Rome 16
16
Ikiheroe oharo
1Ara ero oharo perehekai paraeaive ehovea Phoebe, elave mariloa — are Cenchrae ve Ekalesia ve diakono. 2Arero hehe haela hovea Aualari ve ikihuru mai leiki: areve horova areve ikivere hovea, e arero hela hukapaki. Ehovea are va haela oaria ikiheheroe leivahaeape: are araro kara auhohi koarape.
3Arave ikiheroe, Iesu Keriso ve horova haela Priscilla i Aquila ila aiaraki. 4Erealila arave ovokake v'ila kakare leikive oaoka au leila. Ara i ita lahua haela ve ekalesia haela oaria hareho thank you eapapo oharo avahaeairo. 5Erealilave uvi ve korukaiavahaeaki la ekalesia haela oaria hela ikiheheroe maeaeaki. Arave haelakaru iele, Epaenetus, kara: are va arave Achaia ve oropa ekalesia haela. 6Mary kara, elaro kiva auhohi leivahaeape mari la, ikiheroe hela. 7Arave apavara Andronicus i Junia ila, kai ara i hareho uvi muru apeape la haela kara. Ere va aposetolo haela ve hiru oropa haela la: ere kara Keriso ve haela oropa leivahaeape, ara va aire leipe. 8Ara ikivere havahu Keriso ve haela aea Amplia kara. 9Urbane, Keriso v'ila elave horova hukapaivila haela, ikiheroe hela, aeva arave kake haela Stachys. 10Apelles, Keriso ve haela ae va la, kai Aristobulus ve lalava haela oaria kara, ikiheheroe leivahaeaki. 11Arave apavara Herodian, aeva Narcissus ve kelavalula lalava haela oaria kara, ikiheroe oharo maeaeaki, Amua ve haela la. 12Tryphena i Tryphosa ila, Amua ve horova haela mekaka, kai Persis, Amua ve horova ikivere leivila haela, ikiheheroe leivahaeaki. 13Rufus kara, Amua ikivere leipe haela la: areve lou i arave lou kara, ikiheroe hela. 14Asyncritus kai Phlegon, Hermas, Patrobas, Hermes, kai ere i hareho apealula la haela oaria: 15Philologus i Julia ila, Nereus i mariheari ila, Olympus i are i hareho apealula la haela kara. 16E va elarelare hehe mai v'ila overa hihikive: Keriso ve Ekalesia haela oaria ero ikiheheroe oharo la paparaehaive.
17Ara ero here leive, apavara e, oharo haeae la hiru lahua lahua kileavahaelula haela oaria kiva leivahaeaki. E ore leivahaeape okiharo kiva leivahaeaki, ereve la mai hahaure leivahaeaki. 18Ehovea lari haela Amua Iesu Keriso ve horova leivahaea va ka. Ere elare ikivere horova hiki leivahaealula. Ere va ape oharo hiki veveke, laelave ere va haveva haela au amuraeailula. 19Ehovea eve iapailula mai veveke haela oaria ore overa leivahaeape. Ara e v'ila ikiveveke leivila. Kahara, arave ikivere e va eharu veveke hiki ve iki ore leivhaeakive, kai eharu heaha v'ila iki haveva leivahaea va heroe. 20Haiapo ka, Havila ve Aualari Satan eve loa ipi ve huharakilai. Amua Keriso ve ikiheroe meru e i hareho aeakilai: Amen.
21Timotheus, arave horova haelakaru veveke, kai Lucius, kai Jason, kai Sosipater, arave apavara, ero ikiheheroe oharo paparaehaive.
22Ara, Tertius, ma Paulo ve hohoa haeaki haela ma, ara Amua ve ikiheroe ero paraeaive.
23Gaius, ara areve uvi aeavila la haela, aeva maia ve Ekalesia haela oaria, ero ikiheheroe leiro. Erastus, ma karikara ve moni kiva haela, kai Quartus, apavara aeva la, ero ikiheheroe oharo paparaehairo. 24Elaviila oaria ve Amua Iesu Keriso ve ikiheroe meru e oaria hareho avaki.
Aualari morapaeaki oharo
25Aualari ve aheke ero kiva leivahaeaki, ara va ero iroro oharo kileavahaeape la aheke hoveahovea, kai Iesu Keriso kileape la okiharo hoveahovea. Ehovea overa muruhari aeape la eharu Iesu ve oki ve hihika leipe. 26La muruhari eharu, peroveta haela oropa maeaeape hoveahovea, ma hoa hihika leivila, ehovea mea oaria aeavila la Aualari Iele ve pupu oharo aheke ikikelavalula haela oaria ore leivahaealula. 27Aualari haroapo ve ikiore iele ve rare morapaeaki, ehovea Iesu Keriso ve harihari, aiai karia lei va ka. Amene.
Currently Selected:
Rome 16: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972