2 Corinth 6
6
1Ela are i hareho horova leilula haela, ero here leiro, E Aualari ve ikiheroe meru naoae va kaealue. 2(Ehovea areve oharo maria:
Ara va ikivere leipe hoa ara eve oharo iapape
Ovokake leipe la hare ero kai hukapape.
O iele areve ikivere hoa iele ma — ovokake hare iele ma.) 3Ela va haela au huhilavaea va ka, elave horova ve rare heaha leiki ave. 4Aka ela va Aualari ve horova haela hovea lei ehohoe leilula; heraho hoa ela ikihairihairi leivahaea va ka; horova hoa, aka ikihuru hoa kara; 5Elaro haru koavalula la hoa, uvi muru apeaki hoa, hahari hoa, horova eapapo hoa, kiva leiki horova hoa, eroa hoa kara; 6Iki veveroro i iki ore, iki aheke i ikiheroe ila, Ove veveke i ikihuru ila, ela va kiva hiki leilula. 7O iele ve kai Aualari ve aheke ve, mai ehoe ve aheke v'ila, mai ore ukai i mai keva ukai ila. 8Rare veveke aka rare heaha v'ila, hari veveke i hari heaha ila, au amuraeaki haela hovea, aka o iele haela kara. 9Haela haveva haela hovea aka haela ore haela hovea, apihaeaki haela aka ovokake leilula hovea: haru koavape haela hovea, aka huru havahu ka. 10Ela va ikihuru, aka mea oaria ikiveveke; ela ka merava haela aka erohoho haela hovea leilula; eharu karia, aka eharu oaria aealula haela hovea.
Ikikekela haela ikiheroe mai leivahaeaki
11Corinth haela e, ela e v'ila ape hihika hapai ape, ela e v'ila ikihuru leivahaeape. 12Elave iki ve ela ero hahaure leivahaea va ka; e havahu ve iki hapa va ka. 13Laelave, e kavale veveke laila (ara ero arave akoremari hovea aihukamaeaive) e elare iki iele hela hapakive.
Ikikekelaki aue haela i hareho vea v'arekaea
14E va ikikelavaki aue haela i hareho kopererea v'arekaea. Mai ehoe i mai heaha ila hareho loaloakive veveke lahoa ha? 15Keriso i diabolo ila hareho loa vea va ka. Ikikekela haela i ikikekelaki aue haela koarai auva ka. 16Aualari ve hehe uvi i opore harihu hareho apea v'arekaea. E havahu va ovokake Aualari ve Hehe Uvi. Aualari maria maeape,
Ara ereve ureve aeakilai, ara ere i hareho veakilai,
Ara ereve Aualari leikilai,
Ere arave haela leivahaeakilai.
17Laelave, e va erero haitapai kihoahukakive
E kai lahua leivahaeaki — Amua ve oharo la,
Eharu hirihiri mai kapaealue:
Ara ero eavakilai.
18Akea iele la Amua kai mari maeaeape,
Ara eve Oa iele leikilai.
E kara arave akoremari leivahaeakilai.
Currently Selected:
2 Corinth 6: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972