1 Corinth 15
15
Api kai urouki oharo
1Oharo aeka ma: Apavara — ara ero kileape la iroro oharo ara ero hihiki amoeakive: e va la oharo avi aheke le leivahaeape. 2Ara ero iroro ape hoa kileape la oharo e iki iele la kelavakilava, e va are v'ila kara lei ovokake leivahaeakilai. Aka e va naoae kelavape ha?
3Ehovea ara oropa avape la eharu ara ero aiarape — Keriso elaviilave mai heaha v'ila apape, buka hape la oharo hovea. 4Ere arero karu ihape: are kai hare ilehoila lei uroupe, buka hape la oharo hovea. 5Arero eavape haela ae va Cephas, 12 haela ve haela aea la. 6Aireaki hoa haela 500 hoa haroapo arero eavape — la haela perehekai oaria apeapea ma hoa, haroapo haroapo hiki avuku overa urupape. 7Aireaki James arero eavape. Aireaki aposetolo haela oaria arero eavape. 8Aireaki havahu, ara kara arero eavape, araro aireaki epape ekalesia la. 9Ehovea ara va aposetolo haela oaria va ipi ve — iele aposetolo rare avakive hovea ka, ehovea ara Aualari ve ekalesia haela oaria hararuavahaeape. 10Aka, ehovea Aualari ve ikiheroe meru iele, ara mahovea aeavila; aeva are araro avikiarape la ikiheroe meru naoae au leila, ehovea ara ka horova eapapo leipe — haela oaria va perehekai. Aka la horova ve iele ara va ka, o iele araro koarape Aualari ve ikiheroe meru. 11Laelave — ere, aka ara, ela oaria iroro oharo avahaeape — e kara iki kelavape.
12O iele, Keriso api kai uroupe la iroro oharo haela la leikilava, e va haela uku leari maeakilai, Haela apihai kai urahuka va ka? 13Api kai urouki la mai karia la leikilava, Keriso kara api kai urou va ka. 14Keriso api kai urouki aue la leikilava, elaviilave iroro oharo va iele karia — eve ikikekela kara iele karia. 15O iele, ehoveala, ela va Aualari ve oharo opore vavahaelula; ehovea ela va maria vavahaeape — Aualari Keriso karu ve lai urapape. Aka apihaeaki haela aireaki urahukaki aue la leivahaeakilava, Keriso kara karu ve urou va ka. 16Ehovea apihaeape haela urahukaki aue la leikilava, Keriso kara api kai urou va ka. 17Keriso api kai urouki aue la leikilava, eve ikikekela kara iele karia, e va mai heaha ila apealula. 18Ehoveala, Keriso v'ila avuku overa urupape la haela hai ka leivahaeape. 19Elaviila ma meahaiapo hoa hiki Keriso ve ovokake la aeakilava, elaviila va heraho le leivahaeakilai.
20Aka Keriso api kai uroupe: Are va avuku urupalula la haela ve oropa haela la. 21Ehovea haela ve okiharo ve apaki maea horerape — laelave haela ve oki ve api kai uroukive la maea kara horerape. 22Ehovea Adam ve oki v'ila haela oaria apihaealula; aka hovea hovea Keriso ve oki v'ila haela oaria lei ovokake leivahaeakilai. 23Aka haela va hoa hoa ila — oropa Keriso, aire areve ekeki hoa areve la haela iele. 24Aireaki mea aeaki hoa iele. La hoa Are va oropa aheke haela i Amua haela oaria ila ve hoa haerapakilai, aireaki Are basileia elaviilave Oa Aualari avarakilai. 25Ehovea are va Amua lei lei areve iri haela oaria loa huharakilai. 26Are va aireaki havahu apaki maea hai ka leikilai. 27Ehovea are va eharu oaria elare loa huharavape. Aka Are elare loa eharu oaria huharava?-?kive maeape la oharo va iele, eharu oaria areve loa ipi ve aipevahaeape la Aualari ka lahua. 28Eharu oaria Areve ipi ve leivahaeaki la hoa, Akore kara areve loa ipi ve aeakilai: laelave Aualari va eharu oaria ve akea ve.
