Luk 18

1Wa ni me vava tenegag mun neira, si o tanun ŋaŋ a tataro vagae ran, wa nipea naapera we motmot, ti vet wa, 2Alo tuara laqlaqe vanua o veveg apena, pa ni gate momogo God, wa naapena gate maragai o tanun. 3Wa alo laqlaqe vanua ilone o naro; wa ni me mulemule vagaqoqo ma suria, ti vet wa, Ka sar mun o tavalalea ape nau. 4Pa galewora ni gate maros: paso nan ni me vava roroŋo wa, Naapek gate momogo God, wa gate maragai mulaŋ o tanun; 5panava ape naro iloke we vavagaile nau, na te sar ape neia, wa rarakut nau ni te mulemule galava ma. 6Naŋ i Lord me vava wa, Tur tiŋqoro o sava i veveg variava me vava. 7Pa wasi God tete sar ape tanun iloraka ŋaŋ anana we logia valqoŋ wa valmaran, pa ni we lolo malumlum ape neira? 8Na we vava mun kamiu wa, Ni te sar ape neira gaplot; panava i Nat tanun te mule ma aŋaisa pa wasi ni te van suar tea o nomtup a marama?

9Wa ni me vava tenegag mulaŋ tamaike mun o tuanrasei we sov avunara kel si we taniniga, wa we surtagtageag o sul nol we sea: 10Irasei pul rua me mule sage ilo tinesara we roŋo si a tataro; tuwale o Pharise wa o varuei o rowoagtalsom. 11Wa o Pharise me tira we tataro vires neia wa, God, na we varean iniko, ape nau gate tama o tanun ŋaŋ o sul, neira we wosawosag, we variava, we pakapaka, si tama o rowoagtalsom iloke. 12Nau we garagara mamasa vagarua val wik, na we le o saŋavului nan nok o val tuvatuvag. 13Nava o rowoagtalsom we tira arasu, gate maros we vawerei vires namatana ivunana, panava me tut navarana, ti vet wa, God, magarosa inau i ganganor. 14Na we vava mun kamiu wa, I gene iloke me kel siwo ilo imana me veveg taniniga raka sage ineia nan o tuara; ape val sei qe soua, te ge pepewua; pa isei qe ge pepewu kelua, te ge rakatia sage.

15Naŋ neira me tak ira tete ma suria, sin taŋovira; pa ira tiŋqoro me ilo qara ŋorov gorora. 16Nava i Jesus me logira ma suria, ti vet wa, Tur ukeg ira natmera neira van ma surinau, wa turpea gogoroira, ape o marana non God norasei we tamaine. 17We nun na we vava mun kamiu wa, Isei ta tete la mona o marana non God tama o natmera, ni tete mule pata lai tea ilolona.

18Wa o tuara tanun liwoa me varusia, ti vet wa, Vatogo we wia, na ge o sava si na taur usurag mok o esu galava? 19Naŋ i Jesus me vava munia, Ape sava ko we log nau si nau we wia? Itagai isei we wia, nava i tuwale ran, i God nane. 20Ko we gilala o lea vatraŋ ŋaŋ was, Nipea pakapaka, Nipea vus nawono, Nipea palpal, Nipea tila galegale, Ka nom mava i tamama tana ravevema. 21Naŋ neia wa, Na me matagisgis goro ran ma alo reremera o gene ŋaŋ iloke. 22Wa i Jesus me roŋotag o ike ŋaŋ, ti vet munia wa, Pa i tuwale ti tagai amaiko, ka ŋarag reag pulam o savasava nol, ka tirag valval munra masara, wa ko te taur moma o moegene avune tuka; wa mule ma, tataga inau. 23Naŋ ni me roŋotag o ike, ni me lolowono aneane; ape neia o tur mere savasava. 24Wa i Jesus we ilo si ni we lolowono aneane, ti vet wa, We gona tama avea gai munsei napulana we qoqo sin kalo pata ilo marana non God. 25Ape we toga wora si o kamel a kalo raveag lue o mate nidel, nan si o meresom a kalo pata ilo marana non God. 26Wa iragai me roŋotag we vet wa, Gai, isei te esu lai? 27Naŋ neia wa, O gene ŋaŋ amaira tanun tete lai, nava amen God te lai ran. 28Naŋ i Peter me vava wa, Ilo, ikamam me toavtag qet napulamam o savasava ŋaŋ wa me tataga iniko. 29Naŋ ni we vet muneira wa, We nun na we vava mun kamiu wa, Itagai tea o tanun me toavtag naimana, si rasoana, si ra tasina, si i tamana tana ravevena, si ra natuna, ape marana non God, 30pa wasi ni tete taur sal vagaqoqo alo masaoi nake iloke, wa o esu galava alo marama te rasu ma.

31Naŋ ni me vile sea ma ira numei nirua, ti vava mun neira wa, Tur ilo ma, inina we mule kalo i Jerusalem, wa o gene nol amora prophet me rave ti apen i Nat tanun te tira ran. 32Ape te ukeg kalo ineia mun o sul ŋaŋ we sea, wa te poroporosagia, wa te lalalamasagia, wa te anus avunana, 33wa neira te towosia wa te ge mateia, wa alo qoŋ vatoliu ni te tavaraka kel. 34Wa nalolora gate maran ilo tea ape gene ŋaŋ iloke, wa o vavae ilone me liŋarag nan neira, wa neira gate gilala tea o sava ŋaŋ me vava ti apena.

35Naŋ me ge tamaike, ni we mule peteŋ o Jeriko, o tuara matapei we pute pan matesala, ti valapaere. 36Wa ni me roŋotag o sul we mule talavivis, ti varus si o sava me ge. 37Naŋ neira me gaganag munia si i Jesus ta Nasaret we mule tal ma. 38Naŋ ti vava eleele, ti vet wa, Jesus, natun David, ka magarosa inau. 39Wa ira moesala me ŋorov goroa, sin toga roroŋo: panava ni me awo gagarakae nan amoa wa, Natun David, ka magarosa inau. 40Naŋ i Jesus me tira late, ti vatraŋira si a lavia ma suria; naŋ ni me rivtagia ti varusia wa, 41O sava ko we maros si na ge muniko? Naŋ neia wa, Lord, si na ilo kel. 42Naŋ i Jesus me vava munia wa, Ka iloilo kel mu laŋ, nom o nomtup me vaesuko. 43Naŋ ni me iloilo kel gaplot mulaŋ, ti tatataga ineia, ti loglog ronoga God, wa o sul nol we ilo, qara varean God.

Currently Selected:

Luk 18: MOTA

Highlight

Copy