Horova 17
17
Thessalonica leia
1Ere Amphipolis i Apollonia ila ve oki auvahaeai Thessalonica pekahavape. Jew haela ve synagogue leia peape. 2Paul, areve hare oaria ve mai hovea, ereve leia pekahavi sabati 3 erero buka oharo kileavahaeape. 3Are buka oharo ve iele hihika maeaeape, ehovea Keriso kakare le api kai uroukive la oharo iele havahu. Are kai maeaeape, Ara ero kileavila ma Iesu are Keriso la. 4Uku haela areve oharo iapai kelavi Paul i Silas ila hareho auvahaeape. Ikikelavaki Greek haela oaria i karikara akea ve uavila perehekai oaria kara. 5Aka Jew haela hihiri leivahaeai, karikara naoae loalula haela uku kari ai haela oaria korukaiavahaeai karikara urukuku leivahaeape. Ere Jason ve uvi pekahavi erero haela oaria oropa karihoaukive ikivere leivahaeape. 6Ere erealilara au koaraila, laelave ere Jason i apavara ila uku, karikara Amua oropa ve hailavava?-?haeai, āra mari hape, Ma meahaiapo haivarukapape haela mahau maia leikevahaeape; 7Jason erero auhohi leivahaeape. Ma haela oaria Caesar ve pupu kiva leivahaea va ka. Ereve oharo maria — amua ae ve le aeave — Iesu la. 8Haela oaria i Amua haela ma oharo iapai ikihorahora eapapo leivahaeape. 9Ere Jason i haela oaria v'ila okoare eharu avi erero le paparaehape.
Beroea leia
10Apavara Paul i Silas oroa hoa Beroea paparaehape. Erealila pekahavi Jew haela ve synagogue kai pekahavape. 11Iapai, ma haela va iki amua haela iele, Thessalonica haela laria va ka, ehovea ma haela oharo iki auhohi kelavape. Ere hare oaria pupu buka murea heheavape, ma eharu va iele la aka opore. 12Laelave ere haela oaria ikikelavape, karikara akea ve Greek uavila kara, aeva haela perehekai oaria kara. 13Aka Thessalonica Jew haela Paul Aualari ve oharo Beroea ape la hari iapai, leia kara iki haela oaria amuraeai urukuku leivahaeape. 14Apavara Paul elavelave ahea ma poe ve paraeape. Silas i Timothy ila au hiki apeape. 15Paul koarai auvahaeape haela arero Athens hoa lai aupe, Leia Paul erero paparaehape, ehovea Silas i Timothy ila elavelave ekekive maeaeakive, laelave ere helari le auvahaeape.
Athens leia
16Paul Athens leia erealilara kari, karikara harihu oaria ila eavi iki kakare eapapo leipe. 17Laelave are hare oaria Jew haela i mai ehoe ikivere haela ila hareho synagogue ureve oharo hukavape. Karikara hihi kara are koaravahaeai haela oaria kara oharo kileavahaeape. 18Epicurean i Stoic ikiore haela arero koarape. Uku mariape, Ma haela le naoae naoae oharo hukavavila ha? Uku mariape, Are va harihu eharu lahua oharo hukavavila la, ehovea are Iesu api kai uroupe la oharo iroro ape. 19Ere arero mai pai Areopagus lai ai mari maeape, Elave ikivere a kileavila ma oharo ve iele iapakive. 20Ehovea a va eharu lahua elave avako v'ila hukavavila, laelave ela va ma eharu ve iele ore leikive ikivere leiro. 21Athenian haela oaria i leia apealula ita lahua haela ila horova aeva karia, aka hare oaria eharu are hukavi i iapakive leilula.
Paul Areopagus iroro ape
22Paul Areopagus aru hihi ve epavi maeaeape, Ara eve eharu oaria eavi va harihu eharu lahua lahua ikivere leilula. 23Ehovea ara okiharo laila la hoa e momorapulula eharu oaria ara ovohae eavi, mari arura haha kara ara laeavila, Haela haveva la Aualari v'ila. E haveva lei momorapulula la eharu, ara ero hihika amoeakilai. 24Meahaiapo i areve eharu oaria ila karikipe la Aualari, ehovea are kaia i meahaiapo ila ve Amua, haela mai ve kukueape la hehe uvi aea va ka. 25Haela ve mai areve maea ve horova lei va ka, ehovea are havahu haela oaria ovokake i ikihua i eharu oaria ila aiaravila. 26Are meahaiapo vila‐ipipi oaria apu haroapo hovea apealula karikivahaeape — ereve apealula hoa i ita ila are elare iki kelavape. 27Ehovea ere Aualari la haropi arero hahaukai iele le koarakilai: Kahara, are elaviila ve apehai aea va ka:
28Elaviilave ovokake i horova i apealula mai ehovea are ve.
Eve hivi helavape haela uku kara laria maeaeape,
Elaviila kara areve akoremari.
29Elaviila Aualari ve akoremari la leivahaeakilava, elaviila Aualari Iele haela ve ikiore v'ila karikipe gold i silver i have eharu hovea kelava va arekaea. 30La haveva hoa Aualari hihiri au leila: aka ma hoa are haela oaria ereve hahaeae ve ikihuru leikive maeaeaive. 31Ehovea are ikikekelape hare aireaki kihorerakilai. La hare are are maeape haela v'ila meahaiapo haela oaria mai ehoe v'ila heheavakilai. Are va la horova haela oaria hihika kileape, ehovea are arero kapu ve lai urapape.
32Ere api kai uroukive la oharo iapape la hoa uku haela heheo ape, uku mariape, Ela va ma eharu v'ila ave oharo hare ae iapakilai. 33Laelave Paul erero haitapape. 34Aka uku haela erero koarai ikikelavape. Haela ae va rare Dionysius, Areopagus haela, uamari rare Damaris, i uku haela kara.
Currently Selected:
Horova 17: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
