Luka 10
10
UYesu akuvatuma avanyigendwa makyumi mufungʼati na vavili
1Pe aaviye álongile idzo, uMutwa Yesu akuvahaagulaga avanyigendwa avangi makyumi mufungʼati na vavili (72). Neke avatumage vavili vavili ku ndzenge ni mbali dzonda kwe aagulwime ukuhelela umwene, ukuta vamulongolele. 2UYesu akuvalongelaga iitigilaga, “Imbene yítanile, neke kangi avanya kubena vakeefu. Lino mumunyilike uMutwa Nguluvi umunya mbene, avatume avanya kubena avangi mu mugunda gwakwe. 3Lino muhelelage! Muludzeelage ukutigila ndikuvatuma ngita ndzanangʼolo pagatinagati pa makekeeva! 4Mutanage ukunyamula amagoobeli, nambe bogolo, nambe ndaatu idza kukowoka. Pe mwitaangʼana nu muunu mu ngʼaasi, mutanage ukuhungila musika mutaali.
5“Kangi pe mwikwingila mu nyumba ya muunu, muhungilage mutigilage, ‘UNguluvi avapeelage ulutengamaso avaanu va nyumba iyi.’ 6Ngana umunya nyumba akuvaanukila mu lutengamaso, apo uluhungilo lwenyo luvapeelage avo ulutengamaso. Neke, ngana umunya nyumba si muunu va lutengamaso, apo uluhungilo lwenyo lutanage ukuvapeela ulutengamaso. 7Inyumba ye vávaanukiye, mwikalage muumo nu kuliya ikyakuliya kye vakuvapeela. Kwe kutigila, umulima-malimo iivagila ukuhombwa uluhombo lwakwe. Mutanage ukuhaama-haama inyumba ni nyumba.
8“Pe mwikwingila mu wudzenge wuwuvedzaga, na veeneka pe vakuvaanukila nu lukeelo, muliidzage ikyakuliya kye vakuvapeela. 9Muvananiyage avatamwa avali mu wudzenge uwo. Muvalongelage aveeneka ukutigila, ‘Uwutwa wa Nguluvi wúhegeliye.’ 10Neke kangi pe mwikwingila mu wudzenge wuwuvedzaga, na veeneka pe vasikuvaanukila, muhumage mu ngelele dzaawo, mutigilage, 11‘Twipumuuna ulufuuna lwa wudzenge weenyo ululi mu magulu geesu, ukuta wuvedzage we woolesi ukwenyo.#Luka 9:5 Neke kangi mulukagulage ukutigila uwutwa wa Nguluvi wúhegeliye ukwenyo!’ 12Ndikuvalongela ukutigila, mu kigono ikya luhigo, ulupumuko lwa wudzenge uwo lulaavedza lukomi ukulutila ulwa ku wudzenge wa Sodoma!#10:12 Sodoma Uwu we wudzenge we aatipuwe uNguluvi wiimila wa ndzanangifu dza vaanu vaakwe, Wutalilo 19:24-29.
Ulukali ku ndzenge ídzikaanile ukupela
(Matayo 11:20-24)
13“Yiiga nye vaanu va wudzenge wa Kolasini, nu wa Betisayida!#10:13 Kolasini…Betisayida Idzi dzaali ndzenge dza Vayahudi, biihi ni Kapelenahumu mu ngʼumbungʼumbu ya nyandza ya Galilaya. Ngana ifilole fye ndíhuufiidze ukwenyo, fikali fivedzage fíhuufiidzwe ku wudzenge wa Tilo nu wa Sidoni,#10:13 Tilo…Sidoni Idzi dzaali ndzenge ngomi dza avasili Vayahudi. avaanu va mu ndzenge idzo ngali vaapelile kataali, pa kufwala amagunila nu kwikala mu lifindza ukuwoneesa uwupedzi waawo. 14Napo kangi, pa kigono ikya luhigo, ulupumuko lwenyo lulaavedza lukomi, ukulutila ulwa ku vaanu va ku Tilo na va ku Sidoni! 15Na yuunye vanya Kapelenahumu, mukwiwona muliinuswa kufikila kukyanya? Nambi, silulaavedza ewo! Muliiswa ku wulungu.”
16Neke uYesu avalongelage avanyigendwa vaakwe atigilage, “Umuunu ye akuvapulika unyeenye, akuumulika uneene. Umuunu ye akuvakaana unyeenye, akuungʼaana uneene. Kangi umuunu ye akuungʼaana uneene, akumukaana umwene ye áanumile.”
Avanyigendwa makyumi mufungʼati na vavili viipiluka
17Pambele avanyigendwa va Yesu makyumi mufungʼati na vavili, viipilukaga nu lukeelo, vakumulongelaga uYesu viitigilaga, “Mutwave, nagi mibepo imiviifu gikutwidika pe twilosa mu litaawa lyako!” 18UYesu akuvalongelaga iitigilaga, “Ndikamuweene uSetano iiguwa ngita lumuli lwa libalamusi ukuhuma kukyanya. 19Lolage, ndívapeeliye uwutawulilwe wa kudwedza ingufu dzonda dza mutavangwa. Mu wutawulilwe uwo, muhadza mwilivata mayoka ni fimununi, kangi sikookili ikiinu kikivedzaga kya kuvalemadza. 20Mutane ukukeela, pakuva imibepo imiviifu gikuviidika, nda haamu mukeelage hiilo, pakuva uNguluvi ásimbile amataawa geenyo kukyanya.”
