Luk 11

1Naŋ me ge tamaike, ni we toga alo tuara masaoi we tatataro, wa me paso, o tuara tiŋqoro anana we vava munia wa, Lord, ka vatogo kamam si a tataro, tama i John mulaŋ me vatogo ira tiŋqoro anana. 2Naŋ ni me vava mun neira wa, Kam qe tataro tur vava wa, Tamamam tavunana, Nasasama ni roŋo. Nom o marana ni mule ma. Nom o maros ni lai, alalaŋana tama avunana. 3Le ma valqoŋ mun kamam o sinaga we tira ape valqoŋ. 4Wa ka nomvitag napugamam; tama ikamam mulaŋ we nomvitag valrasei momam o pug avunara. Wa nipea ukeukeg kamam ilo galeva; ka lav kamam nan o ganganor.

5Naŋ ni me vava mun neira wa, Isei nan kamiu i pulsalana apena, pa te mule suria alo tine qoŋ, we vava munia wa, Pulsala, le galtag ma mun nau o bread ta tol; 6ape o tuara pulsalak me va niŋa inau alo non o vanoga, pa itagai amenau si na sogo nagana. 7Naŋ neia alele ima te valui goroa, te vet wa, Nipea ge apegalo inau: o mateima me tipag goro veta, wa ikamam ira nanatuk ŋaŋ alo tano matur veta; nau tete tavaraka lai si a le at muniko. 8Na we vava mun kamiu wa, Ni ta tete tavaraka si a le munia ape pulsalana, panava ni te tavaraka te le munia nivisa ni we maros ape non o waratagai. 9Wa inau we vava mun kamiu wa, Tur paere, wa te la mun kamiu; tur sike, wa kam te ilo suar; tur niŋniŋ, wa te waka mun kamiu. 10Ape valsei we paere we lav mona; wa isei we sike we ilo suar; wa munsei we niŋniŋ te waka munia. 11Wa isei nan kamiu o mama, wa i natuna qe paere o bread nania, ni te le munia o vat? si o iga, wa leas o iga ni te le munia o mata? 12Si ta paere o tol toa, te le munia o golowaŋara? 13Si kamiu tamaine, ira gene we tatas, we gilala we le o sogov we wia mun ra natumiu, sa si i Tamamiu tavunana tete la sal aneane o Vui we Roŋo mun rasei we paere munia?

14Naŋ ni we vasaug o vui we tatas, o luto. Wa me ge si o vui me rowo lue veta, wa o luto qara vava; wa o sul me mamakei lava. 15Nava o tuan neira me vava wa, Ni we vasaug o vui we tatas ŋaŋ mun i Beelsebub i moai goro o vui we tatas. 16Wa o tuanira we sea me gale iloa, we sike amaia o vaglala ma vunana. 17Naŋ ni me gilala nor o nonomia, ti vava mun neira wa, O val marana ta vile wora o tavaliu nan o tavaliu te wou apena; wa qe tavawora o tavala ima nan o tavaliu, ti masu. 18Wa i Satan ta vilewora o tavaliu nan o tavaliu, non o marana te tira gasei nia? ape kamiu we vava was nau we vasaug o vui we tatas ŋaŋ mun i Beelsebub. 19Pa si nau qe vasaug o vui we tatas ŋaŋ mun i Beelsebub, ranatumiu we vasaugira munsei? o manigiu ilone neira te veveg mora kamiu. 20Panava si na we vasaug o vui we tatas ŋaŋ mun napisun God, o marana non God gai me wesu veta ma mun kamiu. 21Alo si i vavakae me saru goroa mun o reŋreŋ vagalo qe saka goro natinesarana, pulan o savasava ti toga tatapuga. 22Panava alo isei we vavaka nania te rowo ma ivunana, wa te lalakete nania, ni we wosag nania non o reŋreŋ nol ilone ni me sov ti apena, ti aseg wora non o sagie vagalo.

23Isei qe tete amenau, neia o tavaliu mun nau: wa isei qe tete vile tuwale amenau, ni we savrag salsaleŋa. 24Alo si o vui we tatas qe rowo lue nan o tanun, ti seneut ilo rea ŋaŋ, we sike mona o tano mapsag; panava gate sike suar; naŋ ti vet wa, Na te vusiag kel ilo imak na me rowolue ma ti nan. 25Wa ti mule niŋa, ti ilo me werasa wa me valug mantag. 26Naŋ ti van at, ti lav tuania o vui mulaŋ lavearua we tatas nania; wa neira we mule pata we toga vawlig alolona: wa o gene ŋaŋ a tagir amen o tanun ilone we tatas nan o moai.

27Naŋ me ge tamaike, ni we vava tamaike, pa o tuara vavine alo sul ti log raka, ti vava munia wa, Tur wia o toqai me mule tak iniko, wa o sus ko me sus moma ti. 28Pa ni me vet wa, Uwe, pa tur wia rasu irasei we roŋotag o vavae non God, wa we kokor goro.

