1 Corinth 3
3
Hiru lahua lahua v'arekaea
1Apavara e, ara ero ove ila haela hovea kilea va ka, aka aivau haela hiki, ehovea e Keriso ve akoremari titaeka. 2Ara ero amae la avarape, eapai aheke ka, ehovea e va oropa hoa hovea ka: o iele, ma hoa kara e hovea havahu ka. 3Ehovea eve ikikekela va aivau hovea hiki. Eve leia va ikiheaha oaria, hahari oaria, kai hiru lahua lahua oaria, laelave e va aivau hovea hiki, haela ve mai hovea hiki leilula. 4Ehovea haela ae ve oharo maria, Ara Paul ve haela, haela ae ve, Ara Apollos ve; laelave e va meahaiapo mai hiki leilula.
5Paul va leita ha? Apollos va leita ha? Erealila iroro arura haela, e va erealila ve oki ve iapai kelavape: Aualari haela oaria aiarape horova hovea hovea. 6Ara ka hae apoporaupe, Apollos ma kakaitape; iele oaria Aualari aiarape. 7Laelave, apoporaupe haela iele ka: ma kakaitape haela kara iele ka — aka iele oaria Aualari hiki aiaravila. 8Au apoporaupe la haela kai ma kakaitape la haela va hovea hovea. Haela oaria kara ere havahu ve kavale avakive, ere leivahaeape horova hoveahovea. 9Ehovea elaviila va Aualari ila horova leilula haela — e va Aualari ve apoporauki ita, e va areve ikivere uvi hovea.
Kilea haela ve horova ve ipi iele
10Aualari araro avikiarape la ikiheroe meru ila hovea, ara uvi horova haela ikiore hovea va laila, ara va uvi ihau paparaehape: haela ae uvi akea ve kukilai. Aka haela oaria ereve la akea horova kiva auhohi leikive heroe. 11Ehovea ihau veveke ae va karia: Iesu Keriso va ihau veveke iele. 12Haela la ihau ve akea ve la kukilava, gold, aka silver, aka aitave hae, kavale eapapo ila, aka kora, aka rei i hohe eroe ila; 13Areve horova aireaki hihika leikilai — areve hihika leiki hare le aeave — La hare ve hihika eharu va a iele. La a haela oaria ve horova ve iele hovea heheavakilai. 14Haela ae leipe la horova veveke la aeakilava, are kavale veveke avakilai. 15Haela ae ve horova a hai ka la leikilava, are havoavaki haela, aka are havahu ovokake leikilai, a ve la okiharo ve.
16E ore va ka ha? E va Aualari ve hehe uvi iele. Aualari ve Ove eve ureve aeavila. 17Haela Aualari ve hehe uvi heaha la leikilava, Aualari arero hai ka leikilai, ehovea Aualari ve hehe uvi hehe iele: E va la hehe uvi havahu.
18Haela ae elare kekela amuraea va arekaea. Eve haela ae meahaiapo ve oki ve ikiore hovea la leikilava, veveke are ihape hovea leikive, laria are ikiore iele le leikilai. 19Ehovea ma meahaiapo ve ikiore Aualari ve oropa ve ikihaveva hovea leive, ehovea oharo maria hape, Are ikiore haela ere havahu ve ikiore ve papaehaukilai. 20Aeka maria hape, Aualari ikiore haela ve ikikekela ore, iele karia. 21Laelave e oaria haela v'ila pelaea kalaivahaelue, ehovea eharu oaria eve. 22Paul, kai Apollos, kai Cephas, kai meahaiapo, kai ovokake, kai apaki maea, kai ma hoa ve eharu aiai aireaki eharu kara, ere oaria eve eharu. 23Ehovea e oaria Keriso ve: kai Keriso are va Aualari ve.
Currently Selected:
1 Corinth 3: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972