1 Corinth 1
1
Ikiheroe i Thank you oharo ila
1Ara, Paul, Iesu Keriso ve aposetolo rare itavape, ehovea Aualari ve ikivere leipe: Sosthenes elave apoheari kara,
2Corinth apealula Aualari ve ekalesia haela oaria, Iesu Keriso hehe leivahaeape la haela, kai ita oaria haela kara, Iesu Keriso ve rare morapaealula, ereve Amua, elave Amua kara,
3E va Oa Aualari i Amua Iesu Keriso ila ve ikiheroe i havila ila apeaki.
4Ara va Aualari e v'ila morapaea hiki, ehovea e Iesu Keriso ve ikiheroe meru iele la koarape. 5Ehovea eve oharo oaria i ikiore oaria are v'ila mekaka leivahaeape. 6Hoveahovea Keriso ve oharo eve oki ve hihika leivahaeape. 7Laelave, e va horova veveke hiki leivahaelula, kai Amua Iesu Keriso ve ekeki hoa la kariro. 8Are ero aireaki hoa lei ehohoe leivahaeaki, elaviilave Amua Iesu Keriso ve hoa. 9Aualari, areve Akore elave Amua Iesu Keriso ve ekalesia leivahaeape la Aualari va mai ehoe hiki.
Ekalesia ve hiru hiru lahua mai
10Ma hoa ara ero here leive, apavara e, elaviilave Amua Iesu Keriso ve rare v'ila, e oaria oharo hoveahovea hukavaki; e va hiru hiru lahua lahua v'arekaea: e oaria hoa haroapo kai ikikekela haroapo hoveahovea leivahaeaki. 11Apavara e, Chloe ve la lalava haela uku araro mari kileape, e va elarelare hiru lahua lahua. 12Ara ero mari maeaeaive — haela mari arula, Ara Paul ve haela, uku va arula, Ara va Apollos ve, uku, Ara va Cephas ve, uku, Ara va Keriso ve. 13Keriso va hiru lahua lahua hamureape ha? Ere Paul e v'ila satauro ve hape ha? E va Paul ve rare v'ila bapatiso leivahaeape ha? 14Ara va Aualari morapaeaive ehovea ara haela oaria bapatiso au leila: Crispus i Gaius ila hiki. 15A araro mari ari ave — ara elare rare ve bapatiso leipe. 16Ara bapatiso leivahaeape haela aeva Stephanos i lalava haela oaria ila. Ara ore va ka, ara haela aeva bapatiso leipe la. 17Ehovea Keriso araro kiparaeape iele ehovea bapatiso leiki horova ka, aka ehovea iroro oharo arive: ikiore ve oharo ka, Iesu ve satauro naoae naoae leiki ave.
Satauro ve aheke
18Ehovea apihaeaki haela satauro ve iroro oharo iki haveva hovea kelavalula. Aka ovokake leilula haela arero Aualari ve aheke rare aro. 19Ehovea hape oharo maria:
Ara va ikiore haela ve iki‐ore hai ka leikilai,
Ara va ereve iki‐ore oharo hukavavila haela ve oharo naoae naoae leikilai.
20Ikiore haela lahoa ha? Hohoa haeaki haela lahoa ha? Ma meahaiapo ve oharo hukavalula haela lahoa ha? Aualari ma meahaiapo ve ikiore ikihaveva hovea au leila ha? 21Ehovea Aualari ve ikiore mai ma: Meahaiapo ve ikiore oki ve haela Aualari ve ikiore au koaraila — laelave Aualari iroro oharo ve ikihaveva v'ila ikikekela haela oaria lei makukuripe. 22Ehovea Jew haela ihova haropalula; Greek haela ikiore la haropalula; 23Aka ela va Keriso satauro hape iroro oharo la arula — la va Jew haela ve hereavalula oharo, aeva Greek haela ve ikikekela ikihaveva oharo. 24Aka, iele itavavahaeape la haela, Jew i Greek haela ila hareho, Keriso va Aualari ve aheke i Aualari ve ikiore. 25Ehovea Aualari ve ikihaveva, are Haela ve ikiore ve akea ve. Aualari ve mahuka are va haela ve aheke ve akea ve.
26Apavara e, eve itavape la mai kelavaila! Aivau ve ikiore haela oaria au itavavahaeaila, aheke haela kara oaria ka, amua haela oaria ka. 27Aka Aualari meahaiapo ve ikihaveva hovea la eharu karape, ehovea ikiore haela heaorapakive — Meahaiapo ve mahuka eharu Are karape, ehovea amua haela heaorapakive. 28Meahaiapo ve ipi iele eharu, haela hahaure leilula la eharu, Aualari ikivere leivahaeape; aeva iele karia la eharu, ehovea iele ila la eharu naoae naoae leivahaeakive — 29Ehovea aivau eharu areve oropa ve pelaea leiki ave. 30E va Iesu Keriso ve oki ve areve eharu leivahaeape. Aualari arero elave ikiore i mai ehoe i hehe i ovokake leiki okiharo le leipe. 31Overa hape la oharo hovea, Pelaea leikive ikivere la haela, veveke, are va Amua v'ila pelaea leikive.
Currently Selected:
1 Corinth 1: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972