John 9
9
1Wa alo ni me mule sispara, ni we ilo o tuara tanun, o matapei alo wotava ran ma. 2Naŋ ira tiŋqoro we varusia wa, Vatogo, isei me ganganor, i gene iloke, si i tamana tana ravevena, pa ni me wota matapei apena? 3Naŋ i Jesus me valui goro wa, I gene iloke gate ganganor, wa gate i tamana tana ravevena; pa o manigiu o gagapalag mon God te ŋaŋa lue alo ineia. 4Namonina ran si nina gagapalag o gagapalag mon i gene me vatraŋ nau ma alo qale maran; o qoŋ we rasu ma isei tete gagapalag lai alolona. 5Alo inau qale toga alo marama, inau o marmararan talo marama. 6Ni we vava tamaike, pa ti anus siwo ilo tano, ti ge sin puaka mun o anus, ti nonon namatan i gene matapei mun o puaka ilone, 7ti vet munia wa, Mule, aqo alo qilo Siloam (we vava leas si, I gene vatraŋ). Wa ni me mule, ti aqo, ti kel ma, we iloilo. 8Wa ira tagvanuana wa irasei me iloiloa ti we tuai si ni we valapaere, we vava wa, Iloke wun i gene me putepute ti we paepaere? 9Naŋ o tuaniu wa, Ineia; naŋ o tuaniu mulaŋ wa, Tagai, pa tama ineia; naŋ neia wa, Inau. 10Naŋ neira we vava munia wa, Namatama me lik gasavai? 11Naŋ ni me valui goro wa, I gene nasasana i Jesus me ge o puaka, ti nonon namatak nia, ti vet munau wa, Mule i Siloam, wa ka aqo; wa na me mule, me aqo, pa me iloilo. 12Naŋ neira munia wa, Avea ineia? Naŋ neia wa, Esi, na gate gilala.
13Wa neira we tak i gene me matapei ti we tuai sur ira Pharise. 14Wa o qoŋ mapsag ilone i Jesus me ge o puaka, me ge lik namatana alolona. 15O manigiu o ine mulaŋ ira Pharise we varusia ni me iloilo gasavai. Naŋ neia wa, Ni me map o puaka vawo matak, wa nau me aqo, wa we ilo. 16Wa o tuan Pharise me vava wa, I gene iloke gate van ma amen God, ape ni gate matagisgis goro o lea ape qoŋ mapsag. Naŋ o tuaniu wa, I gene ganganor te ge gasei lai o vaglala ŋaŋ tamaine? Wa me qeteg vilewora amaira. 17Naŋ neira we vava mulaŋ mun i matapei wa, O sava ko we vava apen i gene ilone me ge lik namatama? Naŋ ni we vava wa, Ineia o prophet. 18O manigiu ilone ira ta Judea gate nomtup ape neia si namatana me pei ti, wa me lik; neira gai log ma i tamana tana raveven i gene me ilo ti; 19we varus rarua wa, Natumurua iloke kamurua we vava si ni me wota matapei? pa ni we ilo ilokenake gasavai? 20I tamana tana ravevena we valui gorora wa, Kara we gilala ape natun kara iloke, wa ape ni me wota matapei. 21Pa ni we ilo gasavai ilokenake kara gate gilala apena; wa isei me ge lik namatana kara gate gilala; tur varusia; ni me tamatua veta; ni te vava matapuna. 22I tamana tana ravevena we vava tamaine, ape rara we gogolo ira ta Judea; ape neira ta Judea me sora veta si a vure lue nan o ima siwo tuwale isei qe gaganag lue si neia i Christ. 23O manigiu o ine i tamana tana ravevena me vava wa, Ni me tamatua veta; tur varusia. 24Wa ineira we log vagaruei ma i gene me matapei ti, we vet munia wa, Ka log ronoga God; kamam we gilala apen i gene ilone si neia i ganganor. 25Naŋ ni we valui gorora wa, Si neia i ganganor si tagai nau gate gilala; o gene tuwale nau we gilala, ape nau me matapei ti wa ilokenake nau we ilo. 26Naŋ neira we vava mulaŋ munia wa, Ni me ge o sava muniko? ni me ge lik namatama gasavai? 27Naŋ ni me valuira wa, Na qara vava paso mun kamiu apena, wa kamiu gate roŋotag; ape sava kamiu we maros we roŋotag mulaŋ? kamiu mulaŋ we maros we qeteg tiŋqoro anana? 28Ineira we liŋasapuria, we vet wa, Iniko i tiŋqoro anana; wa ikamam ira tiŋqoro anan Moses. 29Kamam we gilala apen God me vava mun Moses; pa i gene iloke, kamam gate gilala si neia ma avea. 30O tanun ilone we valuira ti vet wa, Alova, pa iloke o vasasa, si kamiu gate gilala si neia ma avea, pa ni me ge lik namatak. 31Inina we gilala apen God gate roŋotag ira ganganor; pa si isei qe momogo God, wa we tataga non o maros, ni te roŋotag ineia. 32Alo qeteg marama ran ma gate roŋotag tiqa apensei me ge lik namatan o tanun me wota matapei. 33Si i gene iloke ta tete van ma amen God, ni tete ge lai o sava. 34Neira we valuia we vet wa, Ko me wotavag o ganganor gegese, pa ko we vatogo ikamam? Wa neira me vure luea.
35I Jesus we roŋotag ape neira me vure luea; wa ni me ilo suaria, ti vet munia wa, Ko we nomtup i Natun God? 36Naŋ ni me valuia ti vet wa, Pa isei ineia, Lord, si na nomtupua? 37Naŋ i Jesus ti vet munia wa, Ko me iloa, wa iloke we vava muniko nake. 38Naŋ ineia wa, Lord, nau we nomtup; wa ni me vatieqau goroa. 39Naŋ i Jesus me vet wa, Na me van ma ilo marama iloke ape veveg, si rasei gate ilo a ilo mora, wa si rasei we ilo a qeteg matapei. 40Wa ira tuan Pharise ilone we toga amaia me roŋotag o vavae iloke, we vet munia wa, Ikamam mulaŋ o matapei? 41Naŋ i Jesus ti vet muneira wa, Si kam qe matapei tete ganganor amen kamiu; nava ilokenake kamiu we vava wa, Kamam we ilo; o manigiu o ine nomiu o ganganor qale toga apena.
Currently Selected:
John 9: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
