Horova 28
28
Paul Melita leia
1Ela pekahavape hoa hiki ela ore leipe ma hiru ve rare Melita. 2La ita haela elaro ikiheheroe eapapo leivahaeape. Ere a ilila elaro oaria auhohi leivahaeape, ehovea lai eapapo ihai mea vevehere leipe. 3Paul a ukuku kaivi a ve aipepe la hoa ekaroa a ve ahea oaoka lei kihoai areve mai buravape. 4La ita haela ekaroa areve mai ve kaeavila eavi elarelare mari hukavape — Ma va haela haeape haela — are ma ve ovokake laleila, aka Mai Ehoe Aualari ikivere ka are ovokake leikilai. 5Kahara are ekaroa lalaeapa a ve paraeai heaha au koaraila. 6Ereve ikikekela are mai au laruakilai aka elavelave hilai apakilai la. Ere va haiapo kari eavape areva kakare au leila, laelave ere ikihelari mari maeaeape, Are ve aualari la.
7La hiru ita Amua haela rare Publius ve kekele: are elaro auhohi leivahaeai hare 3 elaro ikiheroe eapapo leivahaeape. 8Iapai, Publius ve oa maea vevehere i apu maea koarape. Paul areve uvi pekai ivaiva lei arero mai pai veveke le leipe. 9Aireaki maea heahaha haela oaria ekevahaeai maea heahaha veveke leivahaeape. 10Ere elaro momorapupe. Ela horeavape la hoa kai elaro eharu oaria aikiarape.
Rome hahi aea
11Papare 3 kari leipe la hoa ela Alexandria vevaea ae va horeavape. La vevaea vevehere hoa la hiru ve aeaveape — areve hohoa, Maraehae. 12Ela Syracuse pekahavi hare 3 apeape. 13Ela leia harepai helari auvahaeai Rhegium pekahavape. Hare haroapo aire diho mea urai la opoa hare ela Puteoli pekahavape. 14Ela leia apavara koarape. Ere kai elaro apevelavela leipe, laelave ela leia hare 7 apeape. Aireaki ela Rome pekahavape. 15Leia ve apavara elave hari iapai kihoahukai elaro Appius Forum i Tavern Ilehoila koaravahaeape. Paul erero eavi Aualari thank you oharo ai iki aheke leipe. 16Ela Rome pekahavi ere Paul lahua aeakive maeape — aka hevehe haela haroapo arero kiva leipe.
Paul Rome apealula Jew haela ila oharo hukavape
17Iapai — hare ilehoila karia laila are Jew haela ve akea haela itavi korukaiavahaeape. Ere oaria korukaiavahaeape la hoa are erero maeaeape, Apavara, ara Jew haela i elaviilave aualau pupu ve haeae au leila, aka ere araro uvi muru paraeai araro Jerusalem leia Rome haela le avarape. 18Ere araro heheavi paraeakive ikivere leivahaeape, ehovea ere araro harive hovea haeae au koaraila. 19Aka — ehovea Jew haela, araro paraeakive ikivere au leila ara maeape, Ara ikivere Caesar araro heheavakive. Kahara, ara arave ita haela hihiri leivahaea va ka. 20Ehovea ma oharo ara ero velavela leivahaeape e araro eavi ara i hareho oharo hukavakive — ara va ma auri horou hahape ehovea Israel haela ve ikivere eharu. 21Ere arero maeape, Ela a v'ila Judea haela ve hohoa au koaraila. Apavara kara maia au ekeila a v'ila oharo arive, aka ave rare heaha leikive. 22Ela ikivere ave ikikekela oharo iapakive — ehovea ela v'ore ma hiru v'ila ita haela oaria o heaha maealula.
23Ere hare haroape arero maeape — La hare ere haela oaria areve leia auvahaeape. Are erero Aualari ve basileia oharo i Iesu ve oharo ila Moses ve pupu i peroveta haela ve buka ve kileavahaeape, vevelare hoa aiai hailaea. 24Are kileape oharo uku haela iapavahaeape, uku au iapaila. 25Ere iki haroapo au leila, kai le auvahaeape. Aka Paul oharo haroapo erero maeaeape, Ove Veveke Isaiah peroveta v'ila eve Aualau haela iele maeaeape maria:
26A v'ai ma haela maeaeaki
E va avako i iapakilai, kai iele iapa va ka
E va ovohae ila eavakilai aka iele eava va ka.
27Ehovea ma haela ve iki aheke leivahaeape
Ereve avako ipi hahuru iele,
Ereve ovohae apu le kilavape,
Ere ovohae iele eavaki ave
Ere avako ila oharo iele iapaki ave
Ere iki iele kelavaki ave.
Ere ikihelari are erero lei makukuriki ave.
28E va ore leila, Aualari ma ovokake oharo ita lahua haela ve leia kiparaeape. Ere kara iapakilai. 29Areve ma oharo karia leipe la hoa Jew haela leia harepape — kai elarelare oharo leia ve hukavape.
Kokaukaki oharo
30Are leia are havahu ve kavale leipe uvi hitolo orahokaila aeaveape. Areve leia pekahavape haela oaria are auhohi leivahaeape. 31Are mea oaria Aualari ve basileia iroro oharo ape, kai ape karava ila Amua Iesu Keriso ve la eharu oaria kileavahaeape. Haela arero au hereavaila.
Currently Selected:
Horova 28: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
