Horova 25
25
Paul Festus oropa ve
1Festus la ita ekepe, kai hare 3 karia lei Caesarea hakurepai Jerusalem pekape. 2Oharo haela i Jew haela ve oropa haela arero Paul v'ila oharo maeape — ere arero here leipe. 3Are ereve oharo hela iapai Paul Jerusalem leia paraeakilai, ereve ikikekela arero okiharo muruhari kari harilai. 4Aka Festus erero kavale maeaeape — ere Paul Caesarea kiva leiroape — are havahu kara haiapo ka leia hoaukilai, 5Are mariape, Veveke eve akea haela araro koarai auvahaeakive — la haela haeae iele ma laila, ere arero leia hahakilai, heroe.
6Are ereve leia hare 8 ka 10 aiai Caesarea le hoaupe. La opoa hare are heheavaki ita pekai Paul lai ekekive maeape. 7Paul ekepe la hoa Jerusalem kihoahukape la haela oaria are i hareho epavi, are v'ila oharo heaha oaria maeaeape. La oharo ve iele ere amoeakive ore au leila. 8Paul elare v'ila kavale maeaeape — ara Jew haela ve pupu i Hehe Uvi i Caesar ila haeae au leila. 9Aka Festus ehovea are va Jew haela ve morapaeaki oharo ikivere leipe, are Paul kavale maeape, Ava ikivere ara aro Jerusalem leia ma oharo v'ila heheavakive ha? 10Paul kavale maeape, Ara Caesar ve heheavaki ita oropa ve epavave. Arave heheavaki ita va ma — ara Jew haela haeae au leila, a va la oharo ore iele. 11Ara haeae ma laila, kai apakive hovea ma laila, ara apakive ikihairihairi lei va ka. Aka ere araro hahalula ma oharo oaria opore la leivahaeakilava, haela araro erero leve avarakive. Arave ikivere Caesar araro heheavakive. 12Festus areve Council haela i hareho oharo hukavi mari maeape, A va Caesar ve velavela leipe — heroe — a Caesar ve leia aukilai.
Agrippa i Bernice ila
13Hare uku kari leivahaeai amua Agrippa i Bernice ila Caesarea hoahukai Festus ve leia pekahavape. 14Erealila leia hare oaria apearoape laelave Festus Paul ve la oharo amua maeape maria, Felix haela ae uvi muru ureve hakurepape. 15La haela v'ila, ara Jerusalem aeape la hoa Jew oharo haela i haela hoaha ila araro kimaeape: ereve ikivere ara arero heaha ve kavale avarakive. 16Ara erero kavale maeaeape, Rome ve pupu laria ka — ere haela kavale lei va ka aiai are arero hahakive ikivere haela ila hareho epavakive: au hahape la haela ere are v'ila maeaelula la oharo kavale kara maeaeakive, heroe. 17Ere oaria hareho maia ekevahaeape. Haiapo ka, ara la opoa hare heheavaki ita pekai erero la haela lai ekekive maeaeape. 18Arero hahakive ikivere leivahaeape la haela arava oropa iki kelavape oharo au maeaila. 19Ereve oharo ere havahu ve pupu ve, aeva haela ae rare Iesu v'ila, are va overa apape haela — aka Paul areva ovokake aeavila oharo maeape. 20Ara va ma eharu v'ila heheavakive horahora leipe, laelave ara Paul apevelavela leipe — Jerusalem ma eharu v'ila heheavaki aukive lehae? 21Aka Paul Augustus arero heheavakive maeape — laelave ara arero kiva leikive maeaeape aiai ara arero Caesar ve leia paraeakilai. 22Agrippa Festus maeape, Ara kara areve oharo iapakive, heroe. Are arero maeape, Opoa a areve oharo iapakilai.
23La opoa hare Agrippa i Bernice ila maupa oaria ila heheavaki uvi pekahavape. Akea kapena i karikara oropa haela are i hareho pekahavape. Ere Festus ve oharo iapai Paul lai pekape. 24Festus mariape, Amua Agrippa i ela i hareho lakorukaiavahaeaila haela oaria — e ma haela ovohae eavaro. Are v'ila Jew haela oaria Jerusalem i maia ila araro oharo oaria kimaeape, Are kai ovokake kalailue. 25Ara areve apakive hovea haeae au koaraila. Are havahu Augustus ve rare itavape, laelave ara arero paraeakive iki overa kekelape. 26Ara va ikihorahora ehovea arev'ila learia oharo amua paraeakive. Laelave ara e haela oaria ve oropa ve lai lakihoaila — iele — a havahu oropa ve amua Agrippa: elaviila arero la heheavakilava elaviila arev'ila oharo iele iapai haeakilai. 27Ehovea haela la paraeakilava, kai areve haeae paraeakiaue la leikilava, arave ikikekela hovea va ka.
Currently Selected:
Horova 25: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
