kamiu gate gilala inau, wa ikamiu gate gilala i Tamak; si kam qe gilala inau, kam te gilala mulaŋ i Tamak. 20Ni me vava o vavae ŋaŋ iloke ape tano moegene, we vatvatogo alo tinesara we roŋo; wa isei gate tauria, ape qoŋina gate wesu tiqa.

21O manigiu o ine i Jesus ti vet mulaŋ muneira wa, Nau we vanreag, wa ikamiu te sike inau, wa ikamiu te matevag napugamiu; kamiu tete mule lai ilo vatine nau we vanreag aia. 22Naŋ ira ta Judea we varvava wa, Ni te ge mate kelua? ape ni we vava wa, Kamiu tete mule lai ilo vatine nau we vanreag aia. 23Naŋ ni me vava muneira wa, Kamiu we ta i siwo ma, inau ta i sage ma; kamiu talo marama iloke, inau gate talo marama iloke. 24O manigiu o ine nau me vava mun kamiu wa, kamiu te matevag napugamiu; apen kamiu te matevag napugamiu, si kam qe tete nomtup ape nau iloke. 25Naŋ ineira we vava munia wa, Iniko isei? Naŋ i Jesus muneira wa, Na qale vava mun kamiu apena tama alo qetegiu. 26O gene ŋaŋ we qoqo amenau si na vava apen kamiu wa si na veveg; nava i gene me vatraŋ nau ma we nun, wa nau we vava mun o marama o savasava ŋaŋ na me roŋotag amaia. 27Ineira gate lolomaran ape ni we vava muneira ape o Mama. 28O manigiu ilone i Jesus ti vet muneira wa, Alo kamiu te la raka i Nat tanun, kamiu te qara gilala ape nau iloke, wa ape nau gate ge matapuk o sava, nava nau we vava o gene ŋaŋ iloke tama i Tamak me vatogo inau. 29Wa i gene me vatraŋ nau ma we toga amenau; o Mama gate ukeg inau si na toga magesek; ape nau we ge vagae o gene ŋaŋ ni we maros. 30Alo ni we vava tamaike, we tar me nomtupua.

31O manigiu o ine i Jesus ti vet munra ta Judea we nomtupua wa, Kam ta qale goara alo mok o vavae, kam te tur tiŋqoro anak; 32wa kam te gilala o nun, wa o nun te ge wasawasa ikamiu. 33Naŋ neira we valui goroa wa, Ikamam ira tupun i Abraham, kamam gate toga rot tiqa amenra sei: ko we vava tama avea si, Te ge wasawasa ikamiu? 34Naŋ i Jesus ti valuira wa, We nun, we nun, nau we vava mun kamiu wa, Isei qe ge o ganganor, ineia i gene rot anan o ganganor. 35Wa i gene rot tete toga galava alo ima, nava o natui we toga galava. 36O manigiu o ine si o Natui qe ge wasawasa ikamiu, kam te tur toga wasawasa. 37Nau we gilala apen kamiu ira tupun i Abraham; panava kamiu we sike si a ge mate inau, ape mok o vavae gate gao taso lai alo ikamiu. 38Nau we vava o sava na me ilo ti amen Tamak; wa ikamiu mulaŋ we ge o sava kam me roŋotag ti amen tamamiu. 39Naŋ neira we valui goroa we vet wa, I tupumam i Abraham. Naŋ i Jesus ti vet muneira wa, Kamiu ta ra natun Abraham, kam te ge o gagapalag ŋaŋ mon i Abraham. 40Nava ilokenake kam we sike we ge mate inau, inau qa o tanun nau we vava mun kamiu o nun na me roŋotag amen God: i Abraham gate ge tamaine. 41Kamiu we ge o gagapalag mon tamamiu. Naŋ neira we vava munia wa, Kamam gate wota pakapaka; i tamamam ituwale, i God nane. 42Naŋ i Jesus ti vet muneira wa, God ta Tamamiu, kam te tape inau; ape nau me rowolue ma wa nau me van ma amen God; ape nau gate van matapuk ma, nava ni me vatraŋ nau ma. 43Ape sa kamiu gate lolomaran naliŋak? apen kamiu gate tiŋqoro lai mok o vavae. 44Ikamiu tamen i tamamiu i Satan, wa ikamiu we maros we ge o tortoron kiskislag non tamamiu. Ineia i manvus alo qetegiu ran ma, wa ni gate tira alo nun, ape o nun tagai alo ineia. Alo ni we vava galegale ni we vava matapuna, ape neia i galegale wa i taman o galegale. 45Nava ikamiu gate nomtup inau, ape nau we vava nun. 46Isei nan kamiu we veveg qalo lai inau ape ganganor? Si nau qe vava nun, ape sa kamiu gate nomtup nau? 47Isei qe wot ma amen God ni te tiŋqoro o vavae ŋaŋ mon God; o manigiu o ine kamiu gate tiŋqoro, apen kamiu gate wot ma amen God.

48Naŋ ira ta Judea me valuia, me vet wa, Kamam we vava mantag wun was, Iniko ta Samaria, wa o vui we tatas amaiko? 49Naŋ i Jesus ti valuira wa, O vui we tatas tagai amenau; pa nau we nom mava i Tamak, wa ikamiu we nom tagtageag inau. 50Pa na gate sike we ge ronoga kel inau; apena we sike wa we veveg. 51We nun, we nun, nau we vava mun kamiu wa, Si o tanun ta taur mok o vavae, ni tete ilo mona o matea ti tuai ti tuai. 52Naŋ ira ta Judea we vet munia wa, Ilokenake kamam we gilala mantag momam si o vui we tatas amaiko: i Abraham me mate tara prophet ŋaŋ me mate: pa ko we vava wa, Si isei qe taur mok o vavae, ni tete nam ilo o matea ti tuai ti tuai. 53Ko we liwoa wun nan i tamanina i Abraham me mate ti, tara prophet ŋaŋ me mate? pa ko we ge iniko si sei? 54Naŋ i Jesus ti valui gorora wa, Si na qe log ronoga kel nau, nok o ronoga itagai; nava i Tamak we log ronoga inau, wa kamiu we vava ape neia wa si ineia God kamiu; 55pa kam gate gilala ineia, nava nau we gilala ineia; pa si na qe vava wasi na gate gilala ineia, na te tama ikamiu, i galegale; pa nau we gilala ineia, wa nau we taur mon o vavae. 56I tamamiu i Abraham me malakalaka si a ilo naqoŋik; wa me ilo mona, wa me qara apena. 57Naŋ ira ta Judea we vava munia wa, Natauma gate saŋavul tavelima tiqa, pa ko me ilo i Abraham? 58Naŋ i Jesus ti vet muneira wa, We nun, we nun, nau we vava mun kamiu wa, I Abraham gate wota tiqa na qale toga ran ma. 59Wa neira me taur kalo o wovat si a patuŋia; pa i Jesus me taviro pata, ti sere raveaglue alo vatitnara nan o tinesara we roŋo, ti mule sispara.

Currently Selected:

John 8: MOTA

Highlight

Copy