2 Corinth 5
5
1Ehovea ela v'ore, elave ma maea ve uvi la kopararapakilava, ela va Aualari ve uvi le aeave. La uvi haela mai ve au kuila, are va kaia ve leia aiai karia lei va ka. 2Ehovea ela va mea oaria hivavara avahaelula, ehovea ela va ikivere Kaia ve la uvi elaro ma hoa haritopakive. 3Elave maea la pura la hahaeakilava, ela va maheare apea va ka. 4Ehovea ela va ma kovo ita ve uvi ve apealula haela hivavara hiki avahaelula, ehovea ela va heraho iele: O iele, ela va maea ka apeakive ikivere va ka, aka iele ila, ehovea maea ve eharu ovokake iele heheloe la koakilai. 5Aualari elaro iele karikipe ehovea ma: are kai elaro Ove ve ihova avikiarape.
6Laelave, ela va ikihorahora karia, ehovea ela va ore ela va maea ureve apeaki la hoa, ela va Amua apehai rare arula. 7Ehovea ela va eava va ka, ela va iki hiki kelavalula. 8Ela va ikihorahora ka, laelave ela va maea iilu hakurepakive ikivere, ehovea Amua ve leia pekahavi apeakive. 9Laelave, ela va horova leilula. Ela la apeakilava, aka hakurepakilava, ela va areve oropa ve mekaka leivahaeakilai. 10Ehovea elaviila oaria Keriso ve heheavaki haha oropa ve epavakilai. Leia haela oaria elare maea ve leivahaeape la horova oaria, veveke i heaha ila, hihika leivahaeai kavale hovea hovea aeakilai.
Keriso ve Ikiheroe elaviilave aheke i o iele ila
11Ela va Amua ve oaoka leiki okiharo ore, laelave ela va ikivere haela oaria karakive. Aka Aualari oropa ve elave mai ehoe hihika leivila. Eve ikikekela kara elaro lei ehohoe leikive, heroe. 12Ehovea ela eve oropa elare rare la morapaea va ka, aka e va ela v'ila ikiveveke leikive, heroe. Laelave e va maea pelaea hiki leilula haela heaorapakive. 13Ela va ihape la leikilava, ela va Aualari ve leivahaeape. Ela va ikiore la leikilava, ela va e v'ila leivahaeape. 14Ehovea Keriso ve ikiheroe elaro hahaevila. Elave ikikekela aheke maria, haela haroapo haela oaria v'ila apape, laelave haela oaria apihaeape. 15Are haela oaria v'ila apape, laelave haela oaria lahua apea v'arekaea, aka ere va oaria v'ila api kai uroupe la haela i hareho apeakive.
Ovokake are Keriso ureve
16Laelave ela haela oaria haela ve maea hovea hiki kelava va ka, O iele, ela va oropa hoa Keriso haela ve maea hovea ore leipe, aka ma hoa ela arero haela ve maea hovea kelava va ka. 17Laelave, haela Keriso i hareho la aeakilava, are va haela āre leive. Overa eharu karia le leipe: Iapaila, eharu oaria eharu āre hovea leiro. 18Eharu oaria Aualari ve. Are elaro Keriso v'ila areve haela havahu leivahaeape; areve ikiheroe horova leivahaeakive itavavahaeape. 19Ehovea Aualari Keriso v'ila meahaiapo are v'ila lei veveke leikive ekepe. Are kai ereve heaha ve oki ve mehau au avaraila. Are elaro kara ma ikiheroe oharo aikiarape.
Keriso elaviilara lei ehohoe leivahaeape
20Laelave, ela va Keriso ve paparaehape haela, hoveahovea, Aualari elave oki ve ero velavela leivahaeape. Ela va ero Keriso ve rare v'ila apevelavela leivahaeairo — E Aualari i hareho apeakive. 21Ehovea Are arero mai heaha haela hovea leipe, ehovea elaviilara koarakive; aka are mai heaha au leila. Ehovea areve oki ve elaviila Aualari ve mai ehoe ore leikilai.
Currently Selected:
2 Corinth 5: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972