29Naŋ o sul me vug vaqirqir suria, ti vava raka wa, O taraŋiu iloke o taraŋiu kiskislag; we sikesike o vaglala; pa tete le o vaglala we sea mun neira, pa o vaglala gese non i Jona o prophet. 30Ape tama i Jona me qeteg vaglala mun ra ta Nineve, tamaine mulaŋ gina i Nat tanun mun o taraŋiu iloke. 31O tavine maranaga ta i sage te tavaraka tuwale alo qoŋ veveg amen o taraŋiu iloke, wa te veveg qaloa: ape ni me mule ma nan o ulus marama sin roŋotag o lolomaran non i Solomon; wa, ilo ma, isei apena iake we liwoa nan i Solomon. 32Ira ta Nineve te tavaraka tuwale alo qoŋ veveg amen o taraŋiu iloke, wa te veveg qaloa; ape neira me nomleas ape toretore mon i Jona; wa, ilo ma, isei apena iake we liwoa nan i Jona.

33Tagai o tanun me tiu paso o pul, qara map pata alo masaoi me wono goro, si alalaŋe wumeto, nava vawo tano pul, o manigiu si rasei qe mule pata te ilo o valawar. 34O pul tape turiama namatama: namatama qe mamalete, naturiama nol mulaŋ te marmararan apena; nava si qe malkeke, naturiama mulaŋ te silsiliga nol apena. 35Ka ilo mantag moma apena si o valawar alo loloma we silsiliga si tagai. 36O manigiu ilone si naturiama nol qe marmararan, wa itagai tea natakelena we silsiliga, te marmararan nol, tama o pul ti valawariko mun nasiŋasiŋana.

37Naŋ alo ni qale vava, o tuara Pharise we paere munia sin gana tuwale amaia; wa ti mule pata, ti pute siwo. 38Wa o Pharise ilone me ilo, ti mamakei ape ni gate vasug alo gate gana tiqa. 39Naŋ i Lord me vava munia wa, Ilokenake kamiu ira Pharise ŋaŋ we asa wenewene o kule vinlasa wa o tapia; panava nalolomiu we liwatvag o tatalaiga wa o ganganor. 40Ra qaqae kamiu, i gene ilone me tiŋ o vareai ma pa ni gate tiŋ mulaŋ o loloi? 41Panava tur le aleŋa o gene ŋaŋ apena, wa ilo, o gene nol ŋaŋ qara wenewene mun kamiu apena.

42Pa tur magarosa kamiu, ira Pharise ŋaŋ! kamiu we le o saŋavului nan o mavana wa o magasa wa o val gene riv talo tuqei, nava kam we la raka nane o veveg wa o tapeva mun God: namomiu ran si a ge tamaike nake, panava gate namomiu si a gevtag ilone ŋaŋ. 43Tur magarosa kamiu, ira Pharise ŋaŋ! apen kamiu we toron o moe tanoi alo ima siwo tuwale ŋaŋ, wa o liŋe wievavae alo sare wolwol ŋaŋ. 44Tur magarosa kamiu! ape kamiu tam o qaraŋ tamate we marawatavun, wa o tanun we vara avunana, panava gate gilala.

45Naŋ o tuara vatogo me valui goroa we vet wa, Vatogo, ko we vava tamaike ko we liŋasapur kamam mulaŋ. 46Naŋ neia wa, Tur magarosa gai kamiu mulaŋ, ira vatogo! ape kamiu we qisaŋ o tanun ŋaŋ mun o reŋe we vagotgot, nava kamiu gate taŋo tikol momiu o reŋe mun o pisui tuwale. 47Tur magarosa kamiu! apen kamiu we woso goro naqaraŋira prophet mun o vat, pa ira tamamiu me vus mateira. 48We nun gai, kamiu we gaganag we tira apena wa we mawui goro o gagapalag ŋaŋ nora tamamiu: ape neira gai me vus mateira, pa kamiu we woso gora naqaraŋira mun o vat. 49Manigiu apena o lolomaran non God me vava wa, Na te vatraŋ mun neira ira prophet wa ira sala ŋaŋ, wa neira te vus mate o tuaniu wa te kos savragira. 50O manigiu si te nunug amen o taraŋiu iloke ape nanarara prophet nol, me ge sale alo me map o sagere marama ma; 51nan nanaran Abel gai niŋa nanaran Sakarias me mate alo masao tano oloolo wa o ima we roŋo: we nun na we vava mun kamiu, Te nunug qet apena amen o taraŋiu iloke. 52Tur magarosa kamiu ira vatogo! apen kamiu me lareag o ki tape lolomaran: wa kamiu gate mule pata momiu, wa irasei te mule pata ti kamiu me gatogoro nan.

53Naŋ ni me rowolue veta nan o vatine, ira vatogo tara Pharise ŋaŋ me qeteg ute aneanea, wa me anumagia sin vava ape gene we qoqo; 54wa tama we pute goro palua, si neira sakau lai tea o vavae nan navalana.

Currently Selected:

Luk 11: MOTA

Highlight

Copy