Horova 27
27
Paul Rome hahi leive — aiai Crete
1Ere ikikekelape ela va Italy vevaea horeai auvahaeakive, laelave ere Paul i au hahaeape haela uku centurion rare Julius, Augustus hevehe hiru haela, kiva leikive avarape. 2Ela Adramyttium vevaea horeavape, are va Asia miri ve karikara uku aukilai. Ela horeavape la hoa elaro koarai horeavape haela ae va Aristarchus Thessalonica karikara ve Macedonia haela. 3La opoa hare ela Sidon pekahavape — Julius Paul ikiheroe lei arero apavara haela ve leia eapai larive paraeape. 4Ela horeavi Cyprus ve mea aue ukaki aupe — ehovea mea oropa ve koape. 5Ela Cilicia i Pamphylia, ukai ve la ahea ma, Lycia ve karikara aeva pekape. 6Leia hevehe centurion Italy auvila Alexandria ve vevaea koarape. Are elaro la vevaea ve paparaehape. 7Ela va hare oaria hahari hahari hiki auvahaeai heraho iele, Cnidus maeamaea vea; mea elaro au hereavape laelave ela Crete ve kavu aiai Salmone hakurepape. 8Ela va heraho iele huru maeamaea ve aiai ita rare Ruma Veveke koarape — la ita Lasea karikara maeamaea vea.
Aiai Malta. (Melita). Mea heaha: Veveaea heaha leipe
9Ela va haiapo iele aeva mea heaha hoa maea iele, ehovea ere erereaki hoa karia leipe, laelave Paul erero oharo aihukamaeape, 10Haelakaru e, ara v'ore ma hahi aireaki heaha leikilai, eharu oaria i vevaea ila heaha koarakilai, elave ovokake kara havoavaki ave. 11Aka hevehe centurion vevaea haela i kapena ila ve oharo iapavahaeai Paul ve oharo au iapaila. 12Ehovea la ruma vevehere hoa aeakive hovea ka, haela perehekai oaria ve ikikekela leia hakurepai horerakive aiai Phenice pekai vevehere hoa aeakive: Crete maura i herere ukaki ve ruma ae la.
13Diho mea mahuka koape la hoa ereve ikikekela mea hovea, laelave ere have hareavi Crete ve huru maeamaea va auvahaeape. 14Aka haiapo ka mea heaha eapapo leia ve ekepe — areve rare va Euroclydon. 15Are vevaea koape la hoa vevaea oropa aukive hovea ka, laelave ela la oki hakurepai mea i hareho vivilape. 16Ela hiru hekai rare Clauda ve mea aue ukai vivila, leia boti hekai hareavi horou hahape, heraho iele. 17Ere boti vevaea akea ve aipe, vevaea ve kaka uki horou hahape. Ere oaoka eapapo leivahaeape, Syrtis la miri pekahavaki ave, laelave ere eara ipi paraeai mea oropa ve vivilavahaeape. 18Ela mea heaha v'ila heraho eapapo leivahaeai la opoa hare eharu ahea ma ve aikilapape. 19Avea hare ere vevaea ve eharu kepea oaria ahea ma ve aikilapape. 20Ela hare oaria hare i kou ila au eavaila: mea heaha havahu leipe, laelave elave ikikekela ovokake okiharo karia le leipe.
21Ere va haiapo iele eapai au lalavahaeaila, laelave Paul ereve aru hihi epavi mari maeaeape, Haelakaru e, e ara va overa maeaeape la oharo au iapaila, ehovea Crete hakurepa va arekaea, laelave e va ma heaha lakoaraila. 22Ara ero mave maeaeaive, Iki aheke leila, haela ae ve ovokake havoava va ka — vevaea hiki. 23Ehovea ma oroa arave Aualari ve aneru, ara areve horova leivila la Aualari, arave oropa ve epavi. 24Mari maeape, Paul, a oaoka kalailue — a Caesar oropa ve pavakilai. A iapai, a i hareho auvahaelula la haela kara Aualari aro aiarakilai. 25Laelave — e iki aheke leila — ehovea ara Aualari ve oharo iapai kekelave — are araro lakimaeaila la eharu oaria laria kihoreavakilai. 26Lae vi va elaviila hiru ae pekakilai.
27Oroa 14 kari leivahaeai ela Adria la ahea ma aula kelari hiki. Oroa a hihi hoa vevaea haela ve ikikekela ela ita ae va maeamaea ve ekevahaeape. 28Ere ihova have parai, 20 fathom koarape. Aire kai paraeape la hoa ere 15 fathom hiki koarape. 29Ere oaoka leivahaeape have ita epavaki ave, laelave ere have 4 evoe ve paparaehai ovava hoa la karipe. 30Vevaea haela vevaea hakurepakive ikivere leivahaeape. Ere boti hekai ma paraeai mari maeaeape — ere va vevaea ve oropa ve have paparaehakilai. Ere va harapaila. 31Paul hevehe centurion i hevehe haela ila maeape, Ma haela vevaea apeaki aue la leikilava, e oaria ovokake leivahaea va ka. 32Hevehe haela boti ve horou au koerapai arero ma ve paraeape.
33Hare pekape hoa Paul erero oaria ape karava maeaeape — ere eapai larilai. Are mari ape, Ma va hare 14 e va ere erealula hiki, eapai au laila. 34Laelave ara ero here leive — e oaria eapai perehekai larive — ovokake okiharo la. Haela ae ve haro koro haroapo havoava va ka. 35Are ma oharo avi pai kaivi haela oaria ve oropa ve Aualari thank you oharo ape — are pai haivavaelai le lape. 36Ere oaria iki aheke leivahaeai eapai lalavahaeape. 37Ela vevaea ureve haela oaria hareho haela 276. 38Ereve eharau huharavape la hoa ere wheat hae ma ve aikilapai vevaea koraoka leipe.
39Hare pekape la hoa ere ita ovohae eavi ore au leila. Aka ere miri ila ruma ae va eavi elare oharo hukavi vevaea leia va avukavukive heroe la. 40Ere have oaria ma paparaehai aikilapai — hihe horou hehelaukape. Ere oropaki la eara huape mea ve oropa vivila miri ve ukavupe. 41Ere pelaea koa vevaea leia avukavupe — vevaea ve oropa ve miri aheke le huhape — aka ma haha ehoaha evoe hakakaeape. 42Hevehe haela uvi muru haela haeakive maeaeape — ere ma hara ukavi vivilavahaeaki ave. 43Aka centurion hevehe haela ereve oharo haerapape, ehovea are ikivere Paul ovokake lai pekakive. Are haela oaria maeaeape — hara ore haela oropa ma ve hareaukive, miri uka?-?vukive. 44Are haela kepea kora hakakaea aka eharu ae va akea ve uka?-?vukive maeaeape. Laelave — ere oaria ovokake ila miri pekahavape.
Currently Selected:
Horova 27: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