Ulukeelo lwa Yesu
(Matayo 11:25-27; 13:16-17)
21Umusika ugo, uYesu iikeelaga mbandu mu ngufu dza Mubepo uMwimike iitigilaga, “Ve Daada, Mutwa Nguluvi va kukyanya ni nyi! Ndikukulumba, pakuva amadzwi ago úvafihile avanya luhalawukagudzi nu luhala, kangi úvavilatuliye avadebe. Eena Daada, ulo lwe lwene lwe úkeeliidzwe.” 22Iitigilaga kangi, “UDaada áameeliye fyonda. Sikwali umuunu ye ámudzeeliye uMuswamuve, yu Daada mwene. Kangi sikwali umuunu ye ámudzeeliye uDaada, nda haamu, yu Muswamuve mwene, nu muunu ye avedzaga ye iikeela uMuswamuve ukumuvilatula uDaada ukwakwe.”
23Neke uYesu avaseedukilage avanyigendwa vaakwe avalongelage veene atigilage, “Múfuunyiliilwe unyeenye ye mukudziwona idzi! 24Ndikuvalongela ukutigila, vaali poovali avavidzi voloofu na vatwa avaasakaga ukudziwona dze mukudziwona unyeenye, neke kangi vasadziweene. Kangi vaasakaga ukupulika dze mwipulika unyeenye, neke kangi vasadzipuliike.”
Ikihwananidzo kya Musamalya umunya lusungu
25Neke umuwulanidzi yumwinga va milagililwe, iimage amuwuudzage uYesu, ukuta amugemye atigilage, “Muwulanidzaave, ndilime kiki, ukuta ndaanukile uwuumi uwa mbeepali?” 26UYesu akumuhigaga iitigilaga, “Lúsimbiilwe wuli mu milagililwe? Wiikwimba wuli?” 27Akumuhigaga iitigilaga, “Umwendage uMutwa Nguluvi vaako ni numbula yaako yonda, nu wuumi waako wonda, nu luhala lwako londa, ni ngufu dzaako dzonda.#Lwiwuko 6:5 Umwendage umuyago, ngita kye ukwiyenda yuuve.”#Valevi 19:18 28UYesu iitigilaga, “Úhigile wunofu! Ugendelage luulo, apo wiivedza nu wuumi uwa mbeepali.”
29Kangi umuwulanidzi va milagililwe uyo, iisakaga ukwipugudza avedze mugolofu, akumuwuudzaga uYesu iitigilaga, “Lino ye ali biihi vaako ye ani?”
30UYesu akumuhigaga iitigilaga, “Aali pwali umwadaada yumwinga, aahumile ku Yelusalemu iihelela ku wudzenge wa Yeliko. Pe ali mu ngʼaasi, iitaangʼanaga na vagonadaasi, vakumufuulaga imyenda, vakumulimbulaga mbandu, vakumulekaga asanga afuwa. 31Baaho na baaho, umuteekedzi yumwinga iihelanidzaga ingʼaasi yiiyo, pe amuweene umuunu uyo, iihelanidzilaga ku lubali. 32Nayu Mulevi,#10:32 Mulevi Lole AValevi ku Figanulo. pe aafikile apo akumuwonaga umuunu uyo, nave iihelanidzilaga ku lubali. 33Pambele iikwadzaga uMusamalya#10:33 UMusamalya AVasamalya na Vayahudi vasaapuliingʼanaga. AVayahudi vavabedaga aVasamalya, pakuva avakuuhu va Vasamalya vaatooliine na avasili Vayahudi. yumwinga, mu ngʼaasi yiiyo. Pe amuweene umuunu uyo, lukumugwilaga ulusungu, 34akumuhegelelaga, iibakaga idifwayi na mafuta mu makoongʼo gaakwe nu kuwopela. Akumwinusaga pakyanya pa mbunda yaakwe, akumusindikaga ku nyumba ya vagendzi, akumutamyaga.
35“Pe kúkiye, iihumyaga idinaali#10:35 Idinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. dzivili, akumupeelaga umunya nyumba, neke amulongelage atigilage, ‘Uunamihidzage umuunu uyu. Umusika gwa kumutamya, fyonda fye uhadza wiikoongeledza wiimila waakwe, pe ndiipiluka, ndihadza ndikukuhomba.’ ” 36Neke uYesu amuwuudzage umuwulanidzi va milagililwe uyo atigilage, “Mu vaanu vadatu avo, wiihoodza ukutigila ali kwi ye ali biihi vaakwe va ndakyene, va uyo ye aalukiilwe na vagonadaasi?” 37Akumuhigaga iitigilaga, “Ye uyo ye amuwoniye lusungu.” UYesu akumulongelaga iitigilaga, “Na yuuve uhelelage ukalimage ndeeni!”
UYesu mu nyumba ya Malita nu Maliya
38UYesu na vanyigendwa vaakwe, pe vaali mu ngʼaasi viihelela ku Yelusalemu, viifikaga ku luvala lumwinga. Neke umwayuuva yumwinga, ye aatambulwaga Malita, amwanukilage uYesu mu nyumba yaakwe. 39UMalita aali nu munungʼuve ye aatambulwaga Maliya. Umusika ugo, uMaliya iikalile pa lubali pa magulu ga Mutwa Yesu, iipulikidza imbulanidzo dzaakwe. 40UMalita iituunidzaga na malimo goloofu ga kumuwombela uYesu, kye kileka amuhelelelage uYesu, amulongelage atigilage, “Mutwave, usiiwona luviifu ukutigila, umunungʼu-vangu áandekiye amalimo gonda ndiwombage ndimwene? Lino umulongele aanange!”
41UMutwa akumuhigaga iitigilaga, “Malita, Malita! Ukwituunidza na malimo goloofu. 42Ikiinu kimwinga ikiisakulwa, kye kyene kye áhaaguwe uMaliya, ikyo kisilaasweketulwa ukwakwe.”
Currently Selected:
Luka 10: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
