John 13

Iesu kilea haela ve loa ma huhelape

1Passover hurae maea iele la hoa Iesu ore leipe areve hoa kihorera are ma meahaiapo hakurepai Oa ve leia pekakilai, are elare haela meahaiapo hoa ve ikivere leipe aiai kari leiki hoa kara.

2Hailaea eapai hoa — haelaharihu Judas Iscariot Simon ve akore ve iki ureve overa amuraeape Iesu hihila epakive. 3Iesu, ehovea are v'ore Oa eharu oaria areve mai ve aiarape, kai Aualari ve kihoaupe kai Aualari ve leia pekakilai — 4eapai ve urai elare pura helauka aipe hopa towel hahape. 5Are haita ma kakaita kilea haela ve loa ma huhelakive ipopeavape, ereve loa elare hopa hahape la towel ila kakarara leipe. 6Are Simon Peter ve leia ekaopape; are arero maeape, Amua, a arave loa ma huhelakilai ha? 7Iesu arero kavale maeape, Ara leiki la horova a ma hoa ore va ka, aka aireaki a va ore leikilai. 8Peter arero maeape, A arave loa huhela va arekaea. Iesu arero kavale maeape, Ara aro ma huhelaki aue la leikilava, a ara i hareho aea va ka. 9Simon Peter arero maeape, Amua, arave loa hiki ka, arave mai i haro ila kara. 10Iesu arero maeape, Ma la huhelaki la haela, loa hiki huhelakive va heroe, hoveahovea are va maea hareho veveroro leive. E kara veveroro, aka oaria hareho va ka. 11Ehovea arero hihila epakilai la haela are va ore, laelave are maeape, E oaria hareho veveroro ka.

12Are ereve loa huhelai karia lei elare pura hahai erero mari maeaeape, Ara ero laleila la mai ve iele e v'ore ha? 13E va araro Kilea haela i Amua ila itavalula; Eva oharo ehoe, ehovea ara va iele la. 14Ara, eve Amua i Haelapo iele, eve loa ma la huhelaki lailava — e kara elarelare loa huhelakive, heroe. 15Ehovea ara eve oropa ve ihova laleila, ara ero laleila mai laria elarelare leivahaeakive. 16Iele, iele, ara ero maeaeaive — horova haela areve haelapo ve akea ve lei va ka — aeva paraeape la haela arero paraeape haela ve akea ve lei va ka. 17E va ma eharu ore la leikilava, kai iele la leikilava, e va ikiveveke leivahaeakilai. 18Ara e hareho v'ila oharo maeaeai va ka. Ara ikivere leivahaeape la haela ara v'ore: aka ehovea pupu buka hape la oharo iele leikilai, arave pai laravila la haela areve loa ikipi araro lakoaila. 19Aireaki hoa ara ero oropa maeaeakilai eharu aire horeavakilai, laelave are horeavaki la hoa e va ikikekelakilai — ara havahu la. 20Iele, iele, ara ero maeaeaive — ara paraeaki la haela auhohi leivila la haela, araro kara auhohi leivila. Araro auhohi leiki la haela are araro kiparaeape la haela kara auhohi leikilai.

Iesu hihila epaki haela hihika amoeape

21Iesu la oharo maeai iki au ihiaupe, kai hihika maeaeape, O iele ara ero maeaeaive — eve haela ae araro hihila epakilai. 22Kilea haela elarelare eavi horahora leipe, are va leita v'ila oharo maeape. 23Haha ve haiavape kilea haela ae Iesu ve arahu ve haiavape. Iesu ikivere havahu leipe haela ae va la. 24Simon Peter arero mai laruai mari maeape, Elaro kimaeaki are va leita v'ila la oharo lamaeaila. 25Are Iesu ve arahu koelaeai arero velavela leipe, Amua, leita ha? 26Iesu kavale maeape, Ara pai ma paraeai avaraki la haela — are la. Kahara, are eapai ma paraeai kaivi Judas Simon Iscariot ve akore la avarape. 27Are la eapai avi Satan areve iki ure araeape: Iesu arero maeape, A va leikilai la horova elavelave leiki. 28Haha ve avape haela oaria are va arero maeape ma oharo ve iele ore au leila. 29Uku ve ikikekela, ehovea Judas moni aroa kiva leipe, laelave Iesu arero maeape hurae ve ikivere eharu ilaea leikive aukive, aka are va eharu ae merava haela aiarakive. 30Laelave are ma paraeape la pai avi ehoe le hoaupe. La va oroa hoa.

Ikiheroe pupu are

31Are va aupe la hoa Iesu maeaeape, Ma hoa haela ve Akore lei morapaeakilai — Aualari kara are v'ila lei morapaeakilai. 32Aualari arero are v'ila morapaeakilai, kai hoa haroapo are arero morapaeakilai. 33Akoremari titaeka, mea perehekai ara e i hareho aeakilai. E va araro haropakilai, aka ara Jew haela maeaeape hoveahovea — ara ero kara mave maeaeaive, Ara v'auki la ita e va auvahaea va ka. 34Ara ero pupu are la avarakive — ara ero ikiheroe leivahaeape la mai, e ka elarelare laria leivahaeakive. 35Maria haela oaria ore leivahaeakilai, e va arave kilea haela — e va elarelare ikiheroe leivahaelula la mai.

Peter aireaki hehepo leikilai la oharo

36Simon Peter arero maeape, Amua, a lahoa aukilai ha? Iesu kavale maeape, Ara v'auki la ita e va ma hoa au va ka. Aka a va arave airekai aukilai. 37Peter arero maeape, Amua, ehovealeve a v'auki la ita ara mahau au va ka? Ara arave ovokake a v'ila avarakilai. 38Iesu arero maeape, A va elare ovokake ara v'ila avarakilai ha? O iele ara aro maeaive — kokora hi e va ka, aiai a va oropa ara v'ila hoa three hehepo leikilai.

Currently Selected:

John 13: ORO

Highlight

Copy