1 Corinth 2
2
Ikiore i Ove ve kileaki oharo
1Ara kara, apavara e, arave ekepe hoa, oharo veveke i ikiore eapapo au leila, ara Aualari ve oharo kileape la hoa. 2Ehovea arave iki maria hiki — Iesu Keriso, satauro hape la haela. 3Ara eve leia pekape hoa ara mahuka lei i iki oaoka ila, kai paiala paiala leipe. 4Ara va hukavi i kileape la oharo ve ikiore va veveke au leila, aka Ove i aheke ila kileape oharo hiki veveke leipe. 5Ehovea eve ikikekela haela ve ikiore ve aheke lei v'arekaea, aka Aualari ve la aheke hiki.
6O iele, elaviila haela havahu ikiore kilealula: aka ma meahaiapo ve ikiore va ka, ma meahaiapo ve amua ve oharo ka, ehovea la eharu iele karia leivahaeakilai. 7Aka, elaviila hukavalula la oharo va Aualari ve muruhari ikiore, au avarapape la ikiore, Aualari avare koare iki overa kekelape, ehovea elaviilara lei mekaka leivahaeakive. 8La ikiore ma meahaiapo ve amua haela ore au leila. Ere va ore araikilava, ere va Amua mekakure ve satauro hari aue araiki. 9Overa hape oharo laria:
Eharu hovea ovohae au eavaila, o hovea avako kara au iapaila,
Haela va iki au kelavaila,
Aualari arero ikivere leilula haela v'ila karikivahaeape la eharu.
10Aualari la eharu areve Ove Veveke v'ila elaviilara amoeape: ehovea Ove va eharu oaria ore, o iele, Aualari ve ipi iele la eharu. 11Ehovea leita haela haela ae ve iki ure ore ha? La haela elare iki ore. Lahovea kara, haela oaria Aualari ve eharu haveva, Aualari ve Ove hiki la eharu ore. 12Laelave elaviila meahaiapo ve ove au availa, elaviila Aualari ve Ove hiki avape, ehovea Aualari elaviilaro aikiaraki la eharu, elaviila oaria kara ore leivahaeakilai. 13Elava la eharu ve oharo hukavalula — haela ve ikiore kileavahaelula la oharo ka, aka Ove Veveke kileavahaevila la eharu. Ove ve eharu elaviilaro ove ve oki kileavahaelula.
14Aka aivau hiki kekelavila la haela are va Aualari ve ove eharu aea va ka, ehovea are va erero ikihaveva eharu rare avila. Are kara erero ore lei va ka, ehovea erero ore leiki okiharo ove ve okiharo hiki. 15Aka ove ila la haela eharu oaria ve iele ore leikilai, aka haela ae areve iki ure haveva. 16Ehovea Amua ve iki ureve ore leita leipe? Arero leita la kileape? Aka elaviilave iki va Keriso ve iki hovea hovea.
Currently Selected:
1 Corinth 2: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972