Luk 17
17
1Naŋ ni me vava mun ra tiŋqoro anana wa, Tete nonom lai pa si o gene ge tutuag te wot ran ma, panava tur magarosa isei o manigiu apena! 2We wia ras munia si me ligo o vat galgalolo ape nenena, wa me tul savragia ilo lama, nan ni wa ge tutuag tuwale nan ra mantagai ŋaŋ iloke. 3Tur ilo goro kamiu: i tasima ta ge tatas, ka gol vatanaua; wa ni ta nom leas, ka nomvitag napugana. 4Wa ni ta ge tatas muniko vaga lavearua alo qoŋ tuwale, wa vaga lavearua ta nug kel ma suriko, we vava wa, Nau we nom leas; ko te nomvitag munia.
5Naŋ ira sala me vava mun i Lord wa, Ka tuan o nomtup mun kamam. 6Naŋ i Lord wa, Si o nomtup tamen kamiu tam o siv mustard, kam te vava lai mun o sukomin iloke wa, Sug raka, riv leas alo lama; wa te roŋotag lai kamiu. 7Pa isei amen kamiu o rowrowovag apena we vutvut o tano si we altag goro o sheep, pa ni ta kel ma nan o tuqei, te qara vava munia wa, Togtogoa ma gai, pute siwo ape ganagana? 8Pa wasi ni tete vava munia wa, Wurvag gaksa sava tea si na gana, wa ka rotig goro naturiama si a gagapalag surinau, nau gai gana wa we un paso, ko qara gana qara un moma? 9Ni te varean o rowrowovag qa ilone ape ni me ge o gene ŋaŋ me vatraŋia ti apena? 10Tamaine mulaŋ gina kamiu, kam me ge paso qet o gene ŋaŋ me vatraŋ kamiu ti apena, tur vava wa, Ikamam o rowrowovag we mawmawui sasawuara, kamam me ge matagesegese o sava namomam ran gese si a ge.
11Naŋ me ge alo nor o vanoga i Jerusalem, ni me so mot alo vatitne Samaria wa Galilea. 12Wa alo ni we niŋa pata ilo tuara laqlaqe vanua, o tanun saŋavul tuwale o resresmavin we varniŋa neia, we tira asau. 13Naŋ neira we log eleele, we vet wa, Jesus, Vatogo, magarosa kamam. 14Naŋ ni me ilora, ti vet wa, Tur va at, tur gaganag natarapemiu mun ra oloolo. Naŋ me tamaike, neira me van at, wa qara wenewene kel. 15Wa i tuwale nan neira me ilo si ni me wenewene kel, ti vusiag kel, wa mun o liŋai we poa ti log ronoga God. 16Wa ti suragia ape nagona peteŋ naraŋona, ti vareania; pa ineia o ta Samaria. 17Naŋ i Jesus we valui ti vet wa, Ira saŋavul tuwale gate wenewene kel? pa ra laveavat, neira avea? 18Gate ilo rasei we vusiag kel ma si a ge o ronoga mun God, pa o tawu iloke tuwale? 19Naŋ ni me vet munia wa, Tavaraka, van at, nom o nomtup me ge esu ko.
20Naŋ ra Pharise me varusia ape marana non God si aŋaisa te mule ma, wa ni me valui gorora ti vet wa, O marana non God gate mule ma alo tanun we matmatag apena. 21Wa tete vava lai wa, Ilo ma, iake! si, Ilo, iane! ape ilo, o marana non God alo lolomiu.
22Naŋ ni me vava mun ra tiŋqoro wa, O qoŋ ŋaŋ te rasu ma, nalolomiu te toron si kamiu a ilo naqoŋin i Nat tanun ta tuwale, panava tete ilo lai. 23Wa neira ta vava mun kamiu wa, Ilo, iane! Ilo ma, iake! turpea mulemule at, wa turpea tatataga neira. 24Ape tam o vila ti gapilwaŋa, ti siŋa levegao tavala tuka; tamaine mulaŋ i Nat tanun alo qoŋina. 25Pa amoa ni te roŋo magav ran vagaqoqo, wa o taraŋiu iloke te gevtag ranua. 26Wa tama me ge ti alo qoŋin i Noa we tuai; te tamaine mulaŋ gina aŋaisa alo qoŋin i Nat tanun. 27Neira me ganagana, me unun, me laglag, me togatoga amairasei, gai niŋa o qoŋ ilone i Noa me kalo pata ilo aka; wa o liliv me liliv, wa me ge tagea nol neira. 28Mulaŋ tama me ge ti alo qoŋin Lot; neira me ganagana, me unun, me wolwol ma, me wolwol reag, me rivriv, me tautaur o ima; 29pa alo qoŋ ilone i Lot me toa nan o Sodom, o av wa o malauganqat me tavtete ma vunana, me gao tagea nol neira. 30Te sasarita ran apena alo qoŋ ilone i Nat tanun te ŋaŋa lue ma alolona. 31Alo qoŋ nane ilone, isei ta toga vawo qatiima wa pulan o savasava lele ima, ni nipea siwo goro si a lareag ilone; wa isei ta toga alo utag, ineia mulaŋ nipea vusiag kel goro o savasava me tikula veta. 32Tur nom kel ape rasoan i Lot. 33Isei qe sike sin kokor goro naatana ni te ge tagea, pa isei qe ge tagea ni te vawota we esu. 34Na we vava mun kamiu wa, Alo qoŋ ilone o tanun pulrua te risa alo tano matur tuwale; te la raka tuwale, pa te raka vitag o varuei. 35Wa o vavine pulrua te galolo tuwale; te la raka i tuwale, pa te raka vitag o varuei. 36Wa pulrua alo utag; te la raka tuwale, pa te raka vitag o varuei. 37Naŋ neira we valui, we vava munia wa, Avea, Lord? Naŋ ni we vet muneira wa, O turiai ta avea, o mala ŋaŋ te vug tuwale apena.
Currently Selected:
Luk 17: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
