Horova 26
26
Paul Agrippa oropa ve
1Agrippa Paul maeape, A havahu ve oharo hukava.
2Paul mai laruai areve kavale oharo le maeape, Ara va ikiveveke amua Agrippa, araro Jew haela hahape la oharo oaria ve kavale oharo ave oropa ve maeakive. 3Ikiveveke iele ehovea a va Jew haela ve pupu i mai oaria ila ore overa leivahaeape. Laelave a hela arave oharo iapai:
4Arave hekai hoa ikiki mahau, arave ita leia i Jerusalem kara ara leivahaevila mai oaria Jew haela oaria ore hiki. 5Ere v'ore overa leipe, la oharo hihika maeaki ere ikivere la, ara ore va ka, ara va Pharisee haela ve pupu aheke iele mea oaria kiva leiroape. 6Haela araro maia heheavave, ehovea Aualari elaviilave aualau haela maeaeape la okoare. 7La okoare elaviilave eravo 12, Aualari ve horova hare i oroa ila leivahaelula, avakive ikivere leilula. Ara va ma okoare ikivere okiharo v'ila leilula, amua e, ma haela araro hahape. 8Aualari apihaeape haela lai urahukakive la oharo ve horahora leve kekelakive ha?
9Ara elare iki mari kekelape — ara Iesu Nazareth haela ve hereavaki horova oaria leikive heroe. Ara ma horova oaria Jerusalem leipe. 10Ara hehe haela oaria uvi muru paparaehape, ehovea oharo haela araro la horova leikive aheke avikiarape. Erero haeape la hoa ara kara harive oharo maeape. 11Ara erero synagogue oaria ureve kavale heaha aiarape. Ara erero o heaha maeaeakive amuraeape. Ara erero hihiri eapapo leivahaeai erero hararuape, aiai ita lahua karikara kara.
12Laelave ara oharo haela ve aheke i hohoa ila Damascus hahi aupe la hoa. 13Hare hihi iele, amua e, ara kaia ve ovava eavape, la ovava eapapo, hare ve ovava hekai. La ovava araro, i araro koarai auvahaeape haela ila hareho elari heaoapape. 14Ela oaria mea ve hihilaupe. Ara āra ae araro Hebrew uri oharo maeavila iapape, Saul, Saul, a araro hararuavila ehovealeve ha? A va amuraeaki la karahe leari kavale koakive ha? 15Ara maeape, Amua, a leita ha? Amua mariape, Ara Iesu, a hararuavila la haela. 16Urou, loa epavaki. Ara ave oropa ve lakihoreraila ehovea ara aro arave horova leikive maeakive. A ara v'ila eavape i aireaki eavakilai la eharu v'ila, a haela ve oropa ve vavavakilai. 17Ara aro Judea haela ve i ita lahua haela ve mai ve hareavakilai. Ara aro ereve leia paraeakilai. 18Ehovea ereve ovohae kohelaukakive, ere muru mai i Satan ve aheke ila hakurepai Aualari ve oharo auhohi iapakive, are ereve mai heahaha hapururukai erero Aualari v'ila hehe leivahaeape la haela i hareho basileia ve eharu veveke apeakilai.
19Laelave, amua Agrippa, ara kaia ve la ivahi oharo haure au leila. 20Ara Damascus i Jerusalem i Judea ita oaria i Jerusalem havahu apealula haela, i ita lahua haela ila la oharo kileavahaeape; ehovea ere ereve mai heahaha ve ikihuru leivahaeai Aualari ve oharo iapai ikihuru horova oaria leivahaeakive. 21Ehovea ma horova, Jew haela Hehe Uvi ureve mai pai araro harive oki haropape. 22Aualari araro le koarape, laelave ara la hoa ikiki ma hoa haela hoaha i titaeka ila laria kilearoape. Ara oharo aeva au kileaila, peroveta i Moses ila aire kihoreavakive eharu ve maeaeape la oharo hiki. 23Iesu kakare koarakilai, are oropa api kai urouki la okiharo v'ila Jew haela i ita lahua haela ila hareho ovava avarakilai.
24Are areve kavale oharo avi Festus āra maria hape, Paul, a va ihape leive — ave iki ore oaria aro lei ihape laleila! 25Aka Paul maeape, Ara ihape au leila, Festus mekakure e, ara oharo iele i ikiore oharo arive. 26Ehovea amua ma eharu oaria ore hiki. Ara arero oharo hihika maeaive — ehovea ara v'ore iele are ma oharo oaria overa iapai — ma horova oaria muruhari au leivahaeaila. 27Amua Agrippa, a peroveta haela kelavila? Ara v'ore a ikikelavila. 28Agrippa Paul maeape, A va ikivere araro Christian haela hovea leikive. 29Paul maeape, Aualari oropa ve, elavelave aka haiapo, ara v'ikivere a i arave mahau hare ve oharo iapaki haela oaria ara hovea leikive heroe, ma araro lahahaila horou hiki va arekaea.
30Amua i gavana haela i Bernice ere i hareho avape haela ila urahukape. 31Ere mahokaea ve hoahuka elarelare kelavape maria, Ma haela apakive aka uvi muru paraeakive hovea haeae au leila. 32Agrippa Festus maeape, Elaviila ma haela paraeakilai, aka are Caesar ve rare overa maeape.
Currently Selected:
Horova 26: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
