John 12

Bethany leia, Mary Iesu ve maea hariripe

1Passover hurae hare 6 are hoa, Iesu iki Bethany leia Lazarus aeape la ita, Iesu karu ve lai uroupe la haela. 2Ere hailaea hoa areve eapai leia karikipe — Martha ere v'ila eapai kiva leivahaeape — aka Lazarus eapai lalavahaeape haela i hareho avape. 3Mary spikenard muramura, kavale eapapo eharu pound haroapo kaivi Iesu ve loa hara hariripe — areve loa are elare haro kolo haroroape — muramura ve muo veveke uvi hareho le avape. 4Areve kilea haela ae rare Judas Iscariot, arero aireaki hihila epaki la haela maria ape, 5Ehovealeve ere ma muramura 300 shillings ve ilaea lei merava haela au avaraila ha. 6Are ma oharo au maeaila ehovea are merava haela ikihuru leivahaeape, aka ehovea are korea haela: are moni aroa kiva lei ureve loarape la moni uku are korea leipe. 7Laelave Iesu erero maeaeape, Arero kaererearue: are la eharu kiva lei aiai arave karu ihaki hoa. 8Ehovea merava haela mea oaria e i hareho apealula: aka ara e i hareho haiapo aea va ka.

9Judea karikara haela oaria are leia aeavila la oharo iapai ere auvahaeape — ehovea Iesu hiki va ka, aka ehovea Lazarus are ila lai uroupe la haela eavakive. 10Aka oharo haela elarelare hukavape Lazarus he ka heroe; 11Ehovea are v'ila Judea haela perehekai oaria auvahaeai Iesu ikikelavape.

Iesu Amua hovea Jerusalem pekape

12La opoa hare haela oaria hurae ve ekevahaeape: la haela oaria, Iesu Jerusalem pekakilai la oharo iapai: 13Palm kolo oaria koelaeai kaili hoahukai arero oki koarape. Ere āra maria avahaeape, Hosanna, Amua ve rare ve la ekekilai la haela Israel ve Amua momorapuki. 14Iesu asini mere eavi areve akea ve haiavape: overa buka oharo laria hape:

15Zion ve mari oaoka kalailue,

Eava, ave amua

ass ve mere akea ve haiavai ekekilai.

16Areve kilea haela oropa ma eharu ve iele mekari au iapaila: aka Iesu la morapaeape la hoa ere iki kelavape — ma oharo are v'ila overa haeape — kai ere arero maria leipe. 17Are Lazarus karu ve api la itavi apakive lei uroupe la hoa are i hareho loaroape la haela oaria, ere ma eharu ovohae eavi vavavahaeape. 18Laelave haela oaria are i hareho loaroape, ehovea ere iapape are ma ihova leipe. 19Laelave Pharisee haela elarelare mari hukavape, Eavaila — e va aheke karia — meahaiapo hareho areve aire aupe.

Greek haela ve apevelavela

20Hurai hoa ve ivaiva ve pekahavape haela uku va Greek haela. 21Ma haela iki Philip ve leia, Bethsaida, Galilee karikara ve la haela, arero velavela maria leipe, Haelapo, ela va ikivere Iesu ovohae eavakive. 22Philip iki Andrew maeape, Andrew i Philip ila hareho pekahavi Iesu maeape. 23Iesu erealilaro kavale maeaeape, Haela ve Akore morapaeaki hoa le kihorera. 24Iele havahu, ara ero maeaeaive wheat hae haroapo are va kekele ve hohoai apaki aue la leikilava, are lahua le aeakilai, aka are la apakilava, areve iele oaria huhoreavakilai. 25Ma ovokake ikivere la haela are ovokake havoavakilai — ma meahaiapo hoa ve ovokake ikihairihairi la haela, are va ovokake haiapo le avakilai. 26Haela ae arave horova leikive ikivere la leikilava, veveke are arave airekai ekekilai. Ara aeavila la ita arave koarai haela kara aeakilai: arave horova koaraki la haela — arave Oa arero morapaeakilai.

