Luk 10
10
1Naŋ iloke ŋaŋ me paso, i Lord me vonog raka tuan rasei we sea saŋavul lavearua, ti vatraŋira pulpul rua at ape nagona ilo val laqlaqe vanua, wa valvatiu ŋaŋ, ni te mule mona aŋaisa aia. 2Naŋ ni me vava mun neira wa, O gorogoro we poa, pa ira mawmawuitag o tapai: pa tur tataro mun i Lord i tag gorogoro, ni vatraŋ o tanun mawmawui ŋaŋ ape non o gorogoro. 3Tur vano at: ilo ma, na we vatraŋ kamiu at tam o nat sheep ŋaŋ ilo vatitne qoe kurkur. 4Turpea roaroan o taŋa som, wa nipea o tapera, nipea o sarusaru goro malekai: turpea wievavae isei a matesala. 5Kam qe mule pata ilo sava ima, tur vava raka wa, O tamata mun o ima iloke. 6Wa si ta nat tamata aia, o tamata anomiu te gara avunana: pa si ta tagai, o tamata anomiu te nug kel ma sur kamiu. 7Tur toga alo ima ilone nane, we imaima wa we ganagana o gene ŋaŋ tamaira: apen i mawmawuitag we sar ape non o rusarusai: turpea sirsirig valuima. 8Wa kam qe mule pata ilo sava laqlaqe vanua, wa neira qe lav vasgot kamiu, tur ganagana o savasava neira te sogo mun kamiu. 9Wa tur ge esura we gopa aia, wa tur gaganag mun neira wa, O marana non God me susurut ma sur kamiu. 10Pa kam qe mule pata ilo sava laqlaqe vanua, wa neira tete lav vasgot kamiu, tur rowolue ilo matesala ŋaŋ we tawela aia, tur vava wa, 11O wuwue tano iloke gai tape vanuamiu me gara ape raŋomam ikamam we maŋreag goro kamiu: panava tur lolomaran o ike, si o marana non God me susurut ma. 12Pa nau we vava mun kamiu wa, Te mataketake mun Sodom alo qoŋ iloneia, nava mun o laqlaqe vanua ilone tagai.
13Tur magarosa iniko Korasin! tur magarosa iniko Bethsaida! ape si me ge o vasasa ŋaŋ a Tur wa a Sidon, tama me ge ti alo kamurua, irarua me nom leas we tuai veta, we putepute alo siopa nolava wa o tarowo. 14Panava te mataketake mun Tur wa Sidon alo qoŋ veveg, nava mun kamurua tagai. 15Pa iniko, Kapernaum, te ge rakatiko niŋa o tuka? te savragiko siwo i Panoi. 16Isei qe roŋotag kamiu we roŋotag inau; wa isei qe gevtag kamiu we gevtag nau: pa isei qe gevtag nau we gevtag i gene me vatraŋ nau ma.
17Naŋ ira saŋavul lavearua me vusiag malakalaka kel ma, we vava wa, Lord, o vui we tatas ŋaŋ gai me map siwo alalaŋamam alo sasama. 18Naŋ neia wa, Na me ilo i Satan tam o vila me masu nan o vunana. 19Ilo ma, na me le veta mun kamiu o mana si kamiu a vara valaqat o mata ŋaŋ wa o golowaŋara, wa goro o vavakae nol non o tavalalea: wa tagai o sava te ge manaras ilo kamiu. 20Pa turpea malakalaka ape ike, wa si o vui ŋaŋ me map siwo alalaŋamiu; nava tur malakalaka ape me rave veta nasasamiu avunana.
21Wa alo masao qoŋ ilone ni me qaraqara mun o Vui we Roŋo, ti vava wa, Na we varean iniko, Mama, Lord goro o vunana wa o lalaŋana, ape ko me liŋarag tagea o gene ŋaŋ iloke nan ra lolomaran wa ra menaro, nava me gaganag lue munira tete ŋaŋ: we nun, Mama, ape we wia tamaine alo nagoma. 22Wa ni me kilau we vava mun ra tiŋqoro wa, I Tamak me le nol ran ma mun nau o savasava ŋaŋ: wa tagtagai qalo o tanun we gilala isei o Natui, nava o Mama; wa tagtagai qalo o tanun we gilala isei o Mama, nava o Natui we gilala, tana sei mulaŋ o Natui we maros we gaganag lue ineia munia. 23Wa ni me kilau mun ra tiŋqoro ti vava vires mun neira wa, Tur wia o matai ŋaŋ we ilo o gene ŋaŋ kam we ilo. 24Ape na we vava mun kamiu wa, Ira prophet tara maranaga ŋaŋ we qoqo me maros ti si a ilo o gene ŋaŋ kamiu we ilo, nava gate ilo; wa si a roŋotag o gene ŋaŋ kamiu we roŋotag, nava gate roŋotag.
25Wa ilo, o tuara vatogo me tavaraka we meregalea, ti vava wa, Vatogo, o sava na te ge si na taur usurag mok o esu galava? 26Naŋ ni we valui wa, O sava me rave veta alo lea? ko we vasogo tama avea? 27Naŋ neia we valuia wa, Ka tape i Lord God iniko mun natoqama nol, wa mun naatama nol, wa mun nom o tinegaro nol, wa mun nom o nonomia nol: wa i tagvanuama tama iniko kel. 28Naŋ ni we vet munia wa, Ko me valui taniniga: ka ge tamaine wa ko te esu. 29Wa ni we maros we ge tintin naapena, ti vava mun i Jesus wa, Pa isei i tagvanuak? 30Naŋ i Jesus me valui goroa wa, O tuarasei me taqel sur siwo nan o Jerusalem i Jeriko, pa me roro ilo tanun vus pal, wa neira me saru reag non o siopa, me towosia, me rowo vitagia, mantagai ti e te mate. 31Wa o tuara oloolo me taqel gap siwo alo matesala ilone, wa me iloa, me mule sispara. 32Wa tamaine mulaŋ gina o tuara ta Levi me niŋa o vatine, ti iloa, ti mule sispara. 33Nava o tuara ta Samaria, alo non o vanoga me niŋa ineia, me iloa, ti lolo magarosa ineia, 34ti van ma suria, ti rot goro o mate mataqa, ti liŋ o nimiu wa o wine apena, ti vaptegia avune pulan o ass, ti takia ilo ima tawu, ti tataga suria. 35Wa alo matava sin mule, ti raun lue o som nirua, we la at mun o tagiima, ti vet wa, Ka tataga suria; wa o sava ko ta la sal ape neia, nau we kel mulaŋ ma, wa na te wono pug muniko apena. 36Ko we nonom isei nan ratol me qeteg tagvanua mun o tanun me roro ti ilo tanun vus pal? 37Naŋ neia wa, I gene me gagapalag magarosa munia. Naŋ i Jesus ti vet munia wa, Ka van, ka ge moma tamaine.
38Naŋ alo vanoga ni me mule pata ilo tuara vanua: wa o tuara vavine nasasana i Martha me lav vasgotia ilo imana. 39Wa i tasina apena nasasana i Meri; wa ineia iloke me pute rivtag naraŋon i Lord, ti roŋroŋotag naliŋana. 40Naŋ me valeŋai i Martha sin lapasag vagaqoqo: wa ni me peteŋia ma, ti vava wa, Lord, ko gate nonom apen tasik me tivtag nau na lapasag magesek? Ka vet munia apena sin piriŋ nau. 41Naŋ i Jesus me valui goro we vet munia wa, Martha, Martha, ko we nom teqateqa ape gene we qoqo, wa natoqama we matikotiko. 42Pa o gene tuwale turwia matamot: wa i Meri me ilo sur anona o tavaliu we wia iloke, wa tete lareag ran nania.
Currently Selected:
Luk 10: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