29Laria leiki aue la leikilava, apihaeaki haela urahukaki aue la leikilava, haela apihaeape haela ve bapatiso leve leilula? 30Elaviila hare oaria heraho hiki leilula iele ehovealeve ha? 31O iele, ara elaviilave Amua Iesu Keriso v'ila o aheke la maeaive, ehovea ara e v'ila ikiveveke hare oaria leivila, are hare oaria kara apaki maea iele. 32Ara Ephesus animala merava, haela ve mai hovea, hahari la leikilava, apihaealula haela urahukaki aue la leivahaeakilava, ara le veveke koarakilai? Elaviila eapai i ma ila lala opoa le apihaeakilai. 33E horahora kalaivahaelue: haela heaha koarai auvahaelula la haela heaha rare aeakilai. 34Mai ehoe ve ikikelavaki, mai heaha leivahaea v'arekaea: ehovea uku haela Aualari ve Rare haveva iele. Ara ma oharo ero makiri leivahaeakive kimaeaive.
35Aka uku haela apevelavela maria leivahaeakilai — Apihaeaki la haela leari lei urahukakilai ha? Ere maea leahovea urahukakive ha? 36Ihape haela e, e va aporaki la eharu apakive la okiharo ve hiki ovokake leikilai. 37A va aporaki la eharu are va aireaki la maea lei va ka, are va wheat hae aka hae aea, hoveahovea. 38Aka Aualari areve ikivere maea hovea avarakilai — hae oaria elare maea hovea. 39Aivau oaria hoveahovea ka: Haela ve aivau ka lahua, animala ve aivau ka lahua, ori kara, aeva ekaka kara, lahua lahua. 40Aeva kaia ve maea le apearo, aeva meahaiapo ve maea kara le apearo: Kaia ve maea ka lahua, aeva meahaiapo ve la maea ka lahua. 41Hare ve haharika le aeave, papare kara, kou oaria kara: kou oaria ereve haharika lahua lahua.
42Api kai urouki la maea ka laria. Au aporape eharu va poae leiki eharu: au ikaeaki la iele va poae leiki aue eharu. 43Aporaki hoa heaha: ikaeaki hoa mekakure iele. Mahuka ila aporape, aheke ila ikaeakilai. 44Meahaiapo maea la aporakilava, urouki hoa Ove eharu iele. O iele, meahaiapo maea ka lahua, ove ve maea ka lahua. 45Ehovea overa oharo maria hape, Oropa haela, Adam, ovokake haela le leipe: Aireaki la Adam va ove ve ovokake avape. 46O iele, oropa eharu ove va ka, aka maea ve eharu: ove eharu aireaki. 47Oropa haela va meahaiapo eharu, kekele ve eharu: aireaki haela va kaia ve eharu. 48Kekele la karikipe la haela hovea, meahaiapo haela oaria ka laila. Kaia ve la haela hovea, kaia ve haela kara laria. 49Elaviila kekele ve karikipe la haela ve maea hovea hovea leivahaeape: laelave elaviila kaia ve la haela kara hovea hovea leivahaeakilai. 50Ara ero mari maeaeaive, apavara e, Aivau i apu ila la eharu Aualari ve basileia aea va ka: poae leiki la eharu, poae leiki aue eharu aea va ka.
51Ara ero muruhari eharu v'ila maeaeaive. Elaviila oaria avuku urupa va ka; aka elaviila oaria maea koelarikilai: 52Hoa haroapo iele, ovohae apukilavaki hoa haroapo hovea, mea maeaila puva hohoaki la hoa. Ehovea puva hohoakilai, aire apihaeape haela oaria mekaka hiki urahukakilai: elaviila oaria lahua leivahaeakilai. 53Ehovea ma poae leiki eharu are va ovokake hiki leikilai: ma apaki maea va ove ovokake eharu hovea koelarikilai. 54Laelave, ma poae leiki eharu, poae leiki aue eharu hovea leiki la hoa, ma apaki maea apaki aue eharu hovea koelariki la hoa, overa hape oharo iele le leikilai:
Ovokake Iele apaki hoa le heaorapape.
55Apaki hoa e, ave kakare iele lahoa?
Kapu ita e, a va learia heaorapakilai ha?
56Apaki hoa ve kakare va mai heaha. Mai heaha ve aheke va pupu la. 57Ara Aualari morapaeavila, ehovea elaviila Amua Iesu Keriso ve oki v'ila heaha le heaorapape.
58Laelave, ikiheroe, apavara e, e va aheke iele epavaila; Amua ve horova kiva auhohi leivahaeaki, ehovea e v'ore, eve horova, Amua ve okiharo ve, naoae naoae lei va ka.
Currently Selected:
1 Corinth 15: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972