Luk 16
16
1Naŋ ni me vava mun ra tiŋqoro wa, O tuara meresom i ilogoro apena, wa me tila munia apen iloke si ni we ge garugaru viteg vanameag pulan o savasava. 2Wa ni me logia ma, ti vet munia wa, O sava iloke na we roŋotag apeniko? ka la kel ma o raverave gaganag ape nom o ilogoro, ape ko tete ilogoro lai mulaŋ aŋaisa. 3Naŋ i ilogoro me vava roroŋo wa, Na ge o sava? apen i tagik we lereag nan nau nok o tano ilogoro; na gate maremare si na gilgil, wa si na ta valapaere naapek te maragai apena. 4Na me nommot si na ge o sava, si aŋaisa me gevtag nau nan o tano ilogoro, neira a lav vasgot nau ilo imara. 5Naŋ ni me suware tuwatuwale ma suria irasei o pug amon i tagina avunara, ti vava mun o moai wa, Mon tagik o pug avunama nivisa? 6Naŋ neia wa, O qolago lig oliv melnol vatuwale. Naŋ ti vet munia wa, Ka la nom o raverave pug, ka pute gaplot siwo, ka rave si saŋavul tavelima. 7Naŋ ti vava mun tuara wa, Pa avunama o pug nivisa? Naŋ neia wa, O tapera korn melnol vatuwale. Naŋ neia wa, Ka la nom o raverave pug, ka rave si saŋavul laveatol. 8Wa i tagina qara varean i ilogoro variava ilone, ape ni me gagapalag menaro: ape ra nat marama iloke ape tur taraŋira we menaro aneane nan ra nat maran. 9Pa nau we vava mun kamiu wa, Tur ge raka pulsalamiu alo mamon variava, o manigiu si alo te tagea ilone, neira te lav vasgot kamiu ilo ima ŋaŋ te galava.
10Isei qe kokomag goro o gene mantagai aneane, we kokomag mulaŋ goro o gene we qoqo. Wa isei qe variava ape gene mantagai aneane, we variava mulaŋ ape gene we qoqo. 11O manigiu ilone si kamiu gate kokomag veta goro o mamon variava, isei te map amen kamiu o tur gene si a kokor goro. 12Wa mulaŋ, si kamiu gate kokomag goro pulansei we sea, isei te le mun kamiu napulamiu? 13O rowrowovag tete mawmawui sorakorua lai mun ra vatvatraŋ, ape ni te ŋustup i tuara, wa te tape o varuei; si ni te kata maremare amen i tuara wa te surtagtageag o varuei. Kamiu tete mawmawui sorakorua lai mun God wa mun mamon. 14Naŋ ira Pharise ra mansom me roŋotag o ike nol; pa me vasiria. 15Naŋ ni me vava mun neira wa, Kamiu iragai we ge taniniga kel kamiu alo nago tanun, panava God we gilala nalolomiu; ape o gene we raka sage amen o tanun pa we vasigtag alo nagon God. 16O lea wa ira prophet me toga niŋa i John: nan naqoŋina gina me gaganag o lea we wia ape marana non God, wa val tanun we kalo vavakae ilolona. 17Pa we toga wora si o vunana wa o tano te sagesaru, nan si o manerei tuwale tape lea te masu tagea. 18Isei qe gevtag rasoana, wa qe lag o tavine we sea, ni we pakapaka: wa isei qe lag o vavine ilone neira me gevtagia ti, ni we pakapaka.
19Naŋ o tuarasei o meresom me saru goroa mun o siopa sorsoroga wa we aqaga, wa we toga malakalaka valqoŋ alo tar valeŋaleŋa gese. 20Wa o tuara masara nasasana i Lasarus, me vanovia ape mateimana, o gov; 21wa nalolona me toron neira a vaŋania mun o vain ganagana me mamas ti nan o tano ganagana non o meresom; pa o kurut ŋaŋ gai me mule ma, wa we nananam namatemanigana. 22Pa me ge si o masara me mate, wa ira angel ŋaŋ me sapaloa sage vawo varan Abraham: wa o meresom mulaŋ me mate, wa me saloa alo qaraŋ tamate. 23Wa a Panoi o vivtig we rakutia, wa ti atelaŋ namatana, ti ilo i Abraham aras, wa i Lasarus vawo varana. 24Wa ni me awo raka, ti vet wa, Mama Abraham, ka magarosa inau, ka vatraŋ ma i Lasarus ni tuk naqatpisuna ilo pei, si a ge mule nagarameak nia: ape me rakut aneane inau alo av iloke. 25Pa naŋ i Abraham wa, Natuk, ka lolomaran ape ko me la moma veta pulama o mataigene alo qoŋ esuma, pa i Lasarus o malagene tamaine, pa ilokenake naapena me mamasug, wa we rakutiko. 26Wa iloke mulaŋ, alo vatitnanina o qaraŋa piroro me one goro galava veta, si irasei iake qe maros we lagau at sur kamiu tete lai, wa irasei mulaŋ iane qe maros we lagau ma sur kamam tete lai. 27Naŋ neia wa, O manigiu o ine, mama, na we paere muniko wa, ka vatraŋia at ilo iman tamak: 28ape ratasik pul tavelima apena, pa si ni gaganag weswes lue at mun neira, nan neira mulaŋ wa mule ma ilo tano rarakut iloke. 29Nava i Abraham we vet wa, I Moses wa ira prophet amaira veta, neira tiŋqorora. 30Naŋ neia wa, Tagai, mama Abraham; nava si isei nanra mate ta vano surira neira te nom leas. 31Naŋ ti vet munia wa, Si neira ta tete tiŋqoro i Moses wa ira prophet, tete pes laira mulaŋ, si isei qe tavaraka kel nan ra mate.
Currently Selected:
Luk 16: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
