Horova 18
18
Corinth leia
1Ma eharu kari leivahaeai Paul Athens harepai Corinth karikara aupe. 2Are leia koarape haela ae rare Aquila, Pontus epape Jew haela: areve uva rare Priscilla. Erealila la hoa Italy ve ekevahaeape. Ehovea Claudius Jew haela Rome hakurepai auvahaeakive ape karava maeaeape. Are erealilave leia pekahavape. 3Ehovea are erealilave horova hovea haela, are erealila ve ita aeape: ehovea erealila va eara kokoraki haela. 4Are sabati oaria synagogue ureve oharo hukavape, kai Jew i Greek haela uku hakeapuvahaeape.
5Silas i Timotheus Macedonia ve ekevahaeape la hoa Paul iki heraho leipe, kai Jew haela ve oropa ve vavavape Iesu Keriso va iele. 6Ere arero huelapape la hoa are elare pura lalaeapai mari maeaeape, Eve apu e havahu ve haro akea ve. Ara ka veveroro. Aireaki hoa ara va ita lahua haela ve leia aukilai. 7Are leia harepai haela ae ve uvi pekape; la haela ve rare Justus: are va Aualari morapaeaki haela — areve uvi va synagogue maeamaea vea. 8Synagogue ve akea haela, Crispus, areve lalava haela ila hareho Amua ikikelavi bapatiso leivahaeape. 9Amua oroa hoa ivahi ve Paul kileape, A oaoka kalailue — oharo arive, ape kokakaukailue. 10Ara a i hareho aeavila, haela aro heaha lei va ka, ehovea arave haela oaria ma karikara apearo. 11Are hitolo haroapo papare 6 ila Aualari ve oharo kirivila aeaveape.
Gallio i Paul ila
12Gallio Achaia Gavana horova leipe hoa, Jew haela oaria hareho urahuka Paul heheavaki ita lai auvahaeai mariape, 13Ma haela Aualari ve pupu haerapakive kileavila. 14Paul oharo arive ikivere leipe la hoa Gallio Jew haela mari maeaeape, Ma oharo haeae i mai heaha v'ila laleikilava, veveke eve oharo iapakilai. 15Aka are va oharo i rare i eve pupu v'ila la leikilava, e havahu heheavakive — ara laria eharu heheavakive ikivere lei va ka. 16Are erero heheavaki ita ve haruapape. 17Ere oaria Sosthenes, hehe uvi ve Amua, mai papaehai heheavaki ita oropa ve haru koape. Gallio ma eharu iki au kekelaila.
Paul Syria ve leia elaupe
18Paul hare perehekai oaria kai aeape, aireaki are apavara haitapai vevaea horeavi Syria elaupe, Priscilla i Aquila ila are i hareho auvahaeape. Are Cenchraea leia areve haro koro hailaeape ehovea are ape okoare ve ihova ve. 19Ere Ephesus pekahavape. Are erero leia haitapape. Are havahu synagogue pekai Jew haela ila oharo hukavape. 20Ere arero perehekai haiapo aeakive maeaeape, are ikivere au leila. 21Are erero haitapai maeaeape, Aualari ikivere la leikilava, ara va aireaki hare eve maia ekekilai. Are Ephesus hakurepai vevaea horerape.
22Are Caesarea ukavi Jerusalem ekalesia ovohae eavakive pekai Antioch le hoaupe. 23Are leia hare uku aeaveape: aireaki are leia harepai Galatia i Phrygia ila ita oaria ikikelavaki haela oaria lei aheke leikive aupe.
Apollos Ephesus leia
24Jew haela ae rare Apollos, Alexandria Jew haela, ikiore iele, Ephesus aupe. Are buka oharo oaria mureakive ore havahu leipe. 25Ma haela Amua ve okiharo ore overa leipe. Are ove aheke lei Amua ve iroro veveke ape; aka are John ve bapatiso hiki ore leipe. 26Are synagogue pekai ape karava ila iroro ape. Priscilla i Aquila ila areve oharo iapai arero lai ai Aualari ve Okiharo auhohi kileape. 27Are Achaia elaukive ikivere leipe la hoa, apavara arero kurupaeape kai leia ve ikikekela haela hohoa paraeape ehovea arero auhohi leikive. Are iki leia Ove ve meru v'ila Aualari ikikelavape haela lei aheke leivahaeape. 28Ehovea are haela oaria oropa ve Jew haela huelapai pupu buka v'ila amoeape Iesu va Keriso.
Currently Selected:
Horova 18: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