27Mahau arave iki le ihaive — ara le la oharo maeakilai, Oa, ma hoa ve araro hareava ha? Aka ara ma hoa ve ma horova v'ila kihorerape. 28Oa e, ave rare morapaeaki! La hoa kaia ve āra mari hape, Ara overa morapaeape kai aeka morapaeakilai. 29Areve maeamaea epavape la haela oaria la oharo iapai mari maeape, Kaea hi la. Haela uku maeaeape, Aneru arero oharo maeape. 30Iesu kavale maeaeape, Ma āra ara v'ila au haila, aka e v'ila lahaila. 31Meahaiapo ve heheavaki hoa ma. Meahaiapo ve amua ve avakaki hoa ma. 32Ere araro uralapakilava, ara haela oaria arave ukaki ve karakilai. 33Are mari ape ehovea areve apaki la maea ve erero kileakive. 34Laelave haela oaria arero kavale maeape, Ela va pupu oharo maria iapape, Keriso haiapo aeakilai. A va learia maeaive, Haela ve Akore lei urapakilai. Ma haela ve akore leita ha? 35Iesu kai erero maeaeape, Mea perehekai ovava e i hareho aeavila e ovava hoa loa va loaki — muru hoa ero heaorapaki ave — ehovea mea muru hoa veaki la haela‐are va auki la oki ore va ka. 36E ovava ila la hoa ovava ikikelavaki, e ovava ve akoremari leivahaeakilai.

Iesu ma oharo maeai ita lahua ai muruhari aeape.

Jew haela iapaki aue mai: Muruhari ikikekela haela uku

37Are va ereve oropa horova hoaha oaria leivahaeape, aka ere arero iki au kelavaila. 38Ehovea peroveta haela Isaiah maeape la oharo iele leikive — are mariape:

Amua, elave oharo leita la iapape,

Amua ve mai leita haela ve oropa ve hihika leipe ha?

39Laelave ere iki au kelavaila,

Ehovea Isaiah ve aeka oharo maria:

40Are erero ovohae kariri leivahaeape, ereve iki kara are aheke leivahaeape,

Ere ovohae i eavavahaeaki ave, aka iki ore leivahaeaki ave,

Ere iki helarivahaeaki ave, ara erero lei makukuriki ave.

41Ma oharo Isaiah maeaeape, ehovea are areve haharika eavape — are kai are v'ila maeape. 42Lae vi va — uku akea haela arero ikikelavape, aka hihika au maeaila, ehovea Pharisee haela erero synagogue mahokaea ve huikapai paparaehaki ave. 43Ehovea ere va Aualari ve morapaeaki oharo ikivere perehekai leivahaeape — haela ve morapaeaki oharo ere ikivere eapapo leivahaeape.

Iesu hihika kileavahaeape oharo uku

44Iesu āra mari hape, Araro iki kekelaki la haela are araro hiki kekela va ka, are araro kiparaeape la haela kara iki kekelavila. 45Araro eavaki la haela araro kiparaeape la haela eavavila. 46Ara ovava hovea meahaiapo ureve kihoaupe, ehovea araro ikikekelaki la haela are mea muru aea va ka. 47Haela ae arave oharo iapai leiki aue la leikilava, ara arero heheava va ka, ehovea ara va meahaiapo heheavakive au ekeila, aka ehovea meahaiapo lei makurikive. 48Haela ae arave oharo iapaki aue la leikilava, areve heheavaki haela le aeave. Ara maeape la oharo, hita la hare havahu arero heheavakilai. 49Ehovea ara ara v'ila au maeaila, aka araro kiparaeape la Oa, are araro oharo kimaeape — ara leari oharo maeakilai, kai leari oharo hukavakilai. 50Ara v'ore areve kilea oharo va ovokake haiapo iele: laelave ara maeaivila la oharo, kaire, Oa araro kimaeape la oharo, ara laria hukavavila.

Currently Selected:

John 12: ORO

Highlight

Copy