Luk 15
15
1Naŋ ira rowoagtalsom nol tara ganganor we petpeteŋia si a roŋotagia. 2Wa ira Pharise tara vatogo me wutoto apena we vava wa, I gene ilone we lav ira ganganor, wa we ganagana tuwale amaira.
3Naŋ ni me vava tenegag tamaike mun neira, ti vet wa, 4Isei amen kamiu pulan o sheep melnol, o melnol anai ta tagea nania, ni tete taŋovtag o sheep saŋavul laveavat o numei laveavat alo vanua vanameag, ti van goro ilone me tagea ti, ni gai ilo suar? 5Wa me ilo paso, ti rig kalo, we malakalaka apena. 6Wa me niŋa naimana, ti suware ma rapulsalana tara tagvanuana, ti vet wa, Tur malakalaka tuwale amenau; ape nau me ilo suar kel pulak o sheep me tagea ti nan nau. 7Na we vava mun kamiu wa, Te malakalaka gina tamaine alo tuka apen i ganganor tuwale we nom leas, nan apen ra taniniga saŋavul laveavat o numei laveavat, o manig nomleas tagai amaira.
8Si rosei mulaŋ o vavine pulan o som saŋavul amaia, o saŋavului ta tagea nania, tete tiu o pul, tete werasa naimana, we sike vagorgor ni gai ilo suar? 9Wa me ilo suar paso ti suware ma raro pulsalana wa iraro tagvanuana, ti vet wa, Tur malakalaka tuwale amenau; ape na me ilo suar kel pulak o som me tagea ti nan nau. 10Tamaine gina, nau we vava mun kamiu wa, Te malakalaka ape nagora angel anan God apen i ganganor tuwale we nom leas kel.
11Naŋ neia wa, Ranatunsei pulrua apena: 12wa o tawurmera me vava mun tamana wa, Mama, ka le ma mun nau natakele pulama we tira ape nau. Wa i tamana me aseg valrara napulana. 13Wa o qoŋ gate purat me paso o tawurmera me vile nol tuwale, ti sirig ras ilo vanua we sea, ti ge garugaru viteg vanameag napulana ape togara kiskislag. 14Wa me ganvun nol paso nania, o maro lawalawa qara ge lolovag o vanua ilone; wa ni me masmasawora raka apena. 15Wa ni me mule we kata amen o tuara tagvanua talo vanua ilone; wa ni me vatraŋia at ilo utagina ape vaŋan qoe. 16Wa ni me maros we gan toqo mun o wo tangae nagara qoe; pa isei gate la qalo munia. 17Wa naliŋana me ŋaŋarag kel ma, ti vava wa, Nivisa ra rowrowovag we qil amen tamak we gana matila o sinaga, pa inau iloke we uro mate! 18Na te tavaraka na te mule kel sur tamak, na te vet munia wa, Mama, na me ganganor goro vunana, wa alo nagoma, 19wa na gate sar si a log natuma inau: ka ge inau tama o tuara rowrowovag anama me qil. 20Wa ni me tavaraka, ti van sir tamana. Pa ni qale ras i tamana me iloa, ti lolo magarosa neia, ti valago, ti suragia avune nenena, ti roromtagia. 21Naŋ natuna me vet munia wa, Mama, na me ganganor goro vunana, wa alo nagoma, wa na gate sar si a log natuma inau. 22Wa i tamana me vava mun ra rowrowovag wa, Tur la lue gaplot ma o moe siopa, tur saru goroa nia, wa saru goro napisuna mun o lala, wa saru goro namalekana; 23wa le lue ma o nat kau we wuras, tur vus mate, wa nina ganagana, nina malakalaka. 24Ape natuk iloke me mate ti, pa me esu kel; me tagea ti, pa me ilo suaria. Wa neira me malakalaka raka. 25Pa o moemera alo utag; wa alo we kel ma, we peteŋ o ima, ti roŋotag o vigo wa o sawai; 26wa ni me log tuara lumagav ma, ti varusia si o sava nane. 27Naŋ ti vet mun neia wa, I tasima me kel ma; wa i tamama me vus gan o nat kau we wuras, ape ni me lav esu kelua ma. 28Pa ni me lologagara, wa ni gate maros we mule pata. Pa i tamana me rowo lue we tiasia ma. 29Nava ni me valui we vava mun tamana wa, Ilo, o tau we qoqo tamaike nau me mawmawui muniko, wa na gate tames tea naliŋama, pa ko gate le tea mun nau o nat goat, si tak rapulsalak a malakalaka tuwale apena. 30Nava natuma iloke me kel ma, me ge ganvun ti napulama ape vavine pakapaka ŋaŋ, ko qara vus mate gan o nat kau we wuras. 31Naŋ neia munia wa, Natuk, ko we gogae ran ma amen nau, wa napulak o savasava napulama; 32nina malakalaka, nina qaraqara we wia nan, ape tasima iloke me mate ti, pa me esu kel; me tagea ti, pa me ilo suaria.
Currently Selected:
Luk 15: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